ငလျင်ကြောင့် တော်လှန်ရေးအင်အားစုတွေ အပစ်ရပ်ပေမဲ့ ဆက်လက် တိုက်ခိုက်သွားမယ်လို့ စစ်ခေါင်းဆောင်ပြော
ငလျင်ဒဏ်သင့်ဒေသတွေမှာ အရေးပေါ် ကူညီကယ်ဆယ်ရေးနဲ့ ရှာဖွေရေးလုပ်ငန်းတွေကို ပြည်တွင်းပြည်ပက စေတနာ့ဝန်ထမ်းတွေ လုပ်ဆောင်နေကြတဲ့အချိန်မှာ အပစ်ရပ်ထားကြတဲ့ EAOs၊ PDF နဲ့ တော်လှန်ရေးအင်အားစုတွေကို စစ်ကောင်စီအနေနဲ့ အပစ်ရပ်ထားမှာမဟုတ်ဘဲ ဆက်လက် တိုက်ခိုက်သွားမှာဖြစ်တယ်လို့ နေပြည်တော်မှာ မနေ့က ပြုလုပ်ခဲ့တဲ့ အလှူငွေပေးအပ်ပွဲမှာ အာဏာသိမ်း စစ်ခေါင်းဆောင်က ပြောကြားလိုက်ပါတယ်။
တိုင်းရင်းသား လက်နက်ကိုင်အဖွဲ့တွေအနေနဲ့ လက်ရှိမှာ တိုက်ပွဲဖော်ဆောင်တာတွေ မရှိပေမဲ့ စုဖွဲ့ခြင်း၊ လေ့ကျင့်ခြင်းတွေ လုပ်ဆောင်နေကြတာကြောင့် လိုအပ်တဲ့ ကာကွယ်ရေးဆိုင်ရာ လုပ်ငန်းတွေကို ဆက်လက်ဆောင်ရွက်သွားမှာ ဖြစ်တယ်လို့ ဆိုပါတယ်။
“လက်နက်ကိုင်အဖွဲ့များအနေဖြင့် ငြိမ်းချမ်းရေးလမ်းစဉ်များအတိုင်း အမှန်တကယ်လိုက်နာ ဆောင်ရွက်သွားကြရန် လိုကြောင်း အကြမ်းဖက်သမားများအနေဖြင့် နိုင်ငံရေးအရဖြစ်ပေါ်လာတဲ့ ပြသနာကို အကြမ်းဖက်တဲ့နည်းလမ်းဖြင့်ရွေးချယ်ဖြေရှင်းခဲ့ကြခြင်းဖြစ်ပြီး မိမိတို့အနေဖြင့် ချမှတ်ထားတဲ့ လုပ်ငန်းစဉ်များအတိုင်း ဆက်လက်ဆောင်ရွက်သွားမှာဖြစ်တယ်” လို့ စစ်ကောင်စီခေါင်းဆောင်က ပြောခဲ့ပါတယ်။
ဒါ့အပြင် ငလျင်ဘေးဒဏ်ကြောင့် လက်နက်ကိုင်တပ်ဖွဲ့ဝင်များအနေနဲ့ အပစ်အခတ်ရပ်စဲမယ်လို့ ထုတ်ပြန်ထားတာကို တွေ့ရှိရတယ်လို့လည်း ငလျင်ဘေးဒဏ်ခံစားနေရချိန် လေကြောင်းက ဗုံးကြဲနေတဲ့ စစ်ကောင်စီတပ်ခေါင်းဆောင်က ဆိုပါတယ်။
လက်ရှိမှာ စစ်ကောင်စီအနေနဲ့ တိုက်ပွဲများဖြစ်ပွားခြင်းမရှိဘဲ တိုင်းရင်းသားဒေသတွေနဲ့ တော်လှန်ရေးတပ်ဖွဲ့တွေ ထိန်းချုပ်ထားရာနေရာတွေကို လေကြောင်းကနေ ဗုံးကြဲတိုက်ခိုက်တာ ဒရုန်းအသုံးပြုပြီး ဗုံးကြဲတိုက်ခိုက်တာ လက်နက်ကြီးများနဲ့ ပစ်ခတ်တိုက်ခိုက်တာတွေ လုပ်ဆောင်နေတဲ့အပြင် ထိုးစစ်ဆင် တိုက်ခိုက်တာတွေကိုပါ လုပ်ဆောင်နေဆဲဖြစ်ပါတယ်။
ငလျင်ဒဏ်သင့်တဲ့ ဒေသတွေနဲ့ ဆက်စပ်ဒေသတွေမှာ ခုခံကာကွယ်တဲ့ စစ်ကလွဲပြီး စစ်အားလုံး သီတင်း ၂ ပတ်ကြာ ရပ်စဲမယ်လို့ အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာနက ပြီးခဲ့တဲ့ မတ်လ ၃၀ ရက်နေ့က သတင်းထုတ်ပြန်ထားပါတယ်။
ညီနောင်မဟာမိတ် သုံးဖွဲ့ဖြစ်တဲ့ ကိုးကန့်တပ် MNDAA၊ တအာင်းတပ် TNLA နဲ့ အာရက္ခတပ်တော် AA တို့က ခုခံကာကွယ်သည့်တုန့်ပြန်မှုမျိုးကလွဲလို့ ဧပြီလ ၃၀ ရက်နေ့အထိ တစ်လတာ အပစ်ရပ်တယ်လို့ မနေ့က ဧပြီလ ၁ ရက်နေ့မှာ ထုတ်ပြန်ထားပါတယ်။
ဓာတ်ပုံ- pro-SAC
ပုံစာ – နေပြည်တော်မှာ မနေ့က ပြုလုပ်ခဲ့တဲ့ အလှူငွေပေးပွဲမှာမိန့်ခွန်းပြောကြားနေတဲ့ အာဏာသိမ်း စစ်ခေါင်းဆောင်