စံချိန်အသစ်တွေ ရေးထိုးဖို့ ကစားကြမယ့် လီယွန်နယ်မက်ဆီရဲ့ အာဂျင်တီးနား နဲ့ အမ်ဘာပေရဲ့ ပြင်သစ်တို့ရဲ့ အုပ်စုပွဲစဉ်များ
အာဂျင်တီးနား vs ဩစတြီးယား
၂၀၂၆ ကမ္ဘာ့ဖလား အုပ်စု (J) ရဲ့ အရေးပါတဲ့ ပွဲစဉ်တစ်ပွဲဖြစ်တဲ့ အာဂျင်တီးနားအသင်းနဲ့ ဩစတြီးယားအသင်းတို့ရဲ့ ထိပ်တိုက်တွေ့ဆုံမှုဟာ ပရိသတ်တွေအတွက် စိတ်ဝင်စားစရာ အကောင်းဆုံးပွဲတွေထဲက တစ်ပွဲဖြစ်လာဖို့ ရှိနေပါတယ်။ နှစ်သင်းစလုံး အဖွင့်ပွဲစဉ်တွေမှာ အနိုင်ရရှိထားတာကြောင့် ဒီပွဲရဲ့ အနိုင်ရလဒ်ဟာ အုပ်စုဗိုလ်နေရာနဲ့ ရှုံးထွက်အဆင့် တက်ရောက်ရေးအတွက် အလွန်အရေးကြီးလာမှာပဲ ဖြစ်ပါတယ်။
လက်ရှိချန်ပီယံ အာဂျင်တီးနားကတော့ အယ်လ်ဂျီးရီးယားအသင်းကို (၃-၀) ဂိုးနဲ့ အနိုင်ရရှိခဲ့တဲ့ပွဲမှာ လီယွန်နယ် မက်ဆီရဲ့ ဟက်ထရစ်စွမ်းဆောင်ရည်ကြောင့် ယုံကြည်မှုအပြည့်နဲ့ ကစားလာမှာပဲ ဖြစ်ပါတယ်။ အသက် (၃၉) နှစ်အရွယ် ရှိပြီဖြစ်ပေမဲ့ မက်ဆီရဲ့ ဘောလုံးဉာဏ်၊ နေရာယူမှုနဲ့ အဆုံးသတ်နိုင်စွမ်းတွေက ကမ္ဘာ့အဆင့် ထိပ်တန်းအနေအထားကို ဆက်လက်ထိန်းသိမ်းထားဆဲဖြစ်ကြောင်း သက်သေပြနိုင်ခဲ့တာပဲ ဖြစ်ပါတယ်။
ဒီညပွဲမှာ မက်ဆီအတွက် နောက်ထပ် မှတ်တမ်းတစ်ခုလည်း စောင့်ကြိုလို့နေပါတယ်။ အဲဒါကတော့ သူဟာ ကမ္ဘာ့ဖလား သွင်းဂိုး ၁၆ ဂိုးနဲ့ ပူးတွဲရပ်တည်နေတဲ့ ကလိုဆေးရဲ့ စံချိန်ကို ချိုးဖြတ်သွားနိုင်မလားဆိုတာပဲ ဖြစ်ပါတယ်။ ဒီပွဲမှာ မက်ဆီအနေနဲ့ နောက်ထပ် တစ်ဂိုးသာ သွင်းယူနိုင်မယ်ဆိုရင် ကမ္ဘာ့ဖလား သမိုင်းတစ်လျှောက် ဂိုးအများဆုံး သွင်းယူသူအဖြစ် တစ်ဦးတည်း ရပ်တည်နိုင်မှာ ဖြစ်ပါတယ်။ ဒါကြောင့် ဒီညပွဲရဲ့ မီးမောင်းထိုးပြသခြင်း ခံရမယ့်သူကလည်း မက်ဆီပဲ ဖြစ်နေဦးမှာပဲ ဖြစ်ပါတယ်။
ဒါပေမဲ့ ဩစတြီးယားကို အလွယ်တကူ လျှော့တွက်လို့တော့ မရပါဘူး။ သူတို့ဟာ ဂျော်ဒန်အသင်းကို (၃-၁) ဂိုးနဲ့ အနိုင်ရရှိထားပြီး၊ နောက်ပိုင်းပွဲတွေမှာလည်း ခံစစ်ပိုင်း မာကျောမှုကို ပြသထားနိုင်ခဲ့ကာ နည်းပြ ရာ့ဖ်ရန်းနစ်ရဲ့ High Pressing (အဆီးအတားမြှင့်) ကစားပုံက အာဂျင်တီးနားရဲ့ Build-up (အောက်ခြေမှကစားကွက်တည်ဆောက်မှု) ကို ဖိအားပေးနိုင်သလို တန်ပြန်တိုက်စစ်တွေကလည်း အန္တရာယ်ပေးနိုင်တာကတော့ အမှန်တရားပဲ ဖြစ်ပါတယ်။
နည်းစနစ်ပိုင်းအရ ကြည့်မယ်ဆိုရင် အာဂျင်တီးနားဟာ ဘောလုံးပိုင်ဆိုင်မှုကို ထိန်းချုပ်ပြီး မက်ဆီ၊ အန်ဇို ဖာနန်ဒက်ဇ်၊ ဒီပေါလ်တို့ကတစ်ဆင့် ဂိမ်းကို စီမံဖို့ ကြိုးစားမှာဖြစ်ကာ၊ ဩစတြီးယားကတော့ တန်ပြန်တိုက်စစ်ကစားပုံနဲ့ ပြေးအားကို အသုံးချပြီး အာဂျင်တီးနား ခံစစ်နောက်တန်း နေရာစုံကို တိုက်ခိုက်ဖို့ ကြိုးစားလာနိုင်တာပဲ ဖြစ်ပါတယ်။
ဩစတြီးယားက ခက်ခဲတဲ့ ပြိုင်ဘက်ဖြစ်ပေမဲ့ လက်ရှိခြေစွမ်း၊ အတွေ့အကြုံနဲ့ မက်ဆီရဲ့ ဦးဆောင်နိုင်စွမ်းကို ထည့်တွက်မယ်ဆိုရင် အာဂျင်တီးနားဘက်က အသာရနေဆဲဖြစ်ကာ၊ ဒီညမှာလည်း မက်ဆီဟာ သမိုင်းမှတ်တိုင်သစ်တစ်ခုကို အာဂျင်တီးနားအသင်းနဲ့အတူ ရေးထိုးသွားနိုင်မယ်လို့ ထင်မြင်မိပါတယ်။
ပြင်သစ် vs အီရတ်
၂၀၂၆ ကမ္ဘာ့ဖလား အုပ်စု (I) ပွဲစဉ်မှာတော့ ပြင်သစ်အသင်းနဲ့ အီရတ်အသင်းတို့ ထိပ်တိုက်တွေ့ဆုံကြတော့မှာဖြစ်ပြီး၊ လက်ရှိကမ္ဘာ့ဖလားပြိုင်ပွဲရဲ့ အင်အားအကြီးဆုံး အသင်းတစ်သင်းဖြစ်တဲ့ ပြင်သစ်အတွက် အုပ်စုဗိုလ်နေရာကို ပိုမိုခိုင်မာစေမယ့် အခွင့်အရေးကောင်းတစ်ခုလည်း ဖြစ်ပါတယ်။ အဖွင့်ပွဲမှာ ဆီနီဂေါအသင်းကို ၃-၁ ဂိုးနဲ့ အနိုင်ရခဲ့တဲ့ ပြင်သစ်ဟာ တိုက်စစ်ပိုင်းရော ကွင်းလယ်ထိန်းချုပ်မှုပါ အားကောင်းနေဆဲဖြစ်ကြောင်း ပြသနိုင်ခဲ့ပါတယ်။ ဒီဒီယာ ဒက်ရှ်ရွမ့်ရဲ့ အသင်းဟာ ဘောလုံးပိုင်ဆိုင်မှု၊ အရှိန်မြင့်တိုက်စစ်နဲ့ ကစားသမားတစ်ဦးချင်း အရည်အသွေးပိုင်းမှာ အီရတ်ထက် သိသိသာသာ အသာရနေတာပဲ ဖြစ်ပါတယ်။
ဒီပွဲရဲ့ အဓိက စောင့်ကြည့်ရမယ့်သူကတော့ ကပ္ပတိန် ကီလီယန် အမ်ဘာပေပဲ ဖြစ်ပါတယ်။ အသက်အရွယ်အရ အထွတ်အထိပ်ကာလကို ရောက်ရှိနေတဲ့ အမ်ဘာပေဟာ ပြင်သစ်အသင်းရဲ့ တိုက်စစ်မှာ ဦးဆောင်သူတစ်ယောက် ဖြစ်လာနေသလို၊ ပွဲအလှည့်အပြောင်းကို တစ်ယောက်တည်း ဖန်တီးနိုင်တဲ့ ကစားသမားမျိုးလည်း ဖြစ်ပါတယ်။ သူ့ရဲ့ အမြန်နှုန်း၊ တစ်ယောက်ချင်း ကျော်ဖြတ်နိုင်စွမ်းနဲ့ ဂိုးသွင်းအဆုံးသတ်နိုင်မှုတွေက အီရတ်ခံစစ်အတွက် အကြီးမားဆုံး စိန်ခေါ်မှု ဖြစ်လာမှာပဲ ဖြစ်ပါတယ်။
အထူးသဖြင့် အမ်ဘာပေဟာ ကမ္ဘာ့ဖလားစင်မြင့်မှာ အမြဲတမ်း ခြေစွမ်းပြလေ့ရှိတဲ့ ကစားသမားဖြစ်ပြီး၊ အသင်းလိုအပ်တဲ့အချိန်တိုင်း ဦးဆောင်ပေးနိုင်သူတစ်ယောက်လည်း ဖြစ်ပါတယ်။ ဒီညပွဲမှာလည်း သူ့ရဲ့ တစ်ကိုယ်တော်ထိုးဖောက်မှုတွေ၊ ဘယ်တောင်ပံကနေ ဝင်ရောက်ဖန်တီးမှုတွေက ပြင်သစ်တိုက်စစ်ရဲ့ အဓိက အသက်သွေးကြောပဲ ဖြစ်ပါတယ်။
အီရတ်ကတော့ နော်ဝေအသင်းကို ၄-၁ ဂိုးနဲ့ ရှုံးနိမ့်ထားတာကြောင့် ဒီပွဲမှာ အမှတ်ရဖို့အတွက် ခံစစ်ကို အဓိကထားပြီး တန်ပြန်တိုက်စစ်နဲ့ ကစားလာနိုင်ပါတယ်။ ဒါပေမဲ့ ပြင်သစ်ရဲ့ ကွင်းလယ်ဖိအားပေးနိုင်စွမ်းနဲ့ တိုက်စစ်အရည်အသွေးကို ကြည့်ရင် ပွဲကို ထိန်းချုပ်နိုင်မယ့်အသင်းက ပြင်သစ်ပဲ ဖြစ်လာဖို့ များနေတာပဲ ဖြစ်ပါတယ်။
နည်းစနစ်ပိုင်းအရ ပြင်သစ်က 4-3-3 ပုံစံနဲ့ ဘောလုံးပိုင်ဆိုင်မှုကို အခြေခံပြီး ကစားလာဖို့ များသလို၊ အမ်ဘာပေကို ဗဟိုပြုတဲ့ တိုက်စစ်လှုပ်ရှားမှုတွေကို မြင်တွေ့ရဖို့ ရှိနေပါတယ်။ အီရတ်ကတော့ နေရာလွတ်တွေကို ပိတ်ဆို့ပြီး ခံစစ်ကျစ်ကျစ်လစ်လစ် ကစားဖို့ ကြိုးစားမှာဖြစ်ပေမဲ့၊ မိနစ် ၉၀ လုံး ဖိအားကို တောင့်ခံနိုင်ဖို့ ခက်ခဲလွန်းတာကြောင့် ပြင်သစ်တို့ အနိုင်ရသွားမလားဆိုတာထက် ဂိုးဘယ်နှစ်ဂိုးနဲ့ နိုင်မလဲဆိုတာကိုပဲ စောင့်ကြည့်ရမယ့် ပွဲစဉ်တစ်ပွဲ ဖြစ်လာမယ်လို့ ထင်မြင်မိပါတယ်။