ထောင်ကြပ်သည်ဟု အကြောင်းပြကာ မြိတ်အကျဉ်းထောင်မှ နိုင်/ကျဉ်း ၃၀၀ ခန့်အား ကော့သောင်းထောင်သို့ စစ်ကောင်စီ ပြောင်းရွေ့နေ
မြိတ်အကျဉ်းထောင်ရှိ နိုင်ငံရေးအကျဉ်းသား/အကျဉ်းသူ ၃၀၀ ခန့်အား စစ်ကောင်စီက ထောင်ကြပ်သည်ဟု အကြောင်းပြကာ ကော့သောင်းအကျဉ်းထောင်သို့ ယနေ့ ဖေဖော်ဝါရီ ၁၄ ရက် အရုဏ်ဦး အချိန်မှစတင်ကာ ပြောင်းရွေ့နေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM) ၏ တာဝန်ရှိသူ ကိုသိုက်ထွန်းဦးမှ CJ Platform သို့ ပြောသည်။
စစ်ကောင်စီ လက်အောက်ခံ စစ်သားများနှင့် ရဲများ ပူးပေါင်း၍ ယနေ့ နံနက် အစောပိုင်းမှ စတင်ကာ အသုတ်များခွဲ၍ တစ်သုတ်လျှင် နိုင်ငံရေးအကျဉ်းသား ၁၀၀ ဝန်းကျင်ဖြင့် ရေကြောင်းလမ်း အသုံးပြု၍ ကော့သောင်းအကျဉ်းထောင်သို့ လုံခြုံရေးယူကာ ပြောင်းရွေ့လျက် ရှိသည်ဟု ကိုသိုက်ထွန်းဦး၏ ပြောပြချက်အရ သိရသည်။
“သူတို့(စစ်ကောင်စီ)ဘက်ကတော့ လူကြပ်တယ်၊ ထောင်ကြပ်တယ် ဆိုတာကို အကြောင်းပြတယ်ပေါ့။ တကယ်တော့ နိုင်ငံရေးဘက်ကို လူတွေအာရုံကျနေတုန်း လုပ်ချင်တာလုပ်နေတာ။ ပထမအသုတ်တော့ အစောကြီးထွက်သွားပြီ။ ခုလေးတင် ဒုတိယ အသုတ် ထပ်ပြောင်းတယ် သိရတယ်”ဟု PPNM ၏ တာဝန်ရှိသူ ကိုသိုက်ထွန်းဦးမှ CJ Platform သို့ ပြောသည်။
လုံခြုံရေးအင်အား တောင့်တင်းစွာဖြင့် နိုင်/ကျဉ်းများကို ပြောင်းရွေ့လျက်ရှိသည့် စစ်ကောင်စီမှ မြိတ်အကျဉ်းထောင်တွင်လည်း စစ်သား နှင့် ရဲတပ်ဖွဲ့ဝင်များ ချထားကာ လုံခြုံရေး ဆက်လက်ယူလျက်ရှိပြီး ကျန်ရှိသည့် တတိယအသုတ်အား ရွေ့ပြောင်းရန် ပြင်ဆင်လျက်ရှိသည်ဟုလည်း ကိုသိုက်ထွန်းမှ ထပ်မံ ပြောကြားသည်။
“ကျွန်တော်တို့ သိထားတာက ၃၀၀ ကျော်ရွေ့မယ်လို့ သိထားတာ ။ တသုတ်မှာ ၁၀၀ နဲ့ ခုက နှစ်သုတ် ပြီးပြီဆိုတော့ ကျန် တဲ့ နောက်ဆုံး အသုတ်ကို ဘယ်တော့ ရွေ့မလဲဆိုတာ မပြောတတ်သေးပါဘူး”ဟု ၎င်းမှ ဆိုသည်။
လက်ရှိတွင် မြန်မာနိုင်ငံအတွင်း စစ်ကောင်စီ လက်အောက်ရှိ အကျဉ်းထောင်များအတွင်း နိုင်ငံရေး အကျဉ်းသား/အကျဉ်းသူများအား ထောင်တွင်း သေဆုံးသည်အထိ လူ့အခွင့်အရေး ဖိနှိပ်လျစ်လျူရှု မှုများ ပြုလုပ်သည်ဟု နာမည်ဆိုး ထွက်နေသည့် စစ်ကောင်စီသည် ပြီးခဲ့သည့် ဖေဖော်ဝါရီ ၁၀ ရက်နေ့၌ အမျိုးသမီးများပါ ပါဝင်သည့် ပြည်သူ့စစ်မှုထမ်း ဥပဒေအား ထုတ်ပြန်ခဲ့အပြီး ၎င်းဥပဒေထုတ်ပြန်ခြင်း အပေါ် လူထုအာရုံ ရောက်ရှိနေချိန်တွင် အကျဉ်းထောင်များ၌ ယခုကဲ့သို့ စိတ်တိုင်းကျ ခြယ်လှယ်မှု များ ပြုလုပ်နေခြင်းလည်း ဖြစ်သည်။