စစ်ဘေးရှောင်တွေကို အလုပ်လုပ်ခွင့်ပေးလို့ ထိုင်းဘုရင်နဲ့ အစိုးရကို ကျေးဇူးတင်ကြောင်း NUG စာပို့
ထိုင်း-မြန်မာနယ်စပ်မှာ ရှိတဲ့ မြန်မာစစ်ဘေးရှောင်တွေကို တရားဝင် အလုပ်လုပ်ခွင့်ပေးတာကြောင့် ထိုင်းဘုရင်နဲ့ ထိုင်းအစိုးရကို ကျေးဇူးတင်ကြောင်း ဩဂုတ်လ ၂၇ ရက်နေ့က ပေးပို့ခဲ့တယ်လို့ အမျိုးသားညီညွတ်ရေးအစိုးရ၊ နိုင်ငံခြားရေးဝန်ကြီးဌာနက ဒီကနေ့မှာ ထုတ်ပြန်ထားပါတယ်။
ယာယီခိုလှုံရေးစခန်းတွေမှာ နေထိုင်နေတဲ့ မြန်မာစစ်ဘေးရှောင်တွေကို တရားဝင် အလုပ်လုပ်ခွင့် ပေးလိုက်တာကြောင့် မြန်မာပြည်သူတွေ ကိုယ်စား ကျေးဇူးတင်တယ်လို့ နိုင်ငံခြားရေးဝန်ကြီး ဒေါ်ဇင်မာအောင်က ပေးပို့ခဲ့တာပဲ ဖြစ်ပါတယ်။
ဒါ့အပြင် မြန်မာရွှေ့ပြောင်းအလုပ်သမားတွေ၊ စစ်ဘေးရှောင်တွေအတွက် လိုအပ်တဲ့ လူသားချင်းစာနာထောက်ထားမှုဆိုင်ရာ အကူအညီတွေကို NUG အနေနဲ့ ထိုင်းအစိုးရနဲ့အတူ လက်တွဲဆောင်ရွက်ဖို့ အသင့်ရှိနေတယ်လို့လည်း အသိပေးထားပါတယ်။
ထိုင်းအစိုးရက ထိုင်း-မြန်မာနယ်စပ်တလျှောက် ၁၀ စုနှစ်များစွာ ယာယီခိုလှုံနေထိုင်ခဲ့ကြတဲ့ မြန်မာဒုက္ခသည်တွေအတွက် နိုင်ငံအတွင်း တရားဝင် အလုပ်လုပ်ကိုင်ခွင့် စီမံချက်တစ်ခုကို ပြီးခဲ့တဲ့ ဩဂုတ်လ ၂၆ ရက်နေ့က ခွင့်ပြုခဲ့တာပဲ ဖြစ်ပါတယ်။
ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး-UNHCR က ဒီလို ထိုင်းအစိုးရရဲ့ မူဝါဒအပြောင်းအလဲဟာ စစ်ဘေးရှောင်ဒုက္ခသည်တွေသာမက ထိုင်းနိုင်ငံအတွက်ပါ အကျိုးရှိစေတာကြောင့် ကြိုဆိုတယ်လို့ ဆိုထားပါတယ်။
ဓာတ်ပုံ – Plan Asia
ပုံစာ – ထိုင်း-မြန်မာနယ်စပ်တစ်နေရာရှိ ဒုက္ခသည်စခန်းတစ်ခုကို မြင်ရပုံ (ပုံဟောင်း)