ငလျင် ၅ရောက်မြောက်နေ့ ရောက်လာသော်လဲ အသက်ရှင်လျက် အမျိုးသားတစ်ဦးကို ကယ်ထုတ်နိုင်
နေပြည်တော် ဥတ္တရသီရိမြို့နယ် ဟိုတယ်အေးချမ်းသာ ပြိုကျမှုမှာ ပိတ်မိနေသူတွေအနက် အမျိုးသားတစ်ဦးကို တူရကီနိုင်ငံ ကယ်ဆယ်ရေးအဖွဲ့တွေနဲ့ မြန်မာနိုင်ငံ မီးသတ်တပ်ဖွဲ့ဝင်တွေ ပူးပေါင်းပြီး အသက်ရှင်လျက် ကယ်တင်နိုင်ခဲ့တယ်လို့ မြန်မာနိုင်ငံမီးသတ်တပ်ဖွဲ့က ဒီကနေ့ ဧပြီ ၂ရက်နေ့ မနက်ပိုင်းမှာ ထုတ်ပြန်လာခဲ့ပါတယ်။
ခြောက်ထပ်အမြင့်ရှိတဲ့ ဟိုတယ်အေးချမ်းသာ အဆောက်အဦဟာ ငလျင်ကြောင့် အောက်ဆုံး (၂)ထပ် ပြိုကျသွားပြီး ပိတ်မိနေသူတွေ ရှိနေခဲ့ပါတယ်။
မီးသတ်တပ်ဖွဲ့ရဲ့ ထုတ်ပြန်ချက်အရ ပိတ်မိနေသူ (၂)ဦးအနက် တစ်ဦးကို ကယ်တင်နိုင်ခဲ့ပြီး နောက်တစ်ဦးကို ဆက်လက်ရှာဖွေနေတယ်လို့ သိရပါတယ်။
အင်အားပြင်း ငလျင်လှုပ်ခတ်ခဲ့မှုဟာ ၅ရက်မြောက်နေ့ကို ရောက်ရှိလာပြီဖြစ်ပေမဲ့ အခုလို အသက်ရှင်ကျန်ရစ်လျက်ရှိသေးသူတွေကို ကယ်တိုင်နိုင်တာဟာ ပျောက်ဆုံးနေဆဲ ဖြစ်သူတွေရဲ့ မိသားစုဝင်တွေအတွက် သတင်းကောင်းတစ်ခုလည်း ဖြစ်ပါတယ်။
ဓာတ်ပုံ – မြန်မာနိုင်ငံ မီးသတ်တပ်ဖွဲ့