စစ်ကိုင်းမှာ ငလျင်အပြီး မြေအက်ကြောင်းတွေကြောင့် မိုးရွာတိုင်း ရေကြီးရေလျှံမှုများ ဆက်တိုက်ဖြစ်ပေါ်
စစ်ကိုင်းမြို့မှာ ငလျင်အပြီးထွက်ပေါ်လာတဲ့ မြေအက်ကြောင်းတွေနဲ့ အပျက်အစီးများ ပိတ်ဆို့နေခြင်း၊ ရေနုတ်မြောင်းများ ပိတ်ဆို့နေခြင်းကြောင့် မိုးရွာချိန်တိုင်း ရပ်ကွက်အချို့မှာ ရေကြီးနစ်မြုပ်မှုတွေကို ဆက်တိုက် ကြုံတွေ့နေရတယ်လို့ ဒေသခံတွေဆီက သိရပါတယ်။
စစ်ကိုင်းဒေသခံတွေရဲ့ အဆိုအရ ပြီးခဲ့တဲ့ရက်ပိုင်းအတွင်း မိုးများချိန်တိုင်း ပန်းတော၊ မင်းလမ်းရပ်၊ ချင်းစု၊ မိုးဇာ စတဲ့ အနိမ့်ပိုင်းရပ်ကွက်တွေက နေအိမ်တွေမှာ မိုးရေဝင်ရောက်တာတွေ ဖြစ်ခဲ့တာလို့ သိရပါတယ်။
“အခုရက်ပိုင်းမှာ ညဆိုမိုးက နေ့တိုင်းရွာနေတာပါ၊ အင်းတွေကို မြေဖို့ပြီး အကွက်ရိုက်ရောင်း၊ ရေမြောင်းတွေကပိတ်၊ ငလျင်ကြောင့် မြေတွေက အက်ကြောင်းတွေနဲ့ဆိုတော့ မိုးရွာပြီးရင် ရေတင်ကျန်နေခဲ့တာပါ” လို့ မြို့ခံအမျိုးသားတစ်ဦးက အောက်တိုဘာ ၁၂ ရက်နေ့မှာ CJ Platform ကို ပြောပါတယ်။
ဒေသတွင်း မငြိမ်သက်မှုတွေကြောင့် စစ်ကိုင်းမြို့တွင်း စစ်ရှောင်တွေ အများအပြားပြောင်းရွှေ့လာကြပြီးနောက် ဘုရားကျောင်းကန်တွေမှာ ခိုလှုံနေထိုင်ကြတာ ရှိသလို နေအိမ်လိုအပ်ချက်တွေကြောင့် အိမ်ငှားရမ်းခနဲ့ ခြံမြေဈေးကွက်တွေလည်း အပြောင်းအလဲရှိလာခဲ့ပါတယ်။
အခုလို နေထိုင်ရာ မြေနေရာလိုအပ်ချက်တွေကြောင့် မြေချဲ့ထွင်မှုတွေ ရှိလာပြီးနောက်ပိုင်း ခုလို အကျိုးဆက်တွေ ရှိလာတာဖြစ်နိုင်တယ်လို့လည်း မြို့ခံတချို့က သုံးသပ်ပြောဆိုတာတွေလည်း ရှိနေပါတယ်။
ပြီးခဲ့တဲ့ စူပါတိုက်ဖွန်း ရာဂတ်ဆာကြောင့် မိုးသည်းထန်စွာရွာသွန်းပြီး စစ်ကိုင်းမြို့ အနိမ့်ပိုင်းရပ်ကွက်က နေအိမ်တွေမှာ ရေလျှံခဲ့တာကြောင့် ရေဝင်ရောက်ခဲ့ရတဲ့ နေအိမ်ခြံဝင်းတွေထဲ ကူညီကယ်ဆယ်ရေးအဖွဲ့တွေက ရေစုပ်စက်တွေနဲ့ ရေစုပ်ထုတ်ကူညီပေးခဲ့ကြရပါတယ်။
မိုးလွန်ကာလမှာပါ မိုးဆက်လက်ရွာသွန်းမှုကြောင့်လည်း အောက်တိုဘာ ၁၂ ရက်နေ့မှာ ဒေသခံတွေ အကူအညီတောင်းခံချက်အရ သွားရောက်ကူညီပေးခဲ့ကြောင်း ထုံးဘိုအရေးပေါ်ကယ်ဆယ်ရေး အရန်မီးသတ်တပ်ဖွဲ့ဆီက သိရပါတယ်။
“အနိမ့်ပိုင်းက လူနေအိမ်တွေကတော့ ရေဝင်တာ အကူအညီတောင်းလို့ ကျွန်တော်တို့ သွားရောက်ကူညီခဲ့တာပါ၊ သိပ်တော့မကျန်တော့ပါဘူး” လို့ အကူအညီပေးနေသူတစ်ဦးက ပြောပါတယ်။
ပြီးခဲ့တဲ့ မတ်လ ၂၈ ရက်နေ့က အင်အားပြင်းငလျင်လှုပ်ခတ်ပြီးနောက် စစ်ကိုင်းမြို့မှာ မြေသားထု ကွဲအက်တာ၊ ရေဆိုးပိုက်တွေ ကွဲတာ၊ ရေမြောင်းပိတ်ဆို့မှုတွေ ရှိခဲ့ပါတယ်။
ဒါ့အပြင် စနစ်တကျ အမှိုက်စွန့်ပစ်မှု အားနည်းချက်တွေလည်း ရှိနေသေးတာကြောင့် ရေမြောင်းပိတ်ဆို့မှုတွေဖြစ်ကာ မိုးရွာသွန်းစဉ် ရေမြောင်းမှတဆင့် ဧရာဝတီမြစ်အတွင်း ရေကောင်းစွာ မစီးဆင်းနိုင်ဘဲ မြောင်းရေလျှံမှုတွေဖြစ်ကာ အနိမ့်ပိုင်းနေအိမ်တွေမှာ ရေဝင်ရောက်တာတွေ ရှိနေတာဖြစ်တယ်လို့ သိရပါတယ်။
စစ်ကိုင်းငလျင်ကြောင့် ဖြစ်ပေါ်ခဲ့တဲ့ မြေပြင်အက်ကြောင်းဟာ အရှည်အားဖြင့် ကီလိုမီတာ ၅၅၀ (၃၄၂ မိုင်) အထိ ရှိတယ်လို့ တွက်ချက်ထားပြီး ဒီအက်ကြောင်းဟာ မှတ်တမ်းတင်နိုင်သမျှ အရှည်ဆုံးအက်ကြောင်းဖြစ်တယ်လို့ NASA ပညာရှင်တွေရဲ့ ထုတ်ပြန်ချက်အရ သိရပါတယ်။
ဓာတ်ပုံ – ထုံးဘိုအရေးပေါ်ကယ်ဆယ်ရေး အရန်မီးသတ်တပ်ဖွဲ့