ပြန်/ဆက် ဝန်ထမ်းများ ဦးဆောင်သည့် ဝါဒဖြန့်ချိရေး အကောင့်တုကွန်ရက်
စစ်ကောင်စီ ပြန်ကြားရေးနှင့်ပြည်သူ့ဆက်ဆံရေးဦးစီးဌာန (ပြန်/ဆက်) က တိုက်ရိုက်ကွပ်ကဲတဲ့ “IPRD MEDIA RESPONSE GROUP” အမည်ပေးထားတဲ့ အဖွဲ့တွေဟာ တိုင်းနှင့်ပြည်နယ်အလိုက် လှုပ်ရှားနေပါတယ်။ သူတို့ရဲ့ အဓိကတာဝန်က လွတ်လပ်တဲ့ သတင်းဌာနတွေရဲ့ သတင်းတွေအောက်မှာ အကောင့်တု (Fake Accounts) များစွာကို အသုံးပြုပြီး စစ်ကောင်စီရဲ့ လုပ်ရပ်တွေ မှန်ကန်ကြောင်း၊ ဝန်ထမ်းတွေရဲ့ သစ္စာရှိမှုကို ချီးကျူးကြောင်းနဲ့ နိုင်ငံရေးအရ အတိုက်အခံတွေကို ရှုတ်ချတဲ့ ကွန်မန့်တွေကို အစုလိုက်အပြုံလိုက် ဝင်ရောက်ရေးသားဖို့ပဲ ဖြစ်ပါတယ်။
CJ Platform က လက်ခံရရှိထားတဲ့ ပဲခူးတိုင်း IPRD Media Response Group ရဲ့ ဇွန်လ လကုန်ပိုင်း အစီရင်ခံစာတစ်ခုမှာဆိုရင် ဝါဒဖြန့်စစ်ဆင်ရေးရဲ့ လှုပ်ရှားမှုပုံစံကို ပိုမိုမြင်သာစေခဲ့ပါတယ်။ အစီရင်ခံစာအရ၊ DVB သတင်းဌာနမှာ တင်ထားတဲ့ “ဒေါ်အောင်ဆန်းစုကြည် မွေးနေ့ဆုတောင်းပို့စ်တင်သည့် MRTV ဝန်ထမ်းကို စစ်ကောင်စီ ဖမ်းဆီး” ဆိုတဲ့ သတင်းအောက်မှာဝင်ရောက်ရေးသားခဲ့တဲ့ အခြေအနေကိုတွေ့ရပါတယ်။ (ပုံ ၂ တွင် ကြည့်နိုင်ပါသည်။)
အစီရင်ခံစာမှာ မှတ်ချက် ၇ ခု ရေးသားခဲ့ကြောင်းဖော်ပြထားပြီး CJ Platform ရဲ့ ဆက်လက် စုံစမ်းဖော်ထုတ်မှုအရ၊ ပြန်/ဆက် ဝန်ထမ်း ၃ ဦးနဲ့ ဆက်စပ်နေတဲ့ ဝါဒဖြန့်ချိရေး အကောင့် ၇၀ ကျော်ကိုတွေ့ရပါတယ်။ (ပုံ ၃ တွင် ကြည့်နိုင်ပါသည်။ တွေ့ရှိရသည့် Accounts Link များကို စုစည်းထားသည့် Excel ဖိုင်ကို CJ Platform ရဲ့ Website နှင့် Telegram တွင် ရယူနိုင်ပါသည်။)
အဲ့ဒီအကောင့်တုတွေဟာ “ဝန်ထမ်းတစ်ဦးသည် နိုင်ငံရေးနှင့် ကင်းရှင်းရမည်” ဆိုတဲ့ ရည်ရွယ်ချက်ကိုဦးတည်ပြီး ဒေါ်အောင်ဆန်းစုကြည်ကို မွေးနေ့ဆုတောင်းခြင်းသည် မှားယွင်းကြောင်းနဲ့ အရေးယူမှုသည် မှန်ကန်ကြောင်း အဓိပ္ပာယ်ရတဲ့ ကွန်မန့်တွေ ဝင်ရောက်ရေးသားခဲ့ကြပါတယ်။ (ပုံ ၄ တွင်ကြည့်နိုင်ပါသည်)
အကောင့်တွေကို “ပန်းအမည်များ၊ မောင်မောင်၊ ပြည်မြန်မာ” ကဲ့သို့သော လူသုံးများတဲ့ အမည်တွေကို အသုံးပြုပြီး ပရိုဖိုင်ပုံများအဖြစ် ပန်းပုံ၊ ရှုခင်းပုံများကို ထားရှိကြပါတယ်။ ဒါ့အပြင် အဲ့ဒီ အကောင့်တုတွေနဲ့ ချိတ်ဆက်နေတဲ့ ပြန်/ဆက် အရာရှိသုံးဦးရဲ့ အကောင်တွေကိုလည်း တွေ့ရှိရပါတယ်။ (ပုံ ၃ တွင် ကြည့်နိုင်ပါသည်)
ပြန်/ဆက် ရဲ့ ဝါဒဖြန့်တပ်ဖွဲ့ဟာ နိုင်ငံရေး၊ ရွေးကောက်ပွဲနဲ့ ဝန်ထမ်းရေးရာလို အကြောင်းအရာတွေကိုသာ အဓိက ကိုင်တွယ်ပါတယ်။ စစ်ရေးနဲ့ လက်နက်ကိုင်တပ်ဖွဲ့တွေနဲံပတ်သက်ပြီး ဝါဒဖြန် တိုက်ခိုက်တာမှာတော့ စစ်တပ်တံဆိပ်၊ စစ်သူကြီးပုံတွေကို အသုံးပြပြီး ပရိုဖိုင်ကိုပိတ်ထား (Profile Locked)တဲ့ သီးခြားအကောင့်တုတွေအသုံးပြုပြီး ဝါဒဖြန့်ကြတာကိုတွေ့ရပါတယ်။
မကြာသေးမီ ရက်ပိုင်းကလည်း Myanmar Now သတင်းဌာနရဲ့ သတင်းဆောင်းပါးမှာ “မီဒီယာဖွံဖြိုးတိုးတက်ရေးဦးစီးဌာန” ရဲ့ ညွှန်ကြားရေးမှူးချုပ် ဖြစ်သူ ဒေါ်သီတာတင် က ဦးဆောင်ပြီး နေ့စားခ ၆၈၀၀ကျပ်နဲ့ ဝန်ထမ်းတွေခန့်ကာ ဝါဒဖြန့် Comment စစ်ဆင်ရေးလုပ်နေတယ်လို့ ဖော်ထုတ်ရေးသားထားပါတယ်။
ဒါဟာ လွတ်လပ်သော သတင်းမီဒီယာတွေရဲ့ ဖေ့စ်ဘွတ်ခ်စာမျက်နှာများပေါ်မှာ မြင်တွေ့နေရတဲ့ စစ်ကော်မရှင်နဲ့ စစ်အုပ်စုကို ထောက်ခံအားပေးနေတယ့် ကွန်မန့် (Comment) တွေဟာ ပြည်သူ့အသံ အစစ်အမှန်မဟုတ်ဘူးဆိုတာကို ပြသနေတာပါ။
ဒီလိုစနစ်တကျ ဝါဒဖြန့် ယန္တရားအနေနဲ့ Facebook မှာလုပ်ရှားနေတာဟာ Facebook က သူ့ရဲ့ မူဝါဒါအရ ကန့်သတ်ထားတဲ့ Coordinated Inauthentic Behavior (CIB – စနစ်တကျ ပူးပေါင်းဆောင်ရွက်ပြီး အစစ်အမှန်မဟုတ်သော အပြုအမူ) ပဲဖြစ်ပါတယ်။ ယခင်က မြန်စစ်တပ်က အခုလိုဝါဒဖြန့်ချိခဲ့တဲ့ အကောင်တွေကို Facebook က ဖော်ထုတ်ပြီး ဖြုတ်ချခဲ့ဖူးပါတယ်။ ဒါပေမယ့် အာဏာ သိမ်းပြီးနောက်မပိုင်းပေါ့ Facebook အခုလို စုံစမ်းဖော်ထုတ်ပြီး ဖြုတ်ချခဲ့တဲ့ အခြေအနေတွေ နည်းပါးသွားပါတယ်။