ငလျင်ဘေးဒဏ်ကြောင့် EAO နယ်မြေတွေမှာ သင်္ကြန်ပွဲ ဖျက်သိမ်းခဲ့ပေမဲ့ စစ်ကောင်စီကကျင်းပမယ် လို့ဆို
အင်အား ၇ ဒသမ ၇ ပြင်းအားရှိတဲ့ စစ်ကိုင်းငလျင်ဘေးဒဏ်ကြောင့် နိုင်ငံတဝန်း လူထောင်ပေါင်းများစွာ သေဆုံးခဲ့ပြီး ထိခိုက်ပျက်ဆီးမှုများပြားခဲ့လို့ တိုင်းရင်းသားလက်နက်ကိုင် နယ်မြေတချို့မှာ လူသားခြင်းစာနာခြင်းအားဖြင့် လာမယ့်သင်္ကြန်ကာလမှာ သင်္ကြန်ပွဲကျင်းပဖို့ ဖျက်သိမ်းခဲ့ပေမဲ့ စစ်ကောင်စီက သင်္ကြန်ပွဲကို ကျင်းပမှာဖြစ်တယ်လို့ မနေ့က ဧပြီ ၁ ရက်နေ့မှာ ထုတ်ပြန်ကြေညာ လိုက်ပါတယ်။
ဒီနှစ် မြန်မာ့ရိုးရာသင်္ကြန်ကို အပျော်အပါး သီဆိုကခုန်မှုများ မပါဝင်ဘဲ ရိုးရာယဥ်ကျေးမှုနဲ့အညီ အေးချမ်းသာယာတဲ့ သင်္ကြန်အဖြစ် ကျင်းပသွားမှာဖြစ်တယ်လို့ ဆိုပါတယ်။
“ အကအခုန်တွေမပါပဲ ကျင်းပမယ်ဆိုပဲ။ သင်္ကြန်မဏ္ဍပ်တွေဆောက်ထားတာမှ ဟီးထနေတာပဲ။ အကတိုက်နေသူတွေလည်း အကတိုက်နေတုန်းပဲ “ လို့ ပုသိမ်မြို့ခံတစ်ဦးက CJ Platform ကိုပြောပါတယ်။
လက်ရှိအချိန်ထိ ကယ်ဆယ်ရေးလုပ်ငန်းတွေ လုပ်ဆောင်နေရဆဲဖြစ်တာကြောင့် လူသားခြင်း စာနာထောက်ထားတဲ့အနေနဲ့ တအာင်းတပ် PSLF/TNLA ထိန်းချုပ်ထားရာ ခရိုင် ၅ ခုမှာ သင်္ကြန်ပွဲတော် မကျင်းပဖို့ ပြီးခဲ့တဲ့ မတ်လ ၃၁ ရက်နေ့က ကြေညာခဲ့ပါတယ်။
ကိုးကန့်တပ် MNDAA ထိန်းချုပ်ရာနေရာ လားရှိုးမြို့သမိုင်းတလျောက် အစည်ကားဆုံးလုပ်မယ်ဆိုပြီး သင်္ကြန်ပွဲတော်အတွက် ကြိုတင်ပြင်ဆင်ထားပေမဲ့ လူသားခြင်းစာနာထောက်ထားတဲ့အနေနဲ့ သင်္ကြန်မဏ္ဍပ်အားလုံးကို ငလျင်လှုပ်ခဲ့တဲ့ နေ့မှာပဲ ဖျက်သိမ်းခဲ့ပါတယ်။
ဒါ့အပြင် ရန်ကုန်မြို့ရှိ ထိုင်းဘုရင့်သံရုံးမှာ ကျင်းပဖို့ စီစဉ်ထားတဲ့ သင်္ကြန်ပွဲတော် အခမ်းအနားကိုလည်း ကြေကွဲဖွယ် မြေငလျင်ကြောင့် ဖျက်သိမ်းလိုက်တယ်လို့ Royal Thai Embassy, Yangon က မတ် ၃၁ ရက်နေ့မှာ သတင်းထုတ်ပြန်ထားပါသေးတယ်။
စစ်ကောင်စီက လက်ရှိကြုံ တွေ့နေရတဲ့ ငလျင်ဘေးအန္တရာယ်ကြောင့် နေပြည်တော်၊ စစ်ကိုင်း၊ ပဲခူး၊ မကွေး၊ မန္တလေးတိုင်း နဲ့ ရှမ်းပြည်တို့မှာ ပြည်သူအချို သေဆုံးဒဏ်ရာရတာ ထိခိုက်နစ်နာဆုံးရှုံးမှုတွေ ကြုံတွေ့နေရပြီး တစ်နိုင်ငံလုံး ဝမ်းနည်းကြေကွဲနေရတဲ့ ကာလဖြစ်လို့ ဒီနှစ်သင်္ကြန်ကို အပျော်အပါး သီဆိုကခုန်မှုများ မပါဝင်ဘဲ အေးချမ်းသာယာတဲ့သင်္ကြန်အဖြစ် ကျင်းပသွားမှာလို့ ထုတ်ပြန်ခဲ့တာပါ။
ဒီနှစ်သင်္ကြန်ဟာ ပြီးခဲ့တဲ့နှစ် ဒီဇင်ဘာလဆန်းပိုင်းက ဒြပ်မဲ့ယဉ်ကျေးမှု အမွေအနှစ်အဖြစ် ယူနက်စကိုက အသိအမှတ်ပြုခဲ့ပြီးနောက် စစ်ကောင်စီရဲ့ ပထမဆုံးကျင်းပမယ့် သင်္ကြန်ပွဲ ဖြစ်ပြီး စည်ကားသိုက်မြိုက်စွာ ကျင်းပဖို့ စစ်ကောင်စီထိန်းချုပ်ရာနေရာတွေမှာ စီစဉ်ဆောင်ရွက်နေကြဆဲ ဖြစ်ပါတယ်။
စစ်ကောင်စီက မြန်မာ့ရိုးရာသင်္ကြန်ကို ဒြပ်မဲ့ယဥ်ကျေးမှု အမွေအနှစ်အဖြစ် အသိအမှတ်ပြုဖို့ ကုလသမဂ္ဂ ယူနက်စကို ကို ၂၀၂၃ ခုနှစ်၊ မတ်လက တင်ပြခဲ့ပြီး ပြီးခဲ့တဲ့နှစ် ဒီဇင်ဘာ ၂ ရက်က ၇ ရက်နေ့အထိ ကျင်းပခဲ့တဲ့ (၁၉) ကြိမ်မြောက် ကမ္ဘာ့ဒြပ်မဲ့ယဉ်ကျေးမှု အမွေအနှစ်ညီလာခံမှာ ကမ္ဘာ့ဒြပ်မဲ့ယဉ်ကျေးမှု အမွေအနှစ် စာရင်းဝင်ဖြစ်ခဲ့ပါတယ်။
ပုံစာ – စစ်ကောင်စီ ဆောက်လုပ်နေတဲ့ သင်္ကြန်မဏ္ဍပ်တွေကိုတွေ့ရစဉ်