ဒေသတွင်း အန္တရာယ်ကင်းရှင်းဖို့ စစ်ကောင်စီခန့် မန်းဝန်ကြီးချုပ်က အဓိဌာန် ၁၀၈ ဖီးပွဲနဲ့ ဆုတောင်း
စစ်ကောင်စီရဲ့ မန္တလေးတိုင်းဝန်ကြီးချုပ် ဦးမျိုးအောင်က သာသနာရေး ဒုဝန်ကြီးနဲ့အတူ ဒေသတွင်းအန္တရာယ်ကင်းရှင်းစေဖို့ ကျောက်ဆည်မြို့က ရွှေသိမ်တော်ဘုရားကို ဧပြီ ၄ ရက် မနေ့က သွားရောက်ပြီး အဓိဌာန် ၁၀၈ ဖီးပွဲ ဆက်ကပ်လှူဒါန်းကာ ဆုတောင်းခဲ့တယ်လို့ ခရိုင်သဘာဝဘေးစီမံခန့်ခွဲမှု အဖွဲ့ ထုတ်ပြန်ထားချက်အရ သိရပါတယ်။
ကျောက်ဆည်မြို့ စုကြီးရပ်ကွက်ရှိ ရွှေမုဌောဘုရားမှာလည်း ဘေးအန္တရာယ်ကင်းစေဖို့ ဆုတောင်းခဲ့တဲ့အပြင် မြို့နယ်သံဃမဟာနာယက ဥက္ကဌ ဆရာတော်ကိုလည်း ဒေသတွင်း အန္တရာယ်ကင်းရှင်းစေရေး ဆုတောင်းမေတ္တာ ပို့သပေးဖို့ လျောက်ထားခဲ့ကာ လှူဖွယ်ဝတ္ထု ဆပ်ကပ်လှူဒါန်းခဲ့တယ်လို့ သိရပါတယ်။
မြို့နယ်သံဃမဟာနာယက ဥက္ကဌ ဆရာတော်အပါအဝင် သံဃာတော် ၉ ပါး မေတ္တာပို့ ပရိတ်တရားတော်များ စုကြီးရပ်ကွက်အတွင်း အန္တရာယ်ကင်းစေဖို့ လှည့်လည် ရွတ်ဖတ်ပူဇော်ကြတယ်လို့ ဆိုပါတယ်။
စုကြီးရပ်ကွက် ရွှေသာလျောင်းတောင်ပေါ်မှာတည်ရှိနေတဲ့ ကျောက်သေတ္တာခေါ် ကျောက်တုံးကြီးမှာ ငလျင်ဒဏ်ကြောင့် ပြုတ်ကျနိုင်ခြေရှိလို့ စုကြီးရပ်ကွက်အတွင်းနေထိုင်သူတွေကို ပြီးခဲ့တဲ့ ဧပြီ ၃ ရက်နေ့က နှစ်ရက်အတွင်း ပြောင်းရွှေ့နေထိုင်ကြဖို့ ဒေသအာဏာပိုင်တွေက လိုက်လံဆော်ဩခဲ့တာပါ။
ရွှေသာလျောင်းတောင်ပေါ် မှာရှင်းလင်းရေးလုပ်ငန်းများဆောင်ရွက်ကြမယ့် ကျွမ်းကျင်လုပ်သားတွေကိုလည်း အန္တရာယ်ကင်းစေရေး အထွေထွေအုပ်ချုပ်ရေး တာဝန်ရှိသူတွေက ပရိတ်ရေများ ပတ်ဖျန်းပေးခဲ့တာကိုလည်း ဖော်ပြထားတဲ့ ရုပ်သံဖိုင်ထဲတွေ့ရပါတယ်။
ကျောက်ဆည်မြို့က ထင်ရှားကျော်ကြားတဲ့ ကျောက်သေတ္တာကြီးဟာ ငလျင်ဒဏ်ကြောင့် ပျက်စီးပြုတ်ကျဖို့ ၈၀ ရာခိုင်နှုန်းခန့်ရှိတာကြောင့် စုကြီးရပ်ကွက်အတွင်းနေထိုင်သူတွေကို ဒေသအာဏာပိုင်တွေက ပြောင်းရွှေ့ခိုင်းခဲ့ပြီး ကျောက်သေတ္တာကြီးကို ဖောက်ခွဲဖျက်ဆီးဖို့ ဆောင်ရွက်သွားမှာဖြစ်တယ်လို့ သိရပါတယ်။
ဓာတ်ပုံ – ဓာတ်ပုံ – ခရိုင်သဘာဝဘေးစီမံခန့်ခွဲမှု (ကျောက်ဆည် သင်္ကြန် လှုပ်ရှားမှု)