စစ်တွေက DMG သတင်းဌာနရုံးကို စစ်ကောင်စီတပ်သားများဝင်စီး၊ သတင်းသမား ၁ ဦးနှင့် ရုံးစောင့် ၁ ဦး ဖမ်းဆီးခံရ
ရခိုင်ပြည်နယ်၊ စစ်တွေမြို့နယ် အခြေစိုက် Development Media Group(DMG)သတင်းဌာန ရုံးချုပ်ကို စစ်ကောင်စီ တပ်ဖွဲ့ဝင်များက ဝင်ရောက်စီးနင်းခဲ့ပြီး သတင်းထောက် ၁ ဦးနှင့် ရုံးစောင့် ၁ ဦးကို ဖမ်းဆီးခံရကြောင်း DMG ကထုတ်ပြန်သည်။
ယမန်နေ့ အောက်တိုဘာ ၂၉ ရက် မွန်းလွဲ ၁၂ နာရီခန့်က စစ်ကောင်စီ လက်အောက်ခံ စသုံးလုံး၊ SB အထူးသတင်း တပ်ဖွဲ့၊ ရဲတပ်ဖွဲ့နှင့် စစ်သား ၂၀ ဦးခန့်ပါ ကား ၃ စီးဖြင့် လာရောက်ခဲ့ပြီး ရုံးသုံးကင်မရာ၊ ကွန်ပျူတာများကို သိမ်းဆည်းသွားသည့်အပြင် သတင်းဌာနရုံးချုပ်ကိုလည်း ချိတ်ပိတ်သွားခဲ့ကြောင်း DMG က ဆိုသည်။
လတ်တလော စစ်ကောင်စီက ဖမ်းဆီးသွားသည့် DMG သတင်းထောက်နှင့် ညစောင့်တို့ကို စစ်တွေမြို့ အမှတ်(၁) ရဲစခန်းတွင် ဖမ်းဆီးထိန်းသိမ်းထားပြီး ဖမ်းဆီးသည့် အကြောင်းအရင်းကို တိတိကျကျမသိရသေးကြောင်း DMG က ဆိုသည်။
ရခိုင်ပြည်၊ စစ်တွေမြို့အခြေစိုက် DMG သတင်းဌာနသည် မြန်မာ့ရေးရာ၊ နိုင်ငံတကာရေးရာတို့အပါအဝင် ရခိုင်ပြည်အရေးကိစ္စများနှင့်ပတ်သက်ပြီး စစ်ရေး၊ နိုင်ငံရေး၊ စီးပွားရေး၊ လူမှုရေး၊ ဖွံ့ဖြိုးတိုးတက်ရေး၊ တရားမျှတရေးနှင့် လူ့အခွင့်အရေးချိုးဖောက်မှုများကို ဘက်လိုက်မှုမရှိဘဲ ရေးသားတင်ပြနေသော အမှီအခိုကင်းသည့် သတင်းဌာနတစ်ခုဖြစ်၍ ယခုလုပ်ရပ်ကို DMG အနေဖြင့် ပြင်းပြင်းထန်ထန် ရှုတ်ချကြောင်း ထုတ်ပြန်ကြေညာထားသည်။
မြန်မာနိုင်ငံအတွင်း သတင်းသမားများသည် လုံခြုံမှုကင်းမဲ့နေပြီး စစ်ကောင်စီ၏ ပစ်မှတ်ထား ဖမ်းဆီးထောင်ချခြင်းများ ကျူးလွန်ခံနေရသည်။