ငလျင်ကြောင့် ထိခိုက်မှုများပြားတဲ့ မန္တလေးမှာ စစ်ကောင်စီက ပိတ်သိမ်းထားတဲ့ ပုဂ္ဂလိက ဆေးရုံတွေကို လက်ရှိချိန်ထိ ပြန်ဖွင့်ခွင့်မပေး
နှစ်ပေါင်း ၁၈၆နှစ်အတွင်း အဆိုးဝါးဆုံးဖြစ်ခဲ့တဲ့ ငလျင်သဘာဝဘေးကို အဓိက ကြုံတွေ့ခဲ့ရတဲ့ မန္တလေးမြို့မှာ ထိခိုက်သေဆုံးသူတွေ များပြားလွန်းနေပေမဲ့ စစ်ကောင်စီက ပိတ်သိမ်းထားတဲ့ ပုဂ္ဂလိက ဆေးရုံတွေကို လက်ရှိအချိန်ထိ ပြန်ဖွင့်ခွင့် မပေးသေးဘူးလို့ ဒေသခံ သူနာပြုဆရာမတွေဆီက သိရပါတယ်။
စစ်ကောင်စီဟာ မန္တလေးမြို့မှာရှိတဲ့ ပန်းလှိုင်၊ မင်္ဂလာမျိုးဆက်၊ မြတ်ချယ်ရီ၊ ဇီဝက၊ လန်ဒန်၊ ငြိမ်းချမ်း၊ မြတ်ဝေလျှံ၊ နန်းတော်၊ ထက်နေလင်း၊ စိန်ပန်းစတဲ့ ဆေးရုံတွေကို CDM ကျန်းမာရေးဝန်ထမ်းတွေ အလုပ်ခန့်ထားတယ်ဆိုတဲ့ စွပ်စွဲချက်နဲ့ ပိတ်သိမ်းထားတာပဲ ဖြစ်ပါတယ်။
“မန္တလေးက အရှင်လတ်လတ် ငရဲကြီးဖြစ်သွားတာ။ တော်တော်ဆိုးတယ် လမ်းတလျှောက်ကော အခုထိရော Ambulance တွေ တောက်လျှောက်သွားနေတာ အရေးပေါ်ဌာနမှာဆို လူသေအလောင်းတွေရော trauma case တွေရော ပုံနေတာဘဲ။ ဘယ်လိုမှ မလုပ်နိုင်တော့ဘူး အပြင်ဆေးရုံတွေကလည်း ရှိတဲ့လူနာတွေကို ကွင်းပြင်တွေထုတ်ထားရတာ။ ဆေးရုံတွေက ခိုင်ခံ့မှု စစ်ဆေးရဦးမှာ ကိုယ်တွေဆေးရုံတောင်မှ ဆေးရုံခိုင်ခံ့မှုရှိမှ တစ်လွှာချင်းဖွင့်ရမှာ လူနာလက်ခံလို့ရမှာ Operation run လို့ရမှာ”လို့ မန္တလေးမြို့ဒေသခံ သူနာပြု ဆရာမတစ်ဦးက ပြောပါတယ်။
စစ်ကောင်စီက ပိတ်သိမ်းထားတဲ့ ဆေးရုံတွေအနက် အထပ်နိမ့်အဆောက်အဦကို အသုံးပြုထားတဲ့ ဆေးရုံတွေလည်း ပါဝင်နေခဲ့ပါတယ်။
“ဖွင့်ခိုင်းတယ် မကြားမိဘူး၊ အစိုးရ ကယ်ဆယ်ရေးက ဘာမှ သိပ်မကြားမိဘူး”လို့ အခြား မန္တလေးမြို့ခံတစ်ဦးက ပြောပါတယ်။
လက်ရှိမှာ မန္တလေးမြို့တွင်းက ဆေးရုံတွေမှာ အရေးပေါ်လူနာတွေ ပြည့်နေပြီး ကားပါကင်တွေမှာပါ လူနာတွေကို ထားရှိကုသပေးနေရပါတယ်။
စစ်ကောင်စီခေါင်းဆောင် မင်းအောင်လှိုင်လည်း ဒီကနေ့ မတ်လ ၂၉ရက်နေ့ မနက်ပိုင်းမှာ မန္တလေးမြို့ကို ရောက်ရှိနေပါတယ်။
စစ်ကောင်စီရဲ့ နောက်ဆုံးထုတ်ပြန်ချက်အရ မန္တလေးတိုင်းအတွင်းမှာ သေဆုံးသူ ၆၉၄ ဦး၊ ဒဏ်ရာရရှိသူ ၁၆၇၀ ဦး၊ ပျောက်ဆုံးနေသူ ၆၈ ဦးရှိတယ်လို့ သိရပါတယ်။
ဓာတ်ပုံ – pro-SAC