ငလျင်ဒဏ်ခံစားနေရတဲ့ စစ်ကိုင်းနဲ့မန္တလေးကို စစ်ကောင်စီက လေကြောင်းကနေ အကြိမ် ၃၀ ကျော် တိုက်ခိုက်
အင်အားပြင်းငလျင် ပြင်းထန်စွာခံစားနေရတဲ့ စစ်ကိုင်းနဲ့ မန္တလေးကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့လို့ မနေ့က ဧပြီလ ၁ ရက်နေ့အထိ လေးရက်တာကာလအတွင်း ပြည်သူ ၅၀ ဦး ထက်မနည်း သေဆုံးခဲ့ကာ ၄၉ ဦး နီးပါး ဒဏ်ရာရရှိခဲ့တယ်လို့ အမျိုးသားညီညွတ်ရေးအတိုင်ပင်ခံကောင်စီ NUCC က ဒီနေ့မှာ ထုတ်ပြန်လာပါတယ်။
စစ်ကိုင်းတိုင်း ချောင်းဦးမြို့နယ်၊ မန္တလေးတိုင်း စဉ့်ကူးမြို့နယ် အပါအဝင် နေရာပေါင်း (၁၁) နေရာကို စစ်ကောင်စီက လေကြောင်းတိုက်ခိုက်မှု (၃၂) ကြိမ်အထိ တိုက်ခိုက်ခဲ့လို့ သေဆုံးထိခိုက် ဒဏ်ရာရရှိခဲ့တာလို့ ဆိုပါတယ်။
အခုလို ဒုက္ခတွေ့ကြုံနေရတဲ့ အခြေအနေမှာ တော်လှန်ရေး အင်အားစုတွေ အနေနဲ့ ထိုးစစ်ကိုရပ်ကာ ကူညီကယ်ဆယ်ရေးလုပ်ငန်းတွေကို တတ်အားသရွေ့ ဆောင်ရွက် နေပေမဲ့ စစ်ကောင်စီက ငလျင်ဘေးသင့်ဒေသတွေအပါအဝင် နိုင်ငံတဝန်းက အရပ်သားပြည်သူနေထိုင်ရာ နေရာတွေကို လေယာဉ်နဲ့ ဗုံးကြဲတာ ထိုးစစ်ဆင် မီးရှို့သတ်ဖြတ်တာတွေကို လုပ်ဆောင်နေဆဲဖြစ်တယ်လို့ ထုတ်ပြန်ချက်ထဲ ပါရှိပါတယ်။
အဲဒီလို ငလျင်ဒဏ်ကြောင့် ထိခိုက်ခံစားနေရတဲ့ ပြည်သူလူထုကို ဦးတည်ပြီး အကြမ်းဖက်မှုတွေ ကျူးလွန်နေတာကို ဘယ်လိုနည်းနဲ့မှ လက်ခံနိုင်စရာ အကြောင်းမရှိတာကြောင့် အမျိုးသားညီညွတ်ရေးအတိုင်ပင်ခံကောင်စီ အနေနဲ့ ပြင်းပြင်းထန်ထန် ရှုတ်ချတယ်လို့ ဆိုပါတယ်။
နိုင်ငံတကာအနေနဲ့လည်း သဘာဝဘေးဒဏ်သင့်ကာလပါမရှောင် အကြမ်းဖက်မှုတွေ ကျူးလွန်နေတဲ့ စစ်ကောင်စီကို နှုတ်အားဖြင့် ကန့်ကွက်တားဆီးရုံမျှမက လက်တွေ့အားဖြင့်လည်း အရေးယူဆောင်ရွက်သင့်နေပြီဖြစ်တယ်လို့ တိုက်တွန်းထားပါတယ်။
ဒါ့အပြင် စစ်ကောင်စီရဲ့ လေကြောင်းတိုက်ခိုက်မှုတွေကို ခြွင်းချက်မရှိ အမြန်ဆုံးရပ်တန့်နိုင်ဖို့ ပူးပေါင်းဆောင်ရွက်ပေးကြဖို့ကိုလည်း အလေးအနက်ထား တိုက်တွန်းတယ်လို့ အမျိုးသားညီညွတ်ရေး အတိုင်ပင်ခံကောင်စီ NUCC က ထုတ်ပြန်ထားပါတယ်။
ဓာတ်ပုံ – CJ Platform
ပုံစာ – မန္တလေးမြို့တွင်း ငလျင်ကြောင့် ပျက်စီးနေပုံကို ဧပြီ ၁ရက်နေ့က မြင်ရစဉ်