စင်္ကာပူမှာ ၂၀၂၀ ခုနှစ်နောက်ပိုင်း အလုပ်ထုတ်ခံရမှု စံချိန်တင်မြင့်တက်လာတာက မြန်မာလုပ်သားတွေအတွက် ထိခိုက်နိုင်လား
မြန်မာနိုင်ငံသား အများစု သွားရောက် အလုပ်လုပ်ကိုင်နေတဲ့ စင်္ကာပူနိုင်ငံမှာ ၂၀၂၆ ဒုတိယသုံးလပတ်အတွင်း အလုပ်ထုတ်ခံရသူ ၄,၆၂၀ ဦးအထိ ရှိလာနေတယ်လို့ ingapore Ministry of Manpower (MOM) ရဲ့ အချက်အလက်တွေအရ သိရပါတယ်။
ဒါဟာ ၂၀၂၀ စတုတ္ထသုံးလပတ်နောက်ပိုင်း အမြင့်ဆုံးအဆင့်ကို ရောက်လာပါတယ်။ တစ်ဖက်မှာလည်း အလုပ်အကိုင်နေရာလွတ်တွေ လျော့ကျလာတာကြောင့် စင်္ကာပူမှာ အလုပ်လုပ်နေတဲ့ မြန်မာနိုင်ငံသားတွေအနေနဲ့ အလုပ်အကိုင်ဈေးကွက် အပြောင်းအလဲတွေကို ပိုပြီးသတိထားဖို့ လိုလာပါတယ်။
စင်္ကာပူ လူအင်အားဝန်ကြီးဌာန (MOM) ရဲ့ စက်တင်ဘာ ၂၁ ရက် ထုတ်ပြန်ချက်အရ ၂၀၂၆ ပထမသုံးလပတ်မှာ အလုပ်ထုတ်ခံရသူ ၃,၈၃၀ ဦးရှိခဲ့ရာက ဒုတိယသုံးလပတ်မှာ ၄,၆၂၀ ဦးအထိ တိုးလာပါတယ်။ အလုပ်သမား ၁,၀၀၀ ဦးမှာ အလုပ်ထုတ်ခံရသူနှုန်းကလည်း ၁ ဒသမ ၆ ဦးကနေ ၂ ဦးအထိ မြင့်တက်လာပါတယ်။
အလုပ်ထုတ်မှုတွေဟာ အဓိကအားဖြင့် ကုန်ထုတ်လုပ်ရေး၊ သတင်းအချက်အလက်နဲ့ ဆက်သွယ်ရေးနည်းပညာ၊ ဘဏ္ဍာရေးဝန်ဆောင်မှု စတဲ့ နိုင်ငံတကာဈေးကွက်နဲ့ ဆက်စပ်တဲ့ကဏ္ဍတွေမှာ ဖြစ်ခဲ့ပြီး လုပ်ငန်းပြန်လည်ဖွဲ့စည်းတာနဲ့ လုပ်ငန်းပုံစံပြောင်းလဲတာတွေက အဓိကအကြောင်းရင်းဖြစ်ပါတယ်။
အလုပ်ထုတ်ခံရသူတွေ တိုးလာချိန်မှာ စင်္ကာပူနိုင်ငံရဲ့ အလုပ်အကိုင်နေရာလွတ်လည်း မတ်လကုန်က ၇၃,၃၀၀ ကနေ ဇွန်လကုန်မှာ ၆၈,၆၀၀ အထိ လျော့ကျလာပါတယ်။
အထူးသဖြင့် ဘဏ္ဍာရေးဝန်ဆောင်မှုနဲ့ သတင်းအချက်အလက်နဲ့ ဆက်သွယ်ရေးကဏ္ဍတွေမှာ Professional, Managerial, Executive and Technician (PMET) အလုပ်အကိုင်နေရာလွတ်တွေ လျော့ကျလာတာ ဖြစ်ပါတယ်။ ဒါပေမယ့် အလုပ်လက်မဲ့တစ်ဦးအတွက် အလုပ်အကိုင်နေရာလွတ် ၁ ဒသမ ၄၈ ခု ရှိနေသေးတာကြောင့် အလုပ်အကိုင်အခွင့်အလမ်းတွေက လုံးဝပျောက်ကွယ်သွားတာတော့ မဟုတ်ဘူးလို့ လေ့လာသူတွေက သုံးသပ်ကြပါတယ်။
အလုပ်ထုတ်ခံရပြီး ခြောက်လအတွင်း အလုပ်ပြန်ရရှိတဲ့ စင်္ကာပူနိုင်ငံသားနဲ့ အမြဲတမ်းနေထိုင်ခွင့်ရှိသူတွေရဲ့ အချိုးဟာ ၂၀၂၆ ပထမသုံးလပတ်မှာ ၆၀ ဒသမ ၇ ရာခိုင်နှုန်းရှိခဲ့ရာက ဒုတိယသုံးလပတ်မှာ ၅၄ ဒသမ ၉ ရာခိုင်နှုန်းအထိ ကျဆင်းလာခဲ့ပါတယ်။
MOM က ဒီအချက်ဟာ အလုပ်ထုတ်ခံရသူတွေ အလုပ်သစ်ရဖို့ အရင်ထက် အချိန်ပိုယူလာတာကို ပြသတယ်လို့ ဖော်ပြထားပါတယ်။ ဒါပေမယ့် ၁၂ လအတွင်း အလုပ်ပြန်ရရှိတဲ့နှုန်းကတော့ ၆၉ ဒသမ ၄ ရာခိုင်နှုန်းကနေ ၆၉ ဒသမ ၈ ရာခိုင်နှုန်းအထိ အနည်းငယ်မြင့်တက်ထားပါတယ်။
စင်္ကာပူအလုပ်သမားဈေးကွက်မှာ အလုပ်ထုတ်ခံရမှုတွေ တိုးလာပေမယ့် နိုင်ငံခြားသားအလုပ်အကိုင်ကတော့ ဒုတိယသုံးလပတ်အတွင်း ၉,၂၀၀ ဦး တိုးလာပါတယ်။
ဒီတိုးတက်မှုဟာ အဓိကအားဖြင့် ဆောက်လုပ်ရေးနဲ့ ကုန်ထုတ်လုပ်ရေးကဏ္ဍတွေမှာ Work Permit ကိုင်ဆောင်ထားတဲ့ နိုင်ငံခြားသားအလုပ်သမားတွေ တိုးလာတာကြောင့် ဖြစ်ပါတယ်။ စင်္ကာပူရဲ့ စုစုပေါင်းအလုပ်အကိုင်ကလည်း ဒုတိယသုံးလပတ်မှာ ၁၁,၄၀၀ ဦး တိုးလာပြီး ၂၀၂၁ စတုတ္ထသုံးလပတ်ကစပြီး ၁၉ ကြိမ်ဆက်တိုက် တိုးလာခဲ့ပါတယ်။
ဒါကြောင့် လက်ရှိအချက်အလက်တွေအရ “စင်္ကာပူမှာ နိုင်ငံခြားသားအလုပ်သမားတွေအတွက် အလုပ်အကိုင်ကျဆင်းနေပြီ” လို့ တစ်ခုတည်းသော ကောက်ချက်ချလို့မရသေးပေမယ့် ကဏ္ဍအလိုက် အခြေအနေကွာခြားနေပြီး ဆောက်လုပ်ရေးနဲ့ ကုန်ထုတ်လုပ်ရေးမှာ Work Permit ကိုင်ဆောင်သူတွေ တိုးလာချိန်မှာ ဘဏ္ဍာရေး၊ နည်းပညာနဲ့ ကုန်ထုတ်လုပ်ရေးကဏ္ဍအချို့မှာ လုပ်ငန်းပြန်လည်ဖွဲ့စည်းမှုကြောင့် အလုပ်ထုတ်မှုတွေ မြင့်တက်လာတာ ဖြစ်ပါတယ်။
MOM ရဲ့ နောက်ဆုံးအစီရင်ခံစာမှာ မြန်မာနိုင်ငံသားအလိုက် အလုပ်ထုတ်ခံရသူ အရေအတွက်ကို သီးခြားဖော်ပြထားခြင်းမရှိတာကြောင့် မြန်မာအလုပ်သမားတွေ ဘယ်လောက်အထိ ထိခိုက်နေတယ်ဆိုတာကို လက်ရှိကိန်းဂဏန်းတွေနဲ့ တိုက်ရိုက်တွက်ချက်လို့ မရသေးပါဘူး။
ဒါပေမယ့် စင်္ကာပူမှာ အလုပ်လုပ်နေတဲ့ မြန်မာနိုင်ငံသားတွေအနေနဲ့ ကိုယ်လုပ်နေတဲ့ကဏ္ဍရဲ့ အလုပ်အကိုင်အခြေအနေ၊ အလုပ်ရှင်ရဲ့ လုပ်ငန်းပြန်လည်ဖွဲ့စည်းမှု၊ Work Permit အခြေအနေနဲ့ လစာ/အလုပ်သမားအခွင့်အရေးဆိုင်ရာ စည်းမျဉ်းတွေကို ပိုမိုဂရုစိုက်ဖို့ လိုလာပါတယ်။
အထူးသဖြင့် အလုပ်အကိုင်ပြောင်းလဲဖို့ လိုလာတဲ့အခြေအနေမျိုး ဖြစ်လာရင် တရားဝင်အလုပ်အကိုင်လမ်းကြောင်းနဲ့ Work Permit စည်းမျဉ်းတွေကို သေချာစစ်ဆေးပြီးမှ ဆုံးဖြတ်ဖို့ လိုပါတယ်။
လက်ရှိမှာ စင်္ကာပူအလုပ်သမားဈေးကွက်ဟာ အလုပ်အကိုင်စုစုပေါင်း ဆက်လက်တိုးလာနေပြီး အလုပ်လက်မဲ့နှုန်းလည်း ၁ ဒသမ ၉ ရာခိုင်နှုန်းနဲ့ နိမ့်နေဆဲဖြစ်ပါတယ်။ ဒါပေမယ့် အလုပ်ထုတ်ခံရမှု မြင့်တက်လာတာ၊ အလုပ်အကိုင်နေရာလွတ် လျော့ကျလာတာနဲ့ အလုပ်သစ်ပြန်ရဖို့ အချိန်ပိုယူလာတာတွေက အလုပ်သမားဈေးကွက်အခြေအနေဟာ ကဏ္ဍအချို့မှာ ပိုမိုတင်းကျပ်လာနေတဲ့ လက္ခဏာတွေ ဖြစ်ပါတယ်။
Ref – Singapore Ministry of Manpower (MOM), CNA, The Straits Times
ဓာတ်ပုံ – စင်္ကာပူရောက်မြန်မာများ