တရုတ်နိုင်ငံ ကြက်ခြေနီအသင်း ယာဉ်တန်းကို စစ်ကောင်စီပစ်ခတ်လို့ လှည့်ပြန်ခဲ့ရ
တရုတ်နိုင်ငံကြက်ခြေနီအသင်းက ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ ယာဉ်တန်း(၉)စီးကို မနေ့ ဧပြီလ ၁ ရက်နေ့ ညနေမှာ စစ်ကောင်စီတပ်က ပစ်ခတ်ခဲ့လို့ နောက်ပြန်လှည့်ခဲ့ရတယ်လို့ တအာင်းတပ် PSLF/TNLA ရဲ့ ထုတ်ပြန်ချက်အရ သိရပါတယ်။
မန္တလေးမြို့က ငလျင်ဘေးသင့် ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ တရုတ်နိုင်ငံ ကြက်ခြေနီအသင်းက ယာဉ်တန်း(၉)စီးဟာ နောင်ချိုမြိုနယ် အုမ္မတီးကျေးရွာမှာ စစ်ကောင်စီတပ်ရဲ့ အသင့်စောင့်ဆိုင်းပစ်ခတ်ခြင်းကို ခံခဲ့ရတာဖြစ်တယ်လို့ ဆိုပါတယ်။
မန္တလေးမြို့ကို သွားရောက်ကူညီမယ့်အကြောင်းကိုလည်း စစ်ကောင်စီထံ သတင်းပေးပိုခဲ့ပြီးဖြစ်ပေမဲ့ လမ်းခရီးမှာ စစ်ကောင်စီတပ်က စက်လတ်သေနတ်နဲ့ ပစ်ခတ်ခဲ့လို့ နောင်ချိုမြို့ကို ပြည်လည်ဆုတ်ခွာ လာခဲ့ရတယ်လို့ သိရပါတယ်။
တရုတ်နိုင်ငံကြက်ခြေနီအသင်းရဲ့ ယာဉ်တန်း(၉)စီးကို တအာင်းတပ်မတော် TNLA က ကာကွယ် စောင့်ရှောက်ထားပြီး လိုရာခရီးကို ဆက်လက်ပို့ဆောင်သွားမယ်လို့လည်း ထုတ်ပြန်ထားပါတယ်။
တအာင်းတပ်မတော် TNLA ပါဝင်တဲ့ ညီနောင်မဟာမိတ် သုံးဖွဲ့ က ငလျင်နောက်ဆက်တွဲ ကယ်ဆယ်ရေးလုပ်ငန်းများ အမြန်ဆုံးဆောင်ရွက်နိုင်ဖို့ ခုခံကာကွယ်တဲ့ တုန့်ပြန်မှုမျိုးကလွဲပြီး ဧပြီလ ၃၀ ရက်နေ့အထိ တစ်လတာ တစ်ဖက်သတ် အပစ်ရပ်တယ်လို့ မနေ့က ဧပြီလ ၁ ရက်နေ့မှာ ထုတ်ပြန်ထားပါတယ်။
ဒါ့အပြင် ငလျင်ဒဏ်သင့်မြို့တွေမှာ အရေးပေါ် ကူညီကယ်ဆယ်ရေး၊ ရှာဖွေရေးလုပ်ငန်းတွေ လုပ်ဆောင်နေကြတဲ့ ပြည်တွင်း၊ ပြည်ပ ကူညီကယ်ဆယ်ရေး စေတနာ့ဝန်ထမ်းတွေ စိတ်လက် ကြည်သာစွာ လုပ်ကိုင်နိုင်ကြဖို့နဲ့ လူသားချင်းစာနာထောက်ထားမှုဆိုင်ရာ လုပ်ငန်းတွေ အမြန်ဆုံး ထိထိရောက်ရောက်ဆောင်ရွက်နိုင်ဖို့ အထူးလိုလားတယ်လို့ ထုတ်ပြန်ထားပါသေးတယ်။
အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာနက ကူညီကယ်ဆယ်ရေးလုပ်ငန်းတွေ အတွက် ငလျင်ဒဏ်သင့်တဲ့ ဒေသတွေနဲ့ ဆက်စပ်ဒေသတွေမှာ ခုခံကာကွယ်ခြင်းကလွဲပြီး စစ်အားလုံး သီတင်း ၂ ပတ်ကြာ ရပ်ဆဲမယ်လို့ ပြီးခဲ့တဲ့ မတ်လ ၃၀ ရက်နေ့က သတင်းထုတ်ပြန်ထားပါတယ်။
စစ်ကောင်စီကတော့ တိုက်ပွဲဖြစ်ပွားခြင်းမရှိတဲ့ ဒေသတွေကို ဗုံးကြဲတိုက်ခိုက်နေတဲ့အပြင် အပစ်ရပ်ထားကြတဲ့ EAOs၊ PDF နဲ့ တော်လှန်ရေးအင်အားစုတွေကို စစ်ကောင်စီအနေနဲ့ အပစ်ရပ်ထားမှာမဟုတ်ဘဲ ဆက်လက် တိုက်ခိုက်သွားမှာဖြစ်တယ်လို့ စစ်ခေါင်းဆောင်မင်းအောင်လှိုင် က မနေ့က နေပြည်တော်မှာ ပြုလုပ်တဲ့ အလှူငွေပေးပွဲမှာ ပြောခဲ့ပါတယ်။
စစ်ကောင်စီဟာ အင်အားကြီးငလျင်ဒဏ်ကြောင့် ပျက်ဆီးဆုံးရှုံးမှုများလို့ နိုင်ငံတကာအကူအညီ အရေးတကြီးတောင်းဆိုခဲ့ပြီး လာရောက်ကူညီပေးတဲ့အဖွဲ့ဖြစ်တဲ့ တရုတ်နိုင်ငံကြက်ခြေနီအသင်း ဟာ ပထမဆုံး စစ်ကောင်စီရဲ့ တိုက်ခိုက်ခြင်းခံခဲ့ရတာပဲဖြစ်ပါတယ်။
ဓာတ်ပုံ – PSLF/TNLA
ပုံစာ – တရုတ်နိုင်ငံ ကြက်ခြေနီအသင်းက မော်တော်ယာဉ်များကိုတွေ့ရစဉ်