ဗိုလ်ချုပ်ကိုလွမ်းလို့ဆိုပြီး အာဇာနည်နေ့အထိမ်းအမှတ် ရန်ကုန်မှာ စာတမ်းချိတ်ဆွဲဆန္ဒထုတ်ဖော်
၇၇ နှစ်မြောက် အာဇာနည်နေ့ဖြစ်တဲ့ ယနေ့ ဇူလိုင် ၁၉ ရက် မနက်ပိုင်းက ရန်ကုန်မြို့မှာ စစ်ကောင်စီ လုံခြုံရေးတင်းထားတဲ့ကြားမှ ဗိုလ်ချုပ်ကိုလွမ်းလို့ဆိုပြီး စမ်းချောင်းပင်မသပိတ်စစ်ကြောင်း(SC Strike)မှ စာတမ်းချိတ်ဆွဲဆန္ဒထုတ်ဖော်ခဲ့ပါတယ်။
“ဦးအောင်ဆန်းရေ အာဏာရှင်တစ်စုကြောင့် လူထုမျက်ရည်ကျနေရပြီ” ဆိုတဲ့ စာတမ်းကို ရန်ကုန်မြို့တစ်နေရာရှိ ခုံးကျော်တံတားပေါ် SC Strike က ချိတ်ဆွဲထားခဲ့တာဖြစ်ပါတယ်။
ယခုမျက်မှောက်ကာလမှာ စစ်အာဏာရှင်မင်းအောင်လှိုင်နဲ့ အပေါင်းအပါတစ်စုကြောင့် တိုင်းပြည်မှာ အဘက်ဘက်မှ ယိုယွင်းပြိုကျပျက်စီးနေပြီး ပြည်သူလူထုတစ်ရပ်လုံးမှာ အခက်အခဲအကျပ်အတည်း မျိုးစုံ ကြုံတွေ့ခံစားနေရတယ်လို့ ဆိုပါတယ်။
ယခုအခြေအနေမှာ “တိုင်းပြည်နဲ့ ပြည်သူလူထုကိုသာရှေ့တန်းတင်ပြီး ဆောင်ရွက်တတ်တဲ့ တပ်မတော်တည်ထောင်သူ ဦးအောင်ဆန်းလို ဗိုလ်ချုပ်မျိုးကို လွမ်းဆွတ်တမ်းတသောရည်ရွယ်ချက်ဖြင့်” ယခုလှုပ်ရှားမှုကို စမ်းချောင်းပင်မသပိတ်စစ်ကြောင်း(SC Strike)က ပြုလုပ်ခဲ့ခြင်းဖြစ်ပါတယ်လို့ ထုတ်ပြန်ထားပါတယ်။
ဓာတ်ပုံ – SC Strike