ပျော်ဘွယ်က ငလျင်ဘေးရှောင်နေသူတချို့ ကိုယ့်အိမ်ကိုပြန်ရှင်းနေကြပြီ
အင်အား ၇ ဒသမ ၇ အဆင့်ရှိ အင်အားပြင်း ငလျင်လှုပ်ခတ်မှုကြောင့် ပျော်ဘွယ်မြို့ရှိ ပျက်စီးခဲ့တဲ့ အဆောက်အအုံတွေကို မနေ့ကစပြီး ဒေသခံတွေကိုယ်တိုင် ပြန်လည်ရှင်းလင်းနေကြပြီဖြစ်တယ်လို့ ပျော်ဘွယ်မြို့ခံတစ်ဦးရဲ့ ပြောပြချက်အရ သိရပါတယ်။
ပျော်ဘွယ်မြို့လယ်မှာရှိတဲ့ ကံဦးဘုန်းကြီးကျောင်းမှာ သွားရောက်ခိုလှုံနေကြသူတွေ မရှိသလောက် ဖြစ်သွားပြီး ကိုယ့်အိမ်ကိုယ်ပြန်ကာ ပျက်စီးသွားခဲ့တဲ့ အပျက်အစီးတွေကို ရှင်းလင်းနေကြတာလို့ သိရပါတယ်။
“ကယ်ဆယ်ရေးအဖွဲ့တွေက KBZ ဘဏ်မှာပဲရှိတော့တာ။ မြို့ခံတွေကတော့ အိမ်ပြန်ရှင်းနေကြတယ်။ ပိုက်ဆံတတ်နိုင်သူတွေကတော့ ကျေးရွာဘက်တွေက လူတွေငှားရမ်းပြီး ရှင်းလင်းနေကြတာ “ လို့ ပျော်ဘွယ်မြို့မှာ နေထိုင်သူ အမျိုးသားတစ်ဦးက CJ Platform ကိုပြောပါတယ်။
ပြီးခဲ့တဲ့ မတ်လ ၂၈ ရက်နေ့က လှုပ်ခဲ့တဲ့ အင်အားပြင်းငလျင်ကြောင့် ပျော်ဘွယ်မြို့နယ်ရှိ အဆောက်အဦ အများပြား ပြိုကျပျက်စီးခဲ့ပြီး ထိခိုက်သေဆုံးသူတွေလည်း ဒါဇင်နဲ့ချီရှိနေခဲ့တာပါ။
ပြိုကျပျက်စီးမှုတွေထဲ ပျော်ဘွယ်မြို့နယ် မြို့မဈေးနားရှိ KBZ ဘဏ်တစ်ခုလုံး ပြိုကျပျက်စီးခဲ့ရာ ဘဏ်အတွင်း ပိတ်မိနေသူ ၄၀ ကျော်ထဲ ၃ ဦးကိုသာ အသက်ရှင်လျက် ကယ်ဆယ်နိုင်ခဲ့တယ်လို့ ဒေသခံတွေဆီက သိရပါတယ်။
ပျော်ဘွယ်မြို့နယ်အတွင်း ရှာဖွေကယ်ဆယ်ရေးလုပ်ငန်းတွေ လျော့သွားပြီဖြစ်တယ်လို့ သိရှိရပြီး ဘာသာရေးအဆောက်အဦတွေ လူနေအိမ်အဆောက်အဦ တစ်ရာကျော်နဲ့ လမ်းပိုင်ပျက်စီးမှု သုံးခု ရှိခဲ့တယ်လို့ သိရပါတယ်။
ဓာတ်ပုံ – လူမှုကွန်ရက်