တောင်လှတောင်ပေါ်ရှိ စစ်ကောင်စီတပ် ဒရုန်းဖြင့် တိုက်ခိုက်ခံရပြီး ငါးဦးထက်မနည်း ထိခိုက်
စစ်ကိုင်းတိုင်း၊ ရွှေဘိုမြို့နယ် အရှေ့ခြမ်း ကုလားမရွာနှင့် လက်ကောက်ကျကျေးရွာ အနောက်ဘက် တောင်လှတောင်အပေါ်ရှိ စစ်ကောင်စီတပ်ကို မတ် ၃၁ရက် နံနက် ၁၁နာရီခန့်တွင် PDF များက ဒရုန်းဖြင့် ဗုံးသီး ကိုးလုံးချတိုက်ခိုက်ရာ ငါးဦးထက်မနည်း ထိခိုက်ဒဏ်ရာရရှိခဲ့ကြောင်း နယ်စည်းမခြားရွှေဘိုသား ( LPDF ) အဖွဲ့က ဧပြီလ ၁ရက်နေ့တွင် ထုတ်ပြန်လာသည်။
“တပ်ဆွဲထားတာတော့ကြာပြီ ခုတိုက်ခိုက်ခဲ့တာ ဒဏ်ရာ ရသွားတဲ့သူပဲများတယ် ၊ သေဆုံးသတင်းကတော့ မသိရသေးတာ” ဟု နယ်စည်းမခြားရွှေဘိုသား ( LPDF ) အဖွဲ့ တာ၀န်ရှိသူတစ်ဦးက CJ Platform သို့ ပြောသည်။
တိုက်ခိုက်မှုကြောင့် စစ်ကောင်စီတပ်သားများက လက်နက်ကြီးလက်နက်ငယ်များဖြင့် ပြန်လည်ရမ်းသန်းပစ်ခတ်ခဲ့ကြောင်း သိရသည်။
ယင်း တိုက်ခိုက်မှုကို နယ်စည်းမခြားရွှေဘိုသား(Local pdf) Fix Wings Droneတပ်ဖွဲ့နှင့်vအတူ (နတ်တောင်နဂါးပြည်သူ့ကာကွယ်ရေးတပ်ဖွဲ့ ၊ ဂဠုန်းကြီးပြည်သူ့ကာကွယ်တပ်ဖွဲ့ ၊ ရွှေဘိုသခင်ကြီး(ပြည်သူ့ကာကွယ်ရေးတပ်ဖွဲ့ ၊ ရွှေဘိုခရိုင် တပ်ရင်းအမှတ်(တပ်ရင်းအမှတ်၁၅) ၊ ကြောင်လက်သည်း(ဝက်လက်မြို့နယ် ပြည်သူ့ကာကွယ်ရေးတပ်ဖွဲ့) တို့မှ ပူးပေါင်း လုပ်ဆောင်ခဲ့ခြင်းဖြစ်ကြောင်း သိရသည်။
ယင်းစခန်းရှိ စစ်ကောင်စီတပ်သားများသည် မတ်လ ၂၅ ရက် ညနေ ၅ နာရီခန့်က ဝက်လက်မြို့နယ် အရှေ့ခြမ်း ထုံးဘိုကုန်းရွာ မြောက်ဘက်ရှိ ပြည်သူများနေအိမ်ပေါ်သို့ ဒရုန်းဖြင့် သုံးကြိမ်လာရောက်၍ ဗုံးသီး ခုနစ်လုံးချ တိုက်ခိုက်ခဲ့ကြောင်း Wetlet Informational Network ၏ ဖော်ပြချက်အရ သိရသည်။
ရုပ်သံ – နယ်စည်းမခြားရွှေဘိုသား(Local PDF)