ပဲခူးတိုင်း ပဲနွယ်ကုန်းမြို့မှာ တိုက်ပွဲဖြစ်ပြီး စစ်အုပ်စုဗိုလ်မှူးတစ်ဦးအပါအဝင် ၂၀ ခန့်သေဆုံး
ပဲခူးတိုင်း၊ ပဲနွယ်ကုန်းမြို့ ကြိမ်ခါးကုန်းရွာအနီးမှာ စစ်အုပ်စုနဲ့ ပြည်သူ့ကာကွယ်ရေးတပ်မတော် (PDF) ပူးပေါင်းတပ်တို့ တိုက်ပွဲဖြစ်ပွားခဲ့ပြီး ဒီနေ့ ဇန်နဝါရီ ၁၂ ရက် မနက်အစောပိုင်းမှာ စစ်အုပ်စုဘက်က လေကြောင်းဗုံးကြဲတိုက်ခိုက်မှုတွေ လုပ်ဆောင်ခဲ့တယ်လို့ ပဲနွယ်ကုန်းဒေသခံတစ်ဦးထံက သိရပါတယ်။
ရန်ကုန်-မန္တလေးလမ်းဟောင်းအနီး ကြိမ်ခါးကုန်းရွာကို စစ်ကြောင်းထိုးလာတဲ့ စစ်အုပ်စုတပ်ဖွဲ့နဲ့ ပြည်သူ့ကာကွယ်ရေးတပ်မတော် (PDF) တို့ ဒီနေ့ မနက်အစောပိုင်းမှာ တိုက်ပွဲဖြစ်ပွားခဲ့ပြီး စစ်အုပ်စုဘက်က ဗိုလ်မှူးအဆင့်ရှိသူတစ်ဦးအပါအဝင် ၂၀ ခန့် သေဆုံးခဲ့တယ်လို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန (MOD) လက်အောက်ခံ ပဲခူးတိုင်းစစ်ဌာနကလည်း ထုတ်ပြန်ထားပါသေးတယ်။
“ဒီနေ့ မနက်အစောပိုင်းမှာ ကြိမ်ခါးကုန်းဘက်ကို လေယာဉ်နဲ့ ဗုံးလာကြဲသွားသေးတယ်။ ပဲနွယ်ကုန်းမြို့အနီးတစ်ဝိုက်မှာလည်း ပစ်ခတ်နေတာတွေရှိတယ်။ နေ့လယ် ၂ နာရီဝန်းကျင်ကလည်း ကျောက်တံခါးဂိတ်ကို PDF တွေ ဝင်တိုက်သေးတယ်လို့ ကြားတယ်။ ဒီရက်ပိုင်း တိုက်ပွဲက တောက်လျှောက်ဖြစ်နေတာ” လို့ ပဲနွယ်ကုန်းဒေသခံတစ်ဦးက CJ Platform ကို ပြောပါတယ်။
ကြိမ်ခါးကုန်းရွာတိုက်ပွဲအတွင်း တော်လှန်ရေးတပ်ဖွဲ့ဘက်က ရဲဘော် ၂ ဦး ကျဆုံးခဲ့သလို ၃ ဦး ထိခိုက်ဒဏ်ရာရရှိခဲ့တယ်လို့ ပဲခူးတိုင်းစစ်ဌာနရဲ့ထုတ်ပြန်ချက်မှာဖော်ပြထားပြီး စစ်အုပ်စုဘက်က ထိခိုက်သေဆုံးမှုတွေရှိခဲ့ကာ လက်နက်ခဲယမ်းတွေကိုလည်း သိမ်းဆည်းရရှိခဲ့တယ်လို့ သိရပါတယ်။
စစ်အုပ်စုရွေးကောက်ပွဲ အပိုင်း ၂ နဲ့ ၃ မှာပါဝင်တဲ့ ကျောက်တံခါး၊ မင်းလှ၊ ထန်းတပင်နဲ့ ကြို့ပင်ကောက်မြို့နယ်တို့မှာ အခု ဇန်နဝါရီ ဒုတိယပတ်အတွင်း တိုက်ပွဲဖြစ်ပွားမှုတွေရှိနေပြီး ရန်ကုန်-မန္တလေးလမ်းဟောင်းပေါ်မှာရှိတဲ့ စစ်အုပ်စုတပ်စခန်း ၁၄ ခုကို တော်လှန်ရေးတပ်ဖွဲ့တွေက တိုက်ခိုက်သိမ်းယူနိုင်ခဲ့ပါတယ်။
အခုစစ်ဆင်ရေးကို NUG MOD အမှတ် ၂ စစ်ဆင်ရေးနယ်မြေ ပဲခူးတိုင်းစစ်ဌာန ဗျူဟာ ၂၅ လက်အောက်ခံ အမှတ် (၃၇၀၂) တပ်ရင်း၊ အထူးကွန်မန်ဒိုတပ်ရင်း (P-29914)၊ ဗျူဟာ (၂၆) ကွပ်ကဲမှုအောက်ရှိ အမှတ် (၃၇၀၃) တပ်ရင်း (Fire Dragon) နဲ့ တော်ဝင်ဒေါင်းတပ်ရင်း (P-29913) တို့က ပူးပေါင်းတိုက်ခိုက်ခဲ့ကြတာ ဖြစ်ပါတယ်။
ဓာတ်ပုံ – ပဲခူးတိုင်းစစ်ဌာန