ကောလင်းမှာ စစ်ဘေးရှောင်တွေ သောက်သုံးရေ အခက်အခဲဖြစ်နေပြီး ကူညီသူမရှိ ဖြစ်နေ
စစ်ကိုင်းတိုင်း ကောလင်းမြို့နယ်မှာရှိတဲ့ စစ်ဘေးရှောင်တွေဟာ နွေဦးရာသီ ရောက်လာတာနဲ့အမျှ သောက်သုံးရေရှားပါးလာပြီး ရေလှူဒါန်းမယ့်သူ မရှိတာကြောင့် သောက်သုံးရေအတွက် များစွာ အခက်အခဲ ဖြစ်နေတယ်လို့ ဒေသခံတွေရဲ့ ပြောပြချက်အရ သိရပါတယ်။
ကုန်ဈေးနှုန်းကြီးမြင့်မှုဒဏ်နဲ့ ကုန်စည်ပြတ်လပ်မှုတွေ ဖြစ်ပေါ်နေတာကြောင့်လည်း သောက်သုံးရေအပါအဝင် စားဝတ်နေရေး အခက်အခဲတွေရှိနေတယ်လို့ သိရပါတယ်။
“ သောက်သုံးရေကတော့ အဓိက ပိုကျပါတယ်။ သွားခပ်ရတာကလည်းဝေးတယ်။ အရင်က ရေအလှူအတွက် ကားနဲ့လှူတာတွေရှိပေမဲ့ ဒီနှစ်မှာ ကားအခက်အခဲကြောင့် မလှူကြဘူး” လို့ ဒေသခံ အမျိုးသားတစ်ဦးက CJ Platform ကိုပြောပါတယ်။
ဒေသခံတွေဟာ သောက်သုံးရေ ရရှိနိုင်ဖို့ အတွက် ၂ မိုင် ၃ မိုင်လောက် သွားရောက်ရေခပ်ယူနေရပြီး ဒီနှစ်မှာ ရေအလှူကားမလာနိုင်တာကြောင့် အခက်အခဲများစွာကြုံတွေနေရပြီး ရောဂါပိုးတွေ ဝင်လာမှာကိုလည်း စိုးရိမ်နေကြတယ်လို့ သိရပါတယ်။
ကောလင်းက စစ်ဘေးရှောင်တွေကို ပြည်သူမှပြည်သူသို့ စစ်ဘေးရှောင်ကူညီရေးအဖွဲ့က အခြေခံ စားသောက်ကုန် တချို့ လှူဒါန်းပေးနေတာတွေရှိပေမဲ့ သောက်သုံးရေလှူဒါန်းမှုတော့ မရှိဘူးလို့ သိရပါတယ်။
“ ကျွန်တော်တို့ အဖွဲ့အနေနဲ့ ရန်ပုံငွေရော ကားရောအဆင်မပြေတာကြောင့် ရေလှူနိုင်ဖို့ အခက်အခဲဖြစ်နေတာ” လို့ စစ်ဘေးရှောင်အရေးကူညီနေသူ ကိုသဲကြီးက CJ Platform ကိုပြောပါတယ်။
တစ်စီးထဲသာရှိတဲ့ ရေသယ်ယူနိုင်တဲ့ကားကလည်း မြို့တစ်ဖက်ခြမ်းမှာရှိနေတာဖြစ်ပြီး ပြန်ခေါ်နိုင်ဖို့အတွက် အခက်အခဲတချို့ ရှိနေသေးတယ်လို့ လည်းသိရပါတယ်။
လက်ရှိမှာ စစ်ဘေးရှောင်တွေအနေနဲ့ ဝေးလံတဲ့နေရာကို သောက်သုံးရေအတွက် မိမိအစီအစဉ်နဲ့သာ သွားရောက် သယ်ယူနေရပြီး ရေလာရောက်လှူဒါန်းမှာကို မျှော်လင့်နေကြပါတယ်။
ဓာတ်ပုံ – ပေးပို့
ပုံစာ – ကောလင်းမြို့နယ်အတွင်း ရေလှူဒါန်းနေတဲ့ ရေကားကိုတွေ့ရစဉ်