ကန့်ဘလူက ပျူစောထီးစခန်းကို တိုက်ခိုက်သိမ်းပိုက်၊ စစ်ကောင်စီတပ်သား ၂၅ ဦးထက်မနည်းသေဆုံးပြီး လက်နက်ခဲယမ်းများ သိမ်းဆည်းရမိ
စစ်ကိုင်းတိုင်း၊ ကန့်ဘလူမြို့နယ်၊ တင်ငုတ်ကြီးရွာရှိ စစ်ကောင်စီနှင့် ပျူစောထီးများ ပူးပေါင်းတပ်စွဲထားသည့် တပ်စခန်းကို တိုက်ခိုက်သိမ်းပိုက်ခဲ့ရာတွင် စစ်သား ၂၅ ဦးထက်မနည်း သေဆုံးကြောင်း NUG ကာကွယ်ရေးဝန်ကြီးဌာန (MoD)အပြင် CJ Platform ၏ မြေပြင်သတင်းရင်းမြစ်များ အတည်ပြုချက်အရ သိရသည်။
အဆိုပါ တပ်စခန်းကို ကန့်ဘလူမြို့နယ် ပြည်သူ့ကာကွယ်ရေးပူးပေါင်းအဖွဲ့များက ယနေ့ ဇန်နဝါရီလ ၁၁ ရက် ညသန်းခေါင်ယံတွင် ဝင်ရောက်တိုက်ခိုက်ခဲ့ပြီးနောက် နံနက် ၂ နာရီကျော်တွင် သိမ်းဆည်းရမိခဲ့ခြင်းဖြစ်ကြောင်း CJ Platform ၏ သတင်းရင်းမြစ်များထံမှ သိရသည်။
“ကျွန်တော်တို့ ပကဖတပ်ပေါင်းစုက ဝင်တိုက်လိုက်တယ်ပေါ့။ ကျည်နဲ့ သေနတ်က ၁၄ လက်လောက် ရလိုက်တယ်။ သူတို့ဘက်က ပြင်းထန်တဲ့ဒဏ်ရာတွေနဲ့ (မူရင်းပြောကြားချက်အား အနည်းငယ် ပြင်ဆင်ထားပါသည်) သေတာရှိတယ်။ ကျွန်တော်တို့ဘက်က ထိခိုက်မှုတော့မရှိဘူး” ဟု တိုက်ပွဲအတွင်း ပါဝင်ခဲ့သည့် CJ Platform ၏ သတင်းရင်းမြစ် တော်လှန်ရေးရဲဘော်တစ်ဦးက ပြောသည်။
ထိုစခန်းသိမ်းတိုက်ပွဲအတွင်း စစ်ကောင်စီတပ်ဘက်မှ တပ်သား ၂၅ ဦးထက်မနည်းသေဆုံးပြီး လက်နက်ငယ် ၁၄ လက်နှင့် ခဲယမ်းအများအပြားကိုလည်း သိမ်းဆည်းရမိခဲ့သေးကြောင်း အမျိုးသားညီညွှတ်ရေးအစိုးရ(NUG)၏ MoD ၏ ထုတ်ပြန်ချက်အရ သိရသည်။
“မနက်ခင်း ၂ နာရီကျော်လောက်က သိမ်းတယ်။ ကျွန်တော်တို့ ဘယ်တပ်ရင်းက သိမ်းလဲဆိုတာ လက်ရှိ မသိရသေးဘူးဗျ” ဟု ကန့်ဘလူမြို့နယ် ဒေသခံတစ်ဦးက CJ Platform သို့ ပြောသည်။
ထိုတိုက်ပွဲအတွင်း စစ်ကောင်စီတပ်ဘက်က လက်နက်ကြီးဖြင့် ပစ်ကူပေးမှုများရှိခဲ့ကြောင်း သိရသည်။
ဓာတ်ပုံ – NUG ကာကွယ်ရေးဝန်ကြီးဌာန