လွယ်ဂျယ်မြို့မှ ကျပ်သိန်း ၅၃ သောင်းကျော်ကို KIA ဘဏ္ဍာငွေအဖြစ်သိမ်းဆည်း
ကချင်ပြည်၊ လွယ်ဂျယ်မြို့သိမ်းတိုက်ပွဲအတွင်းမှရရှိသော ကျပ်သိန်းပေါင်း ၅၃ သောင်းကျော်ကို ကချင်လွတ်လပ်ရေးတပ်မတော်(KIA)က ဘဏ္ဍာငွေအဖြစ်သိမ်းဆည်းလိုက်ကြောင်း ဒုတိယ ဗိုလ်ချုပ်ကြီး ဂွမ်မော်က ထုတ်ပြောသည်။
သတ်မှတ်စည်းမျဉ်းများအတိုင်း လွယ်ဂျယ်မြို့မှရရှိသော ကျပ် ၅,၃၅၈,၂၀၀,၀၀၀ ကို တပ်မဟာ ၃ တပ်မမှူးက အရှေ့ပိုင်းတိုင်းဘဏ္ဍာရေးဌာနသို့ စာရင်းသွင်းပေးအပ်ထားပြီးဖြစ်ကြောင်း ၎င်းထုတ်ပြန်ချက်တွင် ဖော်ပြထားသည်။
KIO ဘဏ္ဍာရေးဌာန၏ စည်းမျဉ်းအမှတ် ၆၄ အရ သိမ်းဆည်းလိုက်ခြင်းဖြစ်သည်ဟု ဒုတိယ ဗိုလ်ချုပ်ကြီး ဂွမ်မော်က ဆိုသည်။
မြန်မာ-တရုတ်နယ်စပ်ကုန်သွယ်ရေးမြို့ဖြစ်သော လွယ်ဂျယ်မြို့ရှိ နောက်ဆုံးကျန်ခဲ့သည့် စစ်ကောင်စီတပ်ဖွဲ့ဝင်များနှင့် Non-CDM ဝန်ထမ်းများအားလုံး ဧပြီလ ၈ ရက်နေ့ ညပိုင်း၌ တရုတ်နိုင်ငံဘက်သို့ ထွက်ခွာသွားပြီးနောက် ဧပြီလ ၉ ရက်နေ့တွင် KIA တပ်ဖွဲ့ဝင်များက မြေပြင်ရှင်းလင်းရေးပြုလုပ်စဉ် ခလရ ၁၄၂ တပ်စခန်းအတွင်းမှ ယင်းငွေများကို သိမ်းဆည်းရမိခဲ့ခြင်းဖြစ်သည်။
အဆိုပါနယ်စပ်မြို့ကို မတ်လ ၂၈ ရက်က စတင်ပိတ်ဆို့တိုက်ခိုက်ခဲ့ပြီးနောက် ၁၃ ရက်အကြာ ဧပြီ ၉ ရက်နေ့တွင် KIA က အပြီးသတ်သိမ်းပိုက်နိုင်ခဲ့သည်။
ဓာတ်ပုံ – ဒုတိယ ဗိုလ်ချုပ်ကြီး ဂွမ်မော်လူမှုကွန်ရက်အကောင့်