စစ်မှုထမ်းတပ်သားသစ်စုဆောင်းခံရတဲ့ စစ်ကောင်စီတပ်သားလေးဦး KNLA ထံ အလင်းဝင်
ပဲခူးတိုင်း ညောင်လေးပင်ခရိုင် ကျောက်ကြီးမြို့နယ်မှာ စစ်ကောင်စီတပ်သားလေးဦး လက်နက်ခဲယမ်းတွေနဲ့အတူ အလင်းဝင်ရောက်လာတယ်လို့ ကရင်အမျိုးသားအစည်းအရုံး (KNU) ခလယ်လွီထူခရိုင်က ဒီနေ့ ဇူလိုင် ၁၉ ရက်မှာ ထုတ်ပြန်လာပါတယ်။
KNU ကော်သူးလေအုပ်ချုပ်နယ်မြေ ခလယ်လွီထူခရိုင် (ညောင်လေးပင်) လယ်ဒို (ကျောက်ကြီး) မြို့မှာရှိတဲ့ ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၉ ဆီ အခု ဇူလိုင် ၈ ရက်မှာ စစ်ကောင်စီတပ်သား လေးဦး အလင်းဝင်ရောက်လာကြတာလည်း ဖြစ်ပါတယ်။
အလင်းဝင်လာတဲ့ စစ်ကောင်စီတပ်သားလေးဦးဟာ စစ်ကောင်စီ စစ်မှုထမ်းဥပဒေကြောင့် တပ်သားသစ်စုဆောင်းခံထားရသူတွေဖြစ်တယ်လို့ KNU ရဲ့ ထုတ်ပြန်ချက်မှာ ဖော်ပြထားပြီး စစ်ကောင်စီ စစ်မှုထမ်း အပတ်စဉ် ၅ က ၂ ဦးနဲ့ အပတ်စဉ် ၈ က နှစ်ဦးတို့ ဖြစ်တယ်လို့လည်း သိရပါတယ်။
KNLA တပ်ရင်း ၉ ထံ အလင်းလာသူတွေဟာ ညောင်လေးပင်အခြေစိုက် စစ်ကောင်စီ အမှတ် ၂၀ ခြေမြန်တပ်ရင်းနဲ့ ကော့သောင်းမြို့အခြေစိုက် အမှတ် ၅၈၁ ခြေမြန်တပ်ရင်းတို့က ဖြစ်ပြီး သူတို့နဲ့အတူ MA-11 (၂) လက်၊ MA-1 (၁) လက်၊ MA-2 (၁) လက်၊ ကျည်ဘောက် (၅) ခုနဲ့ ခဲယမ်းအချို့ ယူဆောင်လာတာကြောင့် တစ်ဦးစီကို ငွေကျပ် ၁၀ သိန်းစီ ဂုဏ်ပြုပေးအပ်ခဲ့တယ်လို့လည်း သိရပါတယ်။
စစ်မှုထမ်းဥပဒေကြောင့် အဓမ္မ တပ်သားသစ်စုဆောင်းခံရသူတွေနဲ့ စစ်ကောင်စီလက်အောက်မှာ တာဝန်မထမ်းဆောင်လိုသူတွေအနေနဲ့ လက်နက်ချ အလင်းဝင်ရောက်လာလို့ပါက KNU/KNLA ထိန်းချုပ်နယ်မြေ နီးစပ်ရာ တော်လှန်ရေးတပ်စခန်းတွေမှာ အလင်းဝင်ရောက်နိုင်ပြီး အမြဲလက်ခံကြိုဆိုနေတယ်လို့လည်း KNU က ဖော်ပြထားပါတယ်။
ခလယ်လွီထူ (ညောင်လေးပင်) ခရိုင်အတွင်း အရပ်သားပြည်သူတွေကို ပစ်မှတ်ထားကာ စစ်ကောင်စီက လက်နက်ကြီးပစ်ခတ်မှု၊ ဒရုန်းပစ်ခတ်မှုနဲ့ အဓမ္မဖမ်းဆီးမှုတွေ ရှိနေပြီး အခုနှစ် ပထမခြောက်လအတွင်း စစ်ကောင်စီအကြမ်းဖက်မှုကြောင့် ဒေသခံပြည်သူ ၄၉ ဦး သေဆုံးခဲ့သလို ၁၈၁ ဦး ထိခိုက်ဒဏ်ရာ ရရှိခဲ့ပါတယ်။
ဓာတ်ပုံ – KNU-Kler Lwee Htu District