တောပုရွာ ပျူစခန်းအား ဒေသခံ PDF များမှ လက်နက်ကြီးများဖြင့် တိုက်ခိုက် စစ်ကောင်စီဘက်မှ အထိအခိုက်ရှိနိုင်
စစ်ကိုင်းတိုင်း၊ မုံရွာမြို့နယ် တောပုရွာ ပျူစခန်းကို ဒေသခံ PDF များမှ လက်နက်ကြီးများဖြင့် တိုက်ခိုက်ခဲ့ခြင်းကြောင့် စစ်ကောင်စီဘက်မှ အထိအခိုက်ရှိနိုင်ကြောင်း မုံရွာသံမဏိတပ်ရင်း၊ တပ်ခွဲ-၇၏ တပ်ခွဲမှူး ဗိုလ်နွေဦးက CJ Platform သို့ ပြောကြားသည်။
အဆိုပါ တိုက်ပွဲအား ဖေဖော်ဝါရီ ၂ ရက် ညပိုင်းတွင် ဖော်ဆောင်ခဲ့ခြင်းဖြစ်သော်လည်း မြေပြင်အခြေအနေအရ ယနေ့တွင်သာ ထုတ်ပြန်ခြင်းဖြစ်ကြောင်းလည်း သိရသည်။
“လက်နက်ကြီး ဆယ်ချက်ကျော်လောက်နဲ့ တောပုရွာကို ပစ်ခတ်ခဲ့တာဗျ၊ အဲ့ကောင်တွေဘက်က နှစ်ယောက်လောက်သေတယ်။ သူတို့တွေပြန်ပြီးတော့ တောင်မပစ်ခတ်ဘူး” ဟု ဗိုလ်နွေဦးက ပြောကြားသည်။
PDF ပူးပေါင်းတပ်ဖွဲ့များသည် တောပုရွာပျူစခန်းကို ၆၀ မမ လက်နက်ကြီးများဖြင့်ပစ်ခတ်တိုက်ခိုက်ခဲ့ခြင်းဖြစ် ကာ အဆိုပါပစ်ခတ်မှုသည် စစ်ကောင်စီတပ်များအနီး ကျရောက်ပေါက်ကွဲခဲ့ခြင်း ဖြစ်ကြောင်းလည်း ယင်းက ဆိုသည်။
စစ်ဆင်ရေးဖော်ဆောင်ခဲ့သည့် ပူးပေါင်းတပ်ဖွဲ့များအနေဖြင့် အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းလည်း သိရသည်။
အထက်ပါ စစ်ဆင်ရေးအား မုံရွာခရိုင် သံမဏိတပ်ရင်း-၂၅ ChindwinMyay Division တပ်ခွဲ-၇၊ Federal Democratic Revolution Force၊ စွန်ရဲပျောက်ကျားတပ်ဖွဲ့ နှင့် MRDA တပ်ရင်း-၆ တပ်ခွဲ ၁နှင့်၂ တို့ ပူးပေါင်းဆောင်ရွက်ခဲ့ခြင်း ဖြစ်သည်။
ဓာတ်ပုံ – ChindwinMyay Division
Website Link: https://cjplatform.com/
Telegram Link: https://t.me/cjplatform
YouTube Link: https://www.youtube.com/@cjplatform
Twitter Link: https://twitter.com/CjPlatform
#CjPlatform #မုံရွာမြို့ #တောပုရွာ #ပျူစခန်း #ဗိုလ်နွေဦး