စစ်အုပ်စု သိမ်းယူထားတယ်လို့ ဝါဒဖြန့်ထားတဲ့ အယ်လ်ဖာဘိလပ်မြေစက်ရုံ အနီးဝန်းကျင်မှာ တိုက်ပွဲပြင်းထန်နေဆဲလို့ ဆို
မန္တလေးတိုင်း၊ ပုသိမ်ကြီးမြို့နယ်၊ အောင်သပြေကျေးရွာအနီးက အယ်လ်ဖာဘိလပ်မြေစက်ရုံကို စစ်အုပ်စုက ပြန်လည်သိမ်းယူထားနိုင်ပြီလို့ ဝါဒဖြန့်ထုတ်ပြန်ထားပေမယ့် မြေပြင်မှာ တိုက်ပွဲပြင်းထန်နေဆဲဖြစ်တယ်လို့ မြေပြင်တော်လှန်ရေးတပ်ဖွဲ့တွေနဲ့ နီးစပ်တဲ့ စစ်ရေးသတင်းရင်းမြစ်တစ်ဦးက CJ Platform ကို ပြောပါတယ်။
မန္တလေးပြည်သူ့ကာကွယ်ရေးတပ်မတော် (MDY PDF) နဲ့ ပူးပေါင်းတပ်တွေ ၂၀၂၄ ဇူလိုင်လနဲ့ ဩဂုတ်လ ဆန်းပိုင်းမှာ သိမ်းယူခဲ့တဲ့ အယ်လ်ဖာဘိလပ်မြေစက်ရုံနဲ့ ဖယောင်းတောင်ရွှေတွင်းနေရာတွေကို စစ်အုပ်စုက ပြန်လည်သိမ်းယူနိုင်ခဲ့တယ်လို့ ဒီနေ့ ဩဂုတ် ၂၉ ရက် စစ်ကော်မရှင်ဝါဒဖြန့် သတင်းစာမှာ ဖော်ပြထားပါတယ်။
ဘိလပ်မြေစက်ရုံနဲ့ ဖယောင်းတောင်ကို စစ်အုပ်စုက ပြန်လည်သိမ်းယူနိုင်တယ်လို့ ဝါဒဖြန့်ထုတ်ပြန်ထားပေမယ့် ဘိလပ်မြေစက်ရုံ အနီးတစ်ဝိုက်မှာ နှစ်ဖက်တိုက်ပွဲ ပြင်းထန်နေတယ်လို့ စစ်ရေးသတင်းရင်းမြစ်တစ်ဦးက CJ Platform ကို ပြောပါတယ်။
“လက်ရှိက ဘိလပ်မြေစက်ရုံတစ်ဝိုက်မှာ တိုက်ပွဲဖြစ်နေတုန်းပဲ။ ဘိလပ်မြေစက်ရုံက တိုက်ပွဲဇုန်နေရာ ဖြစ်သွားတာ။ ကျွန်တော်တို့ဘက်က တပ်တွေက ဖယောင်းတောင်ကနေ ခွာစစ်နဲ့ ပြန်ဆုတ်လာရင်း အခု ဘိလပ်မြေစက်ရုံနေရာမှာ တိုက်ပွဲဆက်ဖြစ်နေတာ” လို့ စစ်ရေးသတင်းရင်းမြစ်က CJ Platform ကို ပြောပါတယ်။
အယ်လ်ဖာဘိလပ်မြေစက်ရုံနဲ့ ဖယောင်းတောင်ရွှေတွင်းနေရာဟာ ၄ မိုင်ကျော်ခန့်သာ ကွာဝေးပြီး ပုသိမ်ကြီးမြို့နယ်နဲ့ မတ္တရာမြို့နယ် အစပ်မှာ ရှိနေတာလည်း ဖြစ်ပါတယ်။ အယ်လ်ဖာဘိလပ်မြေစက်ရုံဟာ တရုတ်ကုမ္ပဏီနဲ့ ဖက်စပ်လုပ်ကိုင်နေတဲ့ လုပ်ငန်းတစ်ခုဖြစ်ပြီး ဖယောင်းတောင်ရွှေတွင်းကတော့ စစ်ကောင်စီ (အခု စစ်ကော်မရှင်) ခန့် မန္တလေးတိုင်းဝန်ကြီးချုပ်ဟောင်း ဦးမောင်ကို ပိုင်ဆိုင်တဲ့ အကြီးစားသတ္တုတူးဖော်ရေး လုပ်ငန်းတစ်ခုလည်း ဖြစ်ပါတယ်။
ပြီးခဲ့တဲ့ ဇူလိုင်လ ကုန်ပိုင်းကလည်း အယ်လ်ဖာဘိလပ်မြေစက်ရုံနဲ့ ၄ မိုင်ခန့်သာ ဝေးတဲ့ ပုသိမ်ကြီးမြို့နယ်ထဲက သရက်ကိုင်းရွာနဲ့ မြကန်သာရွာတို့မှာ အခြေချတပ်စွဲထားတဲ့ စစ်အုပ်စုတပ်စခန်းတွေကို MDY PDF နဲ့ မဟာမိတ်တပ်ဖွဲ့တွေက ဝင်ရောက်တိုက်ခိုက်ခဲ့ပြီး လက်နက်ခဲယမ်းတွေကို သိမ်းယူနိုင်ခဲ့ပါသေးတယ်။
ပုသိမ်ကြီးမြို့နယ်နဲ့ ကပ်လျက်ရှိနေတဲ့ မတ္တရာမြို့မှာလည်း နှစ်ဖက်တိုက်ပွဲ ပြင်းထန်နေပြီး MDY PDF ထိန်းချုပ်သိမ်းယူခဲ့တဲ့ သပိတ်ကျင်းမြို့ကို စစ်အုပ်စုက ပြီးခဲ့တဲ့ ဇူလိုင်လအတွင်းမှာ ပြန်လည်သိမ်းယူခဲ့ပါသေးတယ်။
ဓာတ်ပုံ – MDY PDF
ပုံစာ – အယ်လ်ဖာဘိလပ်မြေစက်ရုံကို စစ်အုပ်စုမှ မီးရှို့ဖျက်ဆီးထားပုံ (ပုံဟောင်း)