မော်လမြိုင်မှာ စိတ်ကျန်းမာရေးမကောင်းသူတစ်ဦး စစ်မှုထမ်းအတွက် ဖမ်းဆီး ရောင်းစားခံရ
မွန်ပြည် မော်လမြိုင်မြို့နယ်၊ မြေနီကုန်းရပ်ကွက် နယ်မြေ ၆ မှ အသက် ၂၀ ကျော်အရွယ် စိတ်ကျန်းမာရေးမကောင်းသူ လူငယ်တစ်ဦး စစ်မှုထမ်းအတွက် ရောင်းစားခံရပြီး မုပွန်စစ်သားစုဆောင်းရေးတပ်မှာ ရောက်ရှိနေတယ်လို့ ဒေသခံတွေဆီက သိရပါတယ်။
စက်တင်ဘာ ၂ ရက်က ဇနီးဖြစ်သူနဲ့ စိတ်ဆိုးပြီး မိဘတွေရှိရာ ကြာအင်းဆိပ်ကြီးကို ပြန်သွားတဲ့ အသက် ၂၂ နှစ်အရွယ် မောင်ဝေယံအောင်ဟာ လမ်းမှာ ပျောက်ဆုံးသွားခဲ့တာလို့ ဖြစ်စဉ်သိသူတစ်ဦးက CJ Platform ကို ပြောပါတယ်။
တစ်လနီးပါး ပျောက်ဆုံးနေပြီးနောက် အောက်တိုဘာ ၁ ရက်မှာ အဆက်အသွယ်ပြန်ရချိန် မောင်ဝေယံအောင်ဟာ မုပွန်စစ်သားစုဆောင်းရေးတပ်မှာ ရောက်ရှိနေကြောင်း သိရတာလို့ ဆိုပါတယ်။
“အဲ့ကောင်လေးကို ကယ်ရီသမားက စစ်ထဲကို သွားရောင်းစားလိုက်တာ။ အခု သူ့မိသားစုဝင်တွေက ဆေးစာအုပ်နဲ့ လိုက်ထုတ်ဖို့လုပ်နေတယ်။ ရမရတော့ မသိဘူး” လို့ ဖြစ်စဉ်သိသူက ပြောပါတယ်။
မောင်ဝေယံအောင်ဟာ စိတ်ကျန်းမာရေးဆိုင်ရာ ပြဿနာရှိသူဖြစ်ပြီး မိသားစုက ဆေးမှတ်တမ်းတွေနဲ့အတူ စစ်သားစုဆောင်းရေးတပ်ကနေ ပြန်လည်ခေါ်ထုတ်နိုင်ဖို့ ကြိုးပမ်းနေတယ်လို့ သိရပါတယ်။
အလားတူ ရန်ကုန်တိုင်း၊ တောင်ဒဂုံမြို့နယ် ၇၀ ရပ်ကွက်မှာလည်း လွန်ခဲ့တဲ့ ၆ လခန့်က ပေါ်တာဆွဲဖမ်းဆီးခံခဲ့ရတဲ့ အသက် ၃၅ နှစ်အရွယ် စိတ်ကျန်းမာရေးမကောင်းသူ ကိုဝင်းညွန့်ဦးဟာ အဆက်အသွယ်ပြန်ရချိန်မှာ စစ်သင်တန်းရောက်ရှိနေတယ်လို့ သိရပါတယ်။
စစ်မှုထမ်းဥပဒေ ပုဒ်မ ၂၂ အရ သာသနာ့ဝန်ထမ်းတွေ၊ အိမ်ထောင်သည်အမျိုးသမီးတွေ၊ သားသမီးရှိသူတွေ၊ အမြဲတမ်း ကိုယ်လက်မသန်စွမ်းသူတွေနဲ့ ဆေးစစ်ချက်အရ စစ်မှုထမ်းရန် မသင့်လျော်သူတွေကို စစ်မှုထမ်းရန် ခေါ်ယူခြင်းမပြုရဘူးလို့ ဖော်ပြထားပါတယ်။
စစ်မှုထမ်းဥပဒေကို စစ်အုပ်စုက ၂၀၂၄ ဖေဖော်ဝါရီ ၁၀ ရက်မှာ အသက်ဝင်စေခဲ့ပြီး မတ်လ ၂၄ ရက်ကစတင်ကာ လူငယ်တွေကို စစ်မှုထမ်းရန် ခေါ်ယူခဲ့တာဖြစ်ပါတယ်။ လက်ရှိမှာ စစ်မှုထမ်းသင်တန်း အမှတ်စဉ် ၂၉ အထိ ရောက်ရှိနေပြီလို့ သိရပါတယ်။
ဓာတ်ပုံ – လူမှုကွန်ရက်