ရိုဟင်ဂျာများ နေရပ်ပြန်ရေးအတွက် တစ်သံတည်းသော လမ်းပြမြေပုံလိုအပ်ဟု UCR တောင်းဆို
ရိုဟင်ဂျာဒုက္ခသည်တွေ လုံခြုံစွာ နေရပ်ပြန်နိုင်ရေးအတွက် နိုင်ငံတကာအသိုင်းအဝိုင်းအနေနဲ့ တစ်သံတည်းသော လမ်းပြမြေပုံတစ်ရပ် ရေးဆွဲအကောင်အထည်ဖော်ပေးဖို့ လိုအပ်တယ်လို့ United Council of Rohingya (UCR) က တောင်းဆိုလိုက်ပါတယ်။
အဲဒီတောင်းဆိုချက်ကို ဘင်္ဂလားဒေ့ရှ်နိုင်ငံ ကော့စ်ဘဇားမြို့မှာ အောက်တိုဘာ ၇ ရက်က ကျင်းပတဲ့ “အရေးပေါ်တုံ့ပြန်မှုကနေ ရေရှည်တည်တံ့တဲ့ ဖြေရှင်းချက်တွေဆီ — စည်းလုံးညီညွတ်မှု ၁၀ နှစ်တာဆီသို့” ဆိုတဲ့ စားပွဲဝိုင်းဆွေးနွေးပွဲမှာ UCR ကိုယ်စားလှယ်တွေက ပြောကြားခဲ့တာပါ။
NGOs Platform Cox’s Bazar က ဆွစ်ဇာလန်နိုင်ငံရဲ့ ပံ့ပိုးမှုနဲ့ စီစဉ်တဲ့ အဲဒီဆွေးနွေးပွဲကို Plan International က အိမ်ရှင်အဖြစ် လက်ခံကျင်းပခဲ့ပြီး UCR အဖွဲ့ဝင် ဦးခင်မောင်နဲ့ ဆာဂျီဒါဘေဂွမ်တို့က Panelist တွေအဖြစ် ပါဝင်ဆွေးနွေးခဲ့ကြတာပါ။
ဦးခင်မောင်က ရိုဟင်ဂျာဒုက္ခသည်တွေနဲ့ အိမ်ရှင်လူထု ရင်ဆိုင်နေရတဲ့ အရေးပေါ်လိုအပ်ချက်တွေကို တင်ပြခဲ့ပြီး ရိုဟင်ဂျာတွေ လုံခြုံစွာ နေရပ်ပြန်နိုင်ရေးအတွက် နိုင်ငံတကာအသိုင်းအဝိုင်းအနေနဲ့ တစ်သံတည်းသော လမ်းပြမြေပုံတစ်ရပ် ရေးဆွဲပေးဖို့ တောင်းဆိုခဲ့ပါတယ်။
ရိုဟင်ဂျာဒုက္ခသည်အရေးကြောင့် အိမ်ရှင်လူထုမှာလည်း ထိခိုက်နစ်နာမှုတွေနဲ့ အခက်အခဲတွေ ရင်ဆိုင်နေရတာကြောင့် သူတို့အတွက် နိုင်ငံတကာရဲ့ အထောက်အပံ့တွေ ပိုမိုတိုးမြှင့်ပေးဖို့လည်း ဦးခင်မောင်က တိုက်တွန်းခဲ့ပါတယ်။
ဆာဂျီဒါဘေဂွမ်ကတော့ ရိုဟင်ဂျာဒုက္ခသည်တွေအတွက် လူသားချင်းစာနာမှုအကူအညီနဲ့ ဖွံ့ဖြိုးရေးလုပ်ငန်းတွေမှာ ရှိနေတဲ့ လိုအပ်ချက်တွေ၊ အခက်အခဲတွေနဲ့ ကွာဟချက်တွေကို သူ့ရဲ့ အတွေ့အကြုံတွေအပေါ် အခြေခံပြီး ဆွေးနွေးခဲ့ပါတယ်။
ဒါ့အပြင် ရိုဟင်ဂျာဒုက္ခသည်တွေနဲ့ အိမ်ရှင်လူထုအကြား လူမှုစည်းလုံးညီညွတ်မှု ပိုမိုခိုင်မာလာအောင် လုပ်ဆောင်ပေးဖို့နဲ့ အိမ်ရှင်လူထုအတွက် ရန်ပုံငွေတွေ ပိုမိုတိုးမြှင့်ပေးဖို့လည်း ဦးခင်မောင်က တောင်းဆိုခဲ့ပါတယ်။
ရိုဟင်ဂျာအရေးအတွက် ရေရှည်တည်တံ့တဲ့ ဖြေရှင်းချက်တွေ လိုအပ်နေသော်လည်း နေရပ်ပြန်ရေးဟာ အဓိကဦးစားပေးအဖြစ် ဆက်လက်ရှိနေတယ် လို့လည်း ဦးခင်မောင်က အလေးပေးပြောကြားခဲ့ပါတယ်။
ဆွေးနွေးပွဲကို Refugee Relief and Repatriation Commission ရဲ့ လက်ထောက်ကော်မရှင်နာ မစ္စတာ နဇ်မူလ်အစ္စလမ် ဘွိုင်ယန်၊ ကော့စ်ဘဇားရှိ DIG FDMN ရုံးမှ ရဲမှူးချုပ် မစ္စတာ မိုဟာမက် ခေါ်ရှက်ဒ် အလာမ်နဲ့ UNHCR ကိုယ်စားလှယ် မစ္စတာ အိုင်ဗို ဖရိုင်ဆန်တို့လည်း တက်ရောက်ခဲ့ကြပါတယ်။
UCR ကတော့ ဆွေးနွေးပွဲကို ဖိတ်ကြားပေးခဲ့တဲ့ အဖွဲ့အစည်းတွေအားလုံး၊ အထူးသဖြင့် Oxfam ကို ကျေးဇူးတင်ကြောင်းနဲ့ ရိုဟင်ဂျာလူထုရဲ့ စိုးရိမ်ပူပန်မှုတွေနဲ့ အမြင်တွေကို တင်ပြခွင့်ရရှိခဲ့တဲ့အတွက် ကျေနပ်မိကြောင်း ထုတ်ပြန်ပြောဆိုထားပါတယ်။
ဓာတ်ပုံ – UCR
CJ