နိုင်ငံတဝန်းငလျင်ဒဏ်ခံစားနေရချိန် တိုက်ပွဲများဖြစ်ပွားခြင်းမရှိပဲ မင်းတပ်မြို့ကို စစ်ကောင်စီ ဗုံးကြဲတိုက်ခိုက်
ချင်းပြည်၊ မင်းတပ်မြို့ကို တိုက်ပွဲများဖြစ်ပွားခြင်းမရှိပဲ စစ်ကောင်စီက မနေ့က ဧပြီ ၁ ရက်နေ့မှာ လေကြောင်းကနေ နှစ်ကြိမ် ဗုံးကြဲတိုက်ခိုက်ခဲ့တယ်လို့ မင်းတပ်မြို့ ပြည်သူ့အုပ်ချုပ်ရေးအဖွဲ့ ပြောရေးဆိုခွင်ရှိသူ ဆလိုင်းယောမာန်က CJ Platform ကိုပြောပါတယ်။
ငလျင်ဒဏ်ခံစားခဲ့ရတဲ့ ပြည်သူတွေအတွက် နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက် (The Day of National Mourning) အခမ်းအနားကျင်းပခဲ့တဲ့နေ့မှာ မင်းတပ်မြို့ကို စစ်ကောင်စီက တိုက်ပွဲဖြစ်ပွားခြင်းမရှိဘဲ ညနေ ၆ နာရီခန့်မှာ တစ်ကြိမ် ည ၁၀ နာရီခွဲခန့်မှာ တစ်ကြိမ် လေကြောင်းကနေ ဗုံးကြဲတိုက်ခိုက်ခဲ့တာလို့ သိရပါတယ်။
“အဆောက်အဦတချို့၊ လူနေအိမ် တချို့ပျက်စီးတယ်။ လူတော့ မထိခိုက်ပါဘူး။ ၁၀ နာရီခွဲမှာ ထပ်ကြဲပြန်တယ်။ ဘယ်နားလဲ မသိရသေးဘူး “ လို့ ဆလိုင်းယောမာန်က CJ Platform ကိုပြောပါတယ်။
မင်းတပ်မြို့ကို ပြည်သူတွေဝင်ရောက်နေထိုင်တာ နည်းနေသေးပြီး မြို့ပေါ်နေပြည်သူများကိုလည်း လေကြောင်းအန္တရာယ် အသိပညာပေးလုပ်ငန်းတွေ ဆောင်ရွက်ပေးထားတယ်လို့လည်း သိရပါတယ်။
စစ်ကောင်စီက ချင်းပြည်ရှိ မင်းတပ်မြို့အပြင် ကန်ပက်လက်မြို့အနီးကိုလည်း ယမန်နေ့မနက်က ဗုံးကြဲတိုက်ခိုက်ခဲ့တယ်လို့လည်း ဒေသတွင်းသတင်းတွေအရ သိရပါတယ်။
“ ပြည်သူတွေကို ကယ်ဆယ်ရေးလုပ်ပေးဖို့ အတွက်တော့ လေယာဥ်မရှိဘူး ပြည်သူတွေကို ဗုံးကြဲဖို့အတွက်တော့ လေယာဥ်ပေါတဲ့ မြန်မာနိုင်ငံ “ လို့ မင်းတပ်ဒေသခံတစ်ဦးကလည်း သူ့ရဲ့ လူမှုကွန်ရက် စာမျက်နှာမှာ ဝမ်းနည်းစွာရေးသားထားတာကို တွေ့ရပါတယ်။
အင်အားပြင်း စစ်ကိုင်းငလျင်ကြောင့် နိုင်ငံတဝန်း ထိခိုက်ပျက်ဆီးမှုများပြားပြီး အကူအညီ လိုအပ်နေတာကြောင့် တော်လှန်ရေးတပ်ဖွဲ့တွေက အပစ်ရပ်ထားချိန်မှာ စစ်ကောင်စီက လေကြောင်းတိုက်ခိုက်မှု အရှိန်မြှင့်လုပ်ဆောင်နေသလို ထိုးစစ်ဆင်တိုက်ခိုက်တာတွေလည်း လုပ်ဆောင်နေတာပဲဖြစ်ပါတယ်။
ဓာတ်ပုံ – ဆလိုင်းယောမာန်
ပုံစာ – ဧပြီလ ၁ ရက်နေ့က စစ်ကောင်စီကဗုံးကြဲလို့ ထိခိုက်ပျက်စီးခဲ့တဲ့မင်းတပ်မြို့က နေအိမ်တစ်လုံးကိုတွေ့ရစဉ်