NUG အထူးတိုင်းစစ်ဌာနချုပ်အပါအဝင် စခန်း ၁၁ ခု သိမ်းပိုက်နိုင်ခဲ့တယ်လို့ စစ်အုပ်စု ပြော
အမျိုးသားညီညွတ်ရေးအစိုးရ (NUG) ရဲ့ အထူးတိုင်းစစ်ဌာနချုပ်အပါအဝင် စခန်း ၁၁ ခုကို သိမ်းပိုက်နိုင်ခဲ့တယ်လို့ စစ်အုပ်စုက ဒီနေ့ ထုတ်ပြန်ထားပါတယ်။
စစ်အုပ်စုရဲ့ ထုတ်ပြန်ချက်အရ နိုဝင်ဘာ ၈ ရက်မှာ မွန်ပြည်၊ ကျိုက်ထိုမြို့နယ် သိမ်ဇရပ်မြို့ရဲ့ အရှေ့မြောက်ဘက်နဲ့ ပဲခူးတိုင်း၊ ရွှေကျင်မြို့နယ်အတွင်းရှိ ပွိုင့် ၄၈၀ တောင်ကုန်းနဲ့ ထီးကလာချောင်းတစ်ဝိုက်မှာရှိတဲ့ NUG အထူးတိုင်းစစ်ဌာနချုပ်အပါအဝင် စခန်း ၅ ခုကို သိမ်းပိုက်နိုင်ခဲ့တယ်လို့ ဆိုပါတယ်။
ဒါ့အပြင် နိုဝင်ဘာ ၇ ရက်မှာ သိမ်ဇရပ်မြို့အနီး ကော်ကတ်နဲ့ ကော်ကီးထရွာတစ်ဝိုက်ရှိ KNU ရဲ့ KNLA တပ်မဟာ ၁၊ တပ်ရင်း ၃ ဌာနချုပ်အပါအဝင် စခန်း ၄ ခုကိုလည်း သိမ်းပိုက်ခဲ့တယ်လို့ စစ်အုပ်စုက ထုတ်ပြန်ထားပါတယ်။
စစ်အုပ်စုဟာ နိုဝင်ဘာ ၃ ရက်ကစပြီး စစ်ကြောင်းတွေခွဲကာ ထိုးစစ်ဆင်ခဲ့ပြီး နိုဝင်ဘာ ၅ ရက်မှာ ကော်ကတ်ကျေးရွာအနီးရှိ ယာယီစခန်းတစ်ခုနဲ့ နိုဝင်ဘာ ၆ ရက်မှာ ကော်ကီးထကျေးရွာအနီးရှိ စခန်းတစ်ခုကို ထပ်မံသိမ်းပိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ စက်တင်ဘာ ၂၄ ရက်ကလည်း NUG အထူးတိုင်းစစ်ဌာနချုပ်ကို စစ်အုပ်စုက လေကြောင်းကနေ ဗုံးကြဲတိုက်ခိုက်ခဲ့ဖူးပါတယ်။ အဲဒီတိုက်ခိုက်မှုအတွင်း လေတပ် CDM တပ်ကြပ်ကြီး ဦးနေလင်းအောင်နဲ့ PDF တပ်ဖွဲ့ဝင်တွေ အပါအဝင် ၅ ဦး သေဆုံးပြီး ၃ ဦး ဒဏ်ရာရခဲ့တယ်လို့ သိရပါတယ်။
အခုတစ်ကြိမ်မှာတော့ စက်တင်ဘာလအတွင်း လေကြောင်းတိုက်ခိုက်မှု ပြုလုပ်ခဲ့ပြီး တစ်လကျော်အကြာ နိုဝင်ဘာလဆန်းပိုင်းမှာ မြေပြင်စစ်ကြောင်းတွေ ထိုးစစ်ဆင်ပြီး သိမ်းပိုက်နိုင်ခဲ့တယ်လို့ စစ်အုပ်စုက ထုတ်ပြန်လာတာဖြစ်ပါတယ်။
စစ်အုပ်စုရဲ့ ထုတ်ပြန်ချက်နဲ့ ပတ်သက်ပြီး NUG ဘက်ကတော့ လက်ရှိအချိန်အထိ ပြန်လည်တုံ့ပြန်ထားတာ မရှိသေးပါဘူး။