အာရှအသင်းတွေနဲ့ ထိပ်တိုက်တွေ့နေပြီး နိုင်ပွဲလိုအပ်နေတဲ့ ဘယ်လ်ဂျီယံနဲ့ စပိန်
စပိန် vs ဆော်ဒီအာရေဗျ
၂၀၂၆ ကမ္ဘာ့ဖလား အုပ်စု (H) ပွဲစဉ်အဖြစ် ယနေ့ည ကစားမယ့် စပိန်အသင်းနဲ့ ဆော်ဒီအာရေဗျအသင်းတို့ရဲ့ ပွဲစဉ်ဟာ နှစ်သင်းစလုံးအတွက် အရေးပါတဲ့ ပွဲတစ်ပွဲ ဖြစ်လာဖို့ ရှိနေပါတယ်။ ပထမပွဲမှာ ကိတ်ဗာဒီအသင်းနဲ့ ဂိုးမရှိ သရေကျခဲ့တဲ့ စပိန်အသင်းအနေနဲ့ အုပ်စုအဆင့်ကနေ အေးအေးဆေးဆေး တက်ရောက်နိုင်ဖို့ ယခုပွဲမှာ ၃ မှတ်အပြည့် ရယူရန် လိုအပ်နေတာပဲ ဖြစ်ပါတယ်။
စပိန်အသင်းရဲ့ အားသာချက်ဟာ ဘောလုံးပိုင်ဆိုင်မှုနဲ့ ပွဲကို ထိန်းချုပ်နိုင်တဲ့ စွမ်းဆောင်ရည် ဖြစ်ပြီး၊ လမိုင်းယာမဲလ်၊ နီကိုဝီလီယံ၊ ပက်ဒရီ တို့လို လူငယ်ကြယ်ပွင့်တွေနဲ့ အတွေ့အကြုံရင့် ကစားသမားတွေ ပေါင်းစပ်ထားတဲ့ စပိန်အသင်းဟာ ပြိုင်ဘက်ကို ဘောလုံးမပေးဘဲ ဖိအားပေးကစားတတ်တဲ့ အသင်းဖြစ်တာနဲ့အညီ၊ ယနေ့ပွဲမှာလည်း ပထမပွဲမှာ တွေ့မြင်ခဲ့ရသလို အဆုံးသတ်ပိုင်း အားနည်းမှုတွေကို လျှော့ချနိုင်ဖို့ လိုအပ်နေတာပဲ ဖြစ်ပါတယ်။
ဆော်ဒီအာရေဗျအသင်းကတော့ ဥရုဂွေးအသင်းကို သရေကစားနိုင်ခဲ့တာကြောင့် ယုံကြည်မှု မြင့်တက်နေမှာဖြစ်ပြီး၊ သူတို့အသင်းရဲ့ အဓိကလက်နက်ဖြစ်တဲ့ တန်ပြန်တိုက်စစ်တွေနဲ့ နေရာလွတ်ရတိုင်း စပိန်အသင်းကို အန္တရာယ်ပေးနိုင်စွမ်း ရှိနေတာပဲ ဖြစ်ပါတယ်။ စပိန်တို့အနေနဲ့ ဘောလုံးပိုင်ဆိုင်မှု အသာစီးရယူလာမှာ ဖြစ်တာကြောင့် ဆော်ဒီအတွက် တန်ပြန်တိုက်စစ်တွေကို အသုံးချဖို့ အခွင့်အရေးတွေ ရှိလာနိုင်တာပဲ ဖြစ်ပါတယ်။
နည်းစနစ်ပိုင်းအရ ကြည့်မယ်ဆိုရင် စပိန်ဟာ ကွင်းလယ်မှာ အသာစီးရယူပြီး ပွဲကို ထိန်းချုပ်နိုင်ဖို့ ကြိုးစားမှာဖြစ်သလို၊ ဆော်ဒီအာရေဗျကတော့ ခံစစ်ကို ကျစ်ကျစ်လစ်လစ် တည်ဆောက်ကာ အမှားကို စောင့်မျှော်မယ့် ပုံစံနဲ့ ကစားလာနိုင်တာကြောင့် စပိန်ဘက်က တိုက်စစ်ကစားသမားတွေ ပုံမှန်ခြေစွမ်း ပြသနိုင်မှသာ နိုင်ပွဲကို ဖော်ဆောင်နိုင်မှာဖြစ်ပြီး၊ သွင်းဂိုးနည်းမယ့် ပွဲစဉ်တစ်ပွဲ ဖြစ်လာဖို့ ရှိနေပါတယ်။
ဘယ်လ်ဂျီယံ vs အီရန်
၂၀၂၆ ကမ္ဘာ့ဖလား အုပ်စု (G) ပွဲစဉ်အဖြစ် ယနေ့ည ကစားမယ့် ဘယ်လ်ဂျီယံအသင်းနဲ့ အီရန်အသင်းတို့ရဲ့ ထိပ်တိုက်တွေ့ဆုံမှုဟာ အုပ်စုအတွင်း အခြေအနေကို အဆုံးအဖြတ်ပေးနိုင်မယ့် အရေးကြီးပွဲစဉ်တစ်ပွဲ ဖြစ်လာဖို့ ရှိနေပါတယ်။ နှစ်သင်းစလုံး ပထမပွဲမှာ သရေရလဒ်သာ ရရှိထားတာကြောင့် ယခုပွဲမှာ ၃ မှတ်အပြည့် ရယူနိုင်ရေးကို အဓိက ပစ်မှတ်ထားလာမှာ ဖြစ်ပါတယ်။
ဘယ်လ်ဂျီယံအသင်းဟာ နာမည်ကြီး ကစားသမားအများအပြား ပိုင်ဆိုင်ထားတဲ့ အသင်းဖြစ်ပြီး၊ ကွင်းလယ်ဖန်တီးမှုနဲ့ တိုက်စစ်အဆုံးသတ်ပိုင်းမှာ အရည်အသွေးမြင့်မားတဲ့ ကစားသမားတွေ ရှိနေတာပဲ ဖြစ်ပါတယ်။ သို့သော် အီဂျစ်နဲ့ ပထမပွဲမှာ ပြသခဲ့တဲ့ ခြေစွမ်းအရ တိုက်စစ်ပိုင်းမှာ အခွင့်အရေးတွေကို အသုံးချမှုအပိုင်းမှာ ပိုမိုကောင်းမွန်အောင် လုပ်ဆောင်ဖို့ လိုအပ်နေတာပဲ ဖြစ်ပါတယ်။
အီရန်အသင်းကတော့ ခံစစ်ကို စနစ်တကျ တည်ဆောက်ထားတဲ့ အသင်းတစ်သင်းဖြစ်ပြီး၊ ခံစစ်ပိုင်း စုစည်းမှုကောင်းမွန်သလို တန်ပြန်တိုက်စစ်တွေကလည်း အန္တရာယ်ရှိနေတာပဲ ဖြစ်ပါတယ်။ နယူးဇီလန်နဲ့ ပွဲစဉ်မှာ သရေကျခဲ့ပေမဲ့ အီရန်အသင်းရဲ့ တိုက်ပွဲဝင်စိတ်နဲ့ စည်းလုံးမှုကို မြင်တွေ့ခဲ့ရပြီးနောက်၊ အီရန်တို့အနေနဲ့ ဘယ်လ်ဂျီယံကို အခက်တွေ့အောင် လုပ်နိုင်စွမ်း အပြည့်အဝ ရှိနေတာပဲ ဖြစ်ပါတယ်။
နည်းစနစ်ပိုင်းအရ ကြည့်မယ်ဆိုရင် ဘယ်လ်ဂျီယံအသင်းက ဘောလုံးပိုင်ဆိုင်မှု အသာစီးရယူပြီး ပွဲကို ထိန်းချုပ်ဖို့ ကြိုးစားလာနိုင်သလို၊ အီရန်အသင်းကတော့ ကျစ်လစ်တဲ့ ခံစစ်နဲ့ စောင့်ကစားကာ တန်ပြန်တိုက်စစ် အခွင့်အရေးတွေကို အသုံးချဖို့ ကြိုးစားလာမှာ ဖြစ်ပါတယ်။ ဒါကြောင့် ကွင်းလယ်တိုက်ပွဲက ယနေ့ပွဲရဲ့ အဓိက အဆုံးအဖြတ် ဖြစ်လာနိုင်တာပဲ ဖြစ်ပါတယ်။
ယေဘုယျအားဖြင့် လူအင်အားအရည်အသွေးနဲ့ အတွေ့အကြုံပိုင်းမှာ ဘယ်လ်ဂျီယံအသင်းက အသာစီးရှိနေပေမဲ့၊ အီရန်အသင်းရဲ့ စနစ်တကျ ကစားနိုင်မှုကြောင့် လွယ်ကူတဲ့ ပွဲတစ်ပွဲတော့ ဖြစ်လာမှာ မဟုတ်ဘဲ၊ အပြန်အလှန် သွင်းဂိုးတွေနဲ့ မြိုင်မြိုင်ဆိုင်ဆိုင်ရှိမယ့် ပွဲစဉ်တစ်ပွဲ ဖြစ်လာဖို့ ရှိနေပါတယ်။