ရေဦးမြို့ပေါ်က ဒေသခံအမျိုးသား ၂၀ ကျော်ကို စစ်မှုထမ်းစေရန် ဖမ်းဆီးခံရ

---

_{စစ်ကိုင်းတိုင်း၊ ရေဦးမြို့ပေါ်ရှိ ရပ်ကွက် (၅)ခုမှ  အမျိုးသား ၂၀ ဦးကျော်ကို စစ်မှုထမ်းစေရန်ဟုဆိုကာ ဧပြီလ ၂၉ ရက်နေ့ ည ၉နာရီခန့်တွင်  စစ်ကောင်စီတပ်က နေအိမ်များအထိ လိုက်လံဖမ်းဆီးသွားကြောင်း ဒေသခံများက CJ Platform သို့ပြောသည်။}

 

_{ရေဦးမြို့ ရွှေပြည်သာရပ်ကွက် ၊ အောင်ချမ်းသာရပ်ကွက် ၊  အောင်မဂ်လာရပ်ကွက် ၊  ဗိုလ်အောင်ဇေယျရပ်ကွက် ၊  အောင်ဆန်းရပ်ကွက်များမှ စစ်မှုထမ်းရန် စာရင်းကောက်ယူခံထားရသည့် ပြည်သူ ၂၀ဦးကျော်ကို နေအိမ်များအတွင်းထိ ဝင်ရောက်ဖမ်းဆီးခဲ့ခြင်းဖြစ်ပြီး ရေဦးမြို့ အမှတ်(၁) အခြေခံပညာအထက်တန်းကျောင်းအတွင်းသို့ ခေါ်ဆောင်သွားကြောင်း ရေဦးမြို့နယ် အခြေပြု People’s Defence Comrade အဖွဲ့ ပြန်ကြားရေးတာဝန်ခံ ကိုထူးခန့်ဇော် (အမေ့သား) က ယမန်နေ့ ဧပြီလ ၃၀  ရက်နေ့ ညပိုင်းက CJ Platform သို့ ပြောသည်။}

 

_{” ၂၀ကျော်ဖမ်းဆီးခံလိုက်ရတယ်၊၂၀ကျော်ထဲကမှ အမျိုးသားလူငယ်လေးတွေပါသလို အိမ်ထောင်သည် အမျိုးသားတွေရော ဖမ်းခေါ်သွားတယ် ၊ စစ်မှုထမ်းဖို့ စာရင်းမှာပါထားတဲ့ သွေးစစ်ပြီးသားပြည်သူတွေကို ညတိုင်းလိုလိုပဲ ရေဦးမြို့ပေါ်မှာ နေအိမ်တံခါးတွေ ဖျက်ဆီးပီး ဖမ်းဆီးတာတွေ ဆက်တိုက်ပြုလုပ်နေတယ်” ဟု ​ကိုထူးခန့်ဇော် (အမေ့သား) က ပြောသည်။}

 

_{ဖမ်းဆီးခံရသူများကို မိသားစုဝင်များနှင့်လည်း တွေ့ခွင့်မပေးကြောင်း ၊ ယမန်နေ့ ( ဧပြီ ၃၀ ) ညမှာလည်း ရွှေပြည်သာရပ်ကွက်ရှိ  ကားနှစ်စီးနှင့် ဝင်ရောက်နေခဲ့ကာ လူငယ်များကို လိုက်လံဖမ်းဆီးလျက်ရှိနေကြောင်း ၊ မည်မျှ ဖမ်းဆီးခံရမည်ကို အတည်ပြုရန် လိုအပ်သေးကြောင်း ပြောဆိုသည်။}­­

 

_{ပြည်သူ့စစ်မှုထမ်းဥပဒေကို စတင်အသက်သွင်းခဲ့ပြီးနောက်ပိုင်း  ရေဦးမြို့ပေါ်တွင် စစ်မှုထမ်းရန် ဖမ်းဆီးခံရသူ လူငယ်များမှာ ၅၀ဦးခန့် ရှိသွားပြီဖြစ်ကြောင်း သိရသည်။}  

 

_{ရေဦးမြို့နယ်ရှိ ကျေးရွာများဘက်တွင် စစ်ကြောင်းထိုးနေခြင်းမရှိသော်လည်း ကျေးရွာနေပြည်သူလူထုသာ ကာကွယ်ရေးအဖွဲ့များ၏ စိုးမိုးမှုအောက်တွင် ရှိနေသောကြောင့် လုံခြုံနေပြီး ရေဦးမြို့ပေါ်နေပြည်သူများအတွက်  မလုံခြုံသော အခြေနေများ ရင်ဆိုင်ရနေရကြောင်း သိရသည်။}

 

_{စစ်မှုထမ်းဥပဒေအရ အပတ်စဉ် (၂) စစ်သင်တန်းအတွက် ယခင်လ ဧပြီလဆန်းပိုင်းကတည်းကပင် ရန်ကုန်၊ မန္တလေး၊ ပဲခူး၊ ဧရာဝတီတိုင်းနှင့် ကချင်ပြည်နယ်များတွင် လူငယ်များကို စာရင်းစကောက်ကြောင်း ၊ လူငယ်များကို ညပိုင်းဖမ်းဆီးခြင်းများ ရှိနေကြောင်း ၎င်းဒေသတွင်း ဒေသခံများထံက သိရသည်။}

 

_{ထို့အပြင် စစ်ကောင်စီတပ်သည်  လူငယ်များကို စာရင်းကောက်ယူနေတဲ့အပြင်  စစ်မှုထမ်းဖို့ ရှောင်လွှဲသူများကို ငွေကြေးတောင်းခံခြင်းများပါ  လုပ်နေကြောင်းသိရသည်။}

 

_{စစ်ကောင်စီသည် ဖေဖော်ဝါရီ ၁၀ ရက်နေ့တွင် လူတိုင်း စစ်မှုထမ်းဥပဒေကို ထုတ်ပြန်ပြီးနောက် မတ် ၂၉ ရက်မှ စတင်ကာ သင်တန်းကျောင်း ၁၅ ကျောင်းတွင်  ပထမအကြိမ် စစ်မှုထမ်းသင်တန်းကို စတင်ဖွင့်လှစ်ခဲ့သည်။}

 

_{ဓာတ်ပုံ- pro-SCA}

 

_{ပုံစာညွှန်း  – တကန (ဟိုပုံး)ရှိ  စစ်မှုထမ်း သင်တန်းဖွင့်လှစ်သော အခမ်းအနား}