စစ်မှုထမ်းဥပဒေအသက်သွင်းပြီးနောက် လူပျောက်မှု ၂၀ရာခိုင်နှုန်းတိုးလာပြီး ရန်ကုန်မှာ အများဆုံးဖြစ်ပွားနေ
အာဏာသိမ်းစစ်အုပ်စုက ပြည်သူ့စစ်မှုထမ်းဥပဒေကို အတင်းအဓမ္မ ပြဋ္ဌာန်းပြီးတဲ့နောက်ပိုင်း မြန်မာနိုင်ငံတစ်ဝန်းမှာ အရပ်သားပြည်သူတွေ ဖမ်းဆီးခံရတာ၊ ခြိမ်းခြောက်ငွေညှစ်ခံရတာနဲ့ လူပျောက်ဆုံးမှုဖြစ်စဉ်တွေဟာ အဆမတန် မြင့်တက်လာနေပြီး အထူးသဖြင့် စီးပွားရေးမြို့တော် ရန်ကုန်မှာ လူပျောက်ဆုံးမှု အများဆုံးဖြစ်ပွားခဲ့တယ်လို့ “မြန်မာဝတ်နက်စ်” (Myanmar Witness) အဖွဲ့ရဲ့ ဇူလိုင်လ ၁၃ ရက်နေ့က ထုတ်ပြန်လိုက်တဲ့ အစီရင်ခံစာမှတ်တမ်းတွေအရ သိရပါတယ်။
အစီရင်ခံစာအရ မြန်မာနိုင်ငံမှာ စစ်အာဏာမသိမ်းခင် ပြီးခဲ့တဲ့ ၂၀၂၁ ခုနှစ် ဇန်နဝါရီလတုန်းက လူမှုကွန်ရက်ပေါ်မှာ လူပျောက်ကြော်ငြာ ၄ ခုသာ ရှိခဲ့ပေမဲ့၊ စစ်မှုထမ်းဥပဒေ ထုတ်ပြန်ပြီးနောက်ပိုင်း ပြီးခဲ့တဲ့ ၂၀၂၅ ခုနှစ် ဇန်နဝါရီလမှာတော့ လူပျောက်ကြော်ငြာပေါင်း ၈၂ ခုအထိ အဆပေါင်း ၂၀ ကျော်အထိ သိသိသာသာ မြင့်တက်လာခဲ့တယ်လို့ ဆိုပါတယ်။
တစ်နိုင်ငံလုံး အတိုင်းအတာအရ ရန်ကုန်တိုင်းအတွင်းမှာ လူပျောက်တိုင်ကြားမှု ၁၆၃ ခုအထိ ရှိခဲ့တာကြောင့် အများဆုံး ထိပ်ဆုံးက ဖြစ်ခဲ့ပြီး၊ မန္တလေးတိုင်းမှာ ၄၈ မှုနဲ့ ရှမ်းပြည်အတွင်းမှာ ၃၅ မှုအထိ အသီးသီး ဖြစ်ပွားခဲ့တာလို့ အစီရင်ခံစာမှာ အသေးစိတ် ဖော်ပြထားတာပါ။
မြေပြင်မှာ ပျောက်ဆုံးသွားကြသူ အများစုဟာ စစ်အုပ်စုက သတ်မှတ်ထားတဲ့ စစ်မှုထမ်းရမယ့် အသက်အရွယ် ရောက်ရှိနေကြတဲ့ အမျိုးသားတွေနဲ့ လူငယ်ယောက်ျားလေးတွေ ဖြစ်ကြတယ်လို့ သိရပြီး ပြီးခဲ့တဲ့ ၂၀၂၄ ခုနှစ်အတွင်း စုဆောင်းရရှိတဲ့ လူပျောက်ကြော်ငြာစာရင်းတွေအရ ဆိုရင်လည်း အမျိုးသား ၂၃၃ ဦးအထိ စံချိန်တင် ပျောက်ဆုံးသွားခဲ့တယ်လို့ အစီရင်ခံစာမှာ ထောက်ပြထားပါတယ်။
ဒေသတွင်း ဥပဒေမဲ့ ဖမ်းဆီးမှု သတင်းတွေကို စောင့်ကြည့်ဖော်ပြပေးနေတဲ့ “ရန်ကုန်စကောက်ကွန်ရက်” (Rangoon Scout Network) ရဲ့ ဒေတာအချက်အလက်တွေ အရလည်း အခုနှစ် ဇူလိုင်လ ပထမပတ်နဲ့ ဒုတိယပတ် နှစ်ပတ်အတွင်းမှာတင် ရန်ကုန်မြို့ပေါ်မှာ စစ်အုပ်စုရဲ့ မတရားဖမ်းဆီးခြင်း ခံရသူပေါင်း ၃၀ ဦးအထိ ရှိခဲ့တယ်လို့ သိရပါတယ်။
“လမ်းပေါ်မှာ သွားလာလှုပ်ရှားနေတုန်း လိုက်လံဖမ်းဆီးဆွဲတာမျိုးတွေရယ်၊ လမ်းဘေး၊ ဘူတာရုံတွေနဲ့ လက်ဖက်ရည်ဆိုင်၊ စားသောက်ဆိုင် စတဲ့ အများပြည်သူနဲ့ ဆိုင်တဲ့နေရာတွေမှာ ဝင်ရောက်ဖမ်းဆွဲတာတွေက အများဆုံးပါပဲ။ ကျန်တာကတော့ ညဘက်တွေမှာ ဧည့်စာရင်းစစ်ဆေးပြီး အတင်းအဓမ္မ ဖမ်းခေါ်သွားတာတွေ၊ နေအိမ်တွေအထိ ဝင်ရောက်ရှာဖွေ ဖမ်းဆီးသွားတာတွေ ဖြစ်ပါတယ်။ စစ်မှုထမ်းကိစ္စကြောင့် ဖမ်းဆွဲတာတွေကော၊ တခြားအကြောင်းပြချက် ကိစ္စတွေကြောင့် ဖမ်းဆွဲတာတွေကော အကုန်လုံး ပါဝင်ပါတယ်ဗျာ” လို့ Rangoon Scout Network ရဲ့ တာဝန်ရှိသူတစ်ဦးက CJ Platform ကို မြေပြင်အခြေအနေကို ရင်ဖွင့်ပြောပြထားပါတယ်။
အခုလိုမျိုး လူမှုကွန်ရက်စာမျက်နှာတွေပေါ်မှာ လူပျောက်ကြော်ငြာတွေ များပြားလာတာဟာ စစ်အုပ်စုက တရားဝင် ဆင့်ခေါ်စာပေးပို့ တိုင်ကြားတာမျိုးထက်၊ လမ်းပေါ်မှာတင် အရပ်သားတွေကို စိတ်ထင်တိုင်း ဖမ်းဆီးတာနဲ့ မိသားစုဝင်တွေကို တစ်စုံတစ်ရာ အကြောင်းကြားခြင်းမရှိဘဲ လူမသိသူမသိ ဖျောက်ဖျက်ပစ်တဲ့ နည်းလမ်းဆိုးတွေသုံးပြီး အဓမ္မစစ်သားစုဆောင်းနေတာကို ပြသနေတဲ့ ထင်ရှားတဲ့ သက်သေအထောက်အထားတွေ ဖြစ်တယ်လို့ Myanmar Witness အဖွဲ့က ထောက်ပြထားပါတယ်။
ဒါတင်မကသေးဘဲ ပြီးခဲ့တဲ့ ကာလအတွင်းမှာ ထိုင်းနိုင်ငံအပါအဝင် အိမ်နီးချင်းနိုင်ငံတွေဘက်ကနေ မြန်မာရွှေ့ပြောင်းလုပ်သား ပြည်သူ ၃,၃၁၃ ဦး ပြန်လည်ပို့ဆောင်ခြင်း ခံခဲ့ရပြီး၊ အဲဒီအထဲက ထိုင်းနိုင်ငံ၊ ရနောင်းမြို့ကနေ တရားမဝင် လမ်းကြောင်းဖြင့် ပြန်ပို့ခံရတဲ့ မြန်မာလူငယ်တွေကို စစ်အုပ်စုဘက်ကနေ လမ်းခုလတ်မှာ ဖမ်းဆီးခေါ်ဆောင်သွားခဲ့ပြီး စစ်သင်တန်းတွေဆီသို့ တိုက်ရိုက်ပို့ဆောင်ကာ အဓမ္မစစ်သားစုဆောင်းခဲ့တာတွေကိုပါ မြေပြင်အထောက်အထားတွေနဲ့တကွ စုံစမ်းတွေ့ရှိခဲ့ရတယ်လို့ အစီရင်ခံစာမှာ ဆိုထားပါတယ်။
ဓာတ်ပုံ – Pro-SAC