ထိုင်းနိုင်ငံ၊ ဆီရာချာမြို့က ယာဉ်တိုက်မှုအတွင်း မြန်မာအလုပ်သမား ၁၈ ဦး ထိခိုက်ဒဏ်ရာရ
ထိုင်းနိုင်ငံ၊ ချွန်ဘူရီခရိုင်၊ ဆီရာချာမြို့ (Si Racha) အဝေးပြေးလမ်းမပေါ်မှာ မြန်မာအလုပ်သမား ၁၈ ဦးကို တင်ဆောင်လာတဲ့ကားနဲ့ ကွန်တိန်နာယာဉ်တို့ တိုက်မိမှုဖြစ်ပွားခဲ့ပြီး မြန်မာအလုပ်သမားတွေ ထိခိုက်ဒဏ်ရာရရှိခဲ့တယ်လို့ ထိုင်းသတင်းဌာန MGR Online က ဖော်ပြထားပါတယ်။
ယာဉ်တိုက်မှုဟာ ဒီနေ့ ဖေဖော်ဝါရီ ၇ ရက်၊ မနက်ပိုင်းက ဖြစ်ပွားခဲ့တာဖြစ်ပြီး မြန်မာအလုပ်သမားတွေကို တင်ဆောင်လာတဲ့ Isuzu ပစ်ကပ်ကားဟာ အဝေးပြေးလမ်းမပေါ်မှာ ရုတ်တရက် ယာဉ်ကြောပြောင်းမောင်းနှင်ခဲ့တာကြောင့် နောက်မှာပါလာတဲ့ ကွန်တိန်နာယာဉ်နဲ့ တိုက်မိမှု ဖြစ်ပွားခဲ့တာလည်း ဖြစ်ပါတယ်။
ယာဉ်တိုက်မှုအတွင်း ပစ်ကပ်ကားပေါ်ပါလာတဲ့ မြန်မာအလုပ်သမား အမျိုးသား ၁၀ ဦးနဲ့ အမျိုးသမီး ၈ ဦးတို့ ထိခိုက်ဒဏ်ရာရရှိခဲ့ပြီး Pure Wyang Tai Sriracha လူမှုကူညီကယ်ဆယ်ရေးအသင်းက နီးစပ်ရာဆေးရုံကို ပို့ဆောင်ပေးခဲ့တယ်လို့ သိရပါတယ်။
ဒါ့အပြင် အဝေးပြေးလမ်းမပေါ် ဆင့်ကဲယာဉ်တိုက်မှုအတွင်း ကွန်တိန်နာယာဉ် အရှေ့မျက်နှာစာ ထိခိုက်ပျက်စီးခဲ့သလို ပစ်ကပ်ကားကနေတဆင့် ရှေ့မှာရှိနေတဲ့ အနက်ရောင် Mazda ကားတစ်စီး၊ ငွေရောင်တိုယိုတာ ပစ်ကပ်ကားတစ်စီးတို့ကို ထပ်မံတိုက်မိခဲ့တာကြောင့် စုစုပေါင်း ကား ၄ စီး ထိခိုက်ပျက်စီးမှု ရှိခဲ့ပါတယ်။
မြန်မာအလုပ်သမားတွေ တင်ဆောင်လာတဲ့ ပစ်ကပ်ကားမောင်းသူ အသက် ၃၁ နှစ်အရွယ် ထိုင်းနိုင်ငံသား မစ္စတာ ပွန်နာရောင် (Mr. Pornnarong Putthet) ကို နောင်ခမ်း (Nong Kham) ရဲစခန်းက ဖမ်းဆီးထိန်းသိမ်းထားပြီး ဥပဒေအရ အရေးယူမှုတွေ ဆက်လက်လုပ်ဆောင်သွားမယ်လို့ သိရပါတယ်။
ဓာတ်ပုံ – MGR Online