ဘူးသီးတောင်မှာ ULA/AA နဲ့ ပြည်သူတွေ ပူးပေါင်းပြီး ပြည်သူ့အကျိုးပြုလုပ်ငန်းတွေ ဆောင်ရွက်
ရခိုင်ပြည်၊ ဘူးသီးတောင်မြို့နယ်အတွင်း ဒေသဖွံ့ဖြိုးတိုးတက်ရေးနဲ့ ပြည်သူတွေရဲ့ လူနေမှုဘဝ အဆင်ပြေချောမွေ့စေရေးကို ရည်ရွယ်ပြီး ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) နဲ့ ဒေသခံပြည်သူတွေ ပူးပေါင်းကာ တံတားပြုပြင်တာနဲ့ ပြည်သူ့အကျိုးပြုလုပ်ငန်းတွေကို ဆောင်ရွက်နေကြတယ်လို့ ဒေသခံတွေဆီက သိရပါတယ်။
ဘူးသီးတောင်မြို့နယ်၊ သဇင်မြေကျေးရွာ၊ ဂူတာပြင်ကျေးရွာ၊ သိနတောင်ပြင်၊ ညောင်ချောင်းနဲ့ လောင်းချောင်းကျေးရွာတွေမှာ ပျက်စီးနေတဲ့ တံတားတစ်စင်းကို AA တပ်ဖွဲ့ဝင်တွေနဲ့ ဒေသခံကျေးရွာသားတွေ ပူးပေါင်းပြီး ပြုပြင်မွမ်းမံခဲ့မှုတွေ လုပ်ဆောင်ခဲ့တယ်လို့ သိရပါတယ်။
အဲဒီ တံတားဟာ ကျေးရွာအချင်းချင်း ဆက်သွယ်သွားလာရေးနဲ့ ဒေသခံပြည်သူတွေရဲ့ နေ့စဉ်လူမှုစီးပွားရေးလုပ်ငန်းတွေအတွက် အရေးပါတဲ့ အခြေခံအဆောက်အအုံတစ်ခုဖြစ်ပြီး၊ ပျက်စီးနေမှုကြောင့် သွားလာရေး အခက်အခဲတွေ ကြုံတွေ့နေရသဖြင့် ပြန်လည်ပြုပြင် ဆောင်ရွက်ခဲ့ခြင်းဖြစ်တယ်လို့ သိရပါတယ်။
ဒါ့အပြင် ဘူးသီးတောင်မြို့နယ်၊ ဘုရားပြင်အောင်ပကျေးရွာမှာ ULA/AA တာဝန်ရှိသူတွေက ဒေသခံကျေးရွာသားတွေနဲ့ တွေ့ဆုံကာ ဒေသဖွံ့ဖြိုးရေး၊ လူမှုစည်းလုံးညီညွတ်ရေးနဲ့ ပြည်သူတွေကြား ပူးပေါင်းဆောင်ရွက်ရေးဆိုင်ရာ ကိစ္စရပ်တွေကို ဆွေးနွေးခဲ့ကြသေးတယ်လို့ ဒေသခံတွေက ပြောပါတယ်။
“တံတားပျက်စီးနေတဲ့အတွက် သွားလာရေးအခက်အခဲတွေ ရှိခဲ့ပေမယ့် အခုလို ULA/AA နဲ့ ဒေသခံပြည်သူတွေ ပူးပေါင်းပြီး ပြုပြင်ပေးလိုက်တဲ့အတွက် အဆင်ပြေသွားပါတယ်။ ကျန်းမာရေးစောင့်ရှောက်မှုတွေလည်း လာရောက်ဆောင်ရွက်ပေးတဲ့အတွက် ကျေးရွာသားတွေအတွက် များစွာအကျိုးရှိပါတယ်” လို့ လောင်းချောင်းကျေးရွာမှ ဒေသခံတစ်ဦးက ပြောပါတယ်။
ပြီးခဲ့တဲ့ရက်ပိုင်းအတွင်းကလည်း ကျောက်စာတိုင်ကျေးရွာနဲ့ ဂူတာပြင်ကျေးရွာတို့ကို ဆက်သွယ်ထားတဲ့ ရွာချင်းဆက်လမ်းနဲ့ ပျဉ်အမျိုးအစား တံတားသစ်တည်ဆောက်ရေး လုပ်ငန်းတွေကို AA နဲ့ ဒေသခံတွေ စုပေါင်းဆောင်ရွက်ခဲ့ကြပြီး၊ ကျေးရွာအချင်းချင်း သွားလာရေးနဲ့ ကုန်စည်စီးဆင်းမှု ပိုမိုလွယ်ကူစေဖို့ ရည်ရွယ်ထားတယ်လို့ သိရပါတယ်။
ဒေသခံပြည်သူတွေရဲ့ လူနေမှုဘဝ တိုးတက်ကောင်းမွန်လာစေရေးနဲ့ ဒေသဖွံ့ဖြိုးတိုးတက်ရေးအတွက် ULA/AA နဲ့ ပြည်သူတွေ ပူးပေါင်းဆောင်ရွက်တဲ့ အလားတူ ပြည်သူ့အကျိုးပြုလုပ်ငန်းတွေကို ဆက်လက်အကောင်အထည်ဖော် ဆောင်ရွက်သွားမယ်လို့ သိရပါတယ်။