အပစ်အခတ်ရပ်စဲရေးလက်မှတ်ထိုးထားပေမဲ့ စစ်ကောင်စီက TNLA ကို ရန်စတိုက်ခိုက်မှုတွေပြုလုပ်နေ၊ TNLA တပ်ဖွဲ့ဝင် သုံးဦးဒဏ်ရာရ
တရုတ် ကြားဝင်မှုနဲ့ ရှမ်းမြောက်မှာ ၁၀၂၇ စစ်ဆင်ရေး ရပ်တန့်ပြီး ညီနောင်သုံးဖွဲ့နဲ့ စစ်ကောင်စီတို့ကြား အပစ်ရပ်ခဲ့ကြပေမဲ့ စစ်ကောင်စီတပ်ဘက်က ရန်စတဲ့အနေနဲ့ တအောင်းတပ် TNLA တပ်စခန်းတွေရှိရာကို လေကြောင်းနဲ့ လက်နက်ကြီးတွေနဲ့ တိုက်ခိုက်လို့ TNLA တပ်ဖွဲ့ဝင်သုံးဦးထိခိုက်ဒဏ်ရာရရှိခဲ့တယ်လို့ ပလောင်လွတ်မြောက်ရေးတပ်ဦး(PSLF/TNLA)က ဆိုပါတယ်။
စစ်ကောင်စီဟာ ဇွန်လ ၁ ရက်မှ ၉ ရက်အထိ TNLA စခန်းတွေကို လက်နက်ကြီးတွေနဲ့အပြင် လေကြောင်းပါအသုံးပြုပြီး တိုက်ခိုက်ခဲ့တယ်လို့ PSLF/TNLA ရဲ့ ထုတ်ပြန်ချက်အရ သိရပါတယ်။
တအောင်းဒေသ မိုးမိတ်မြို့နယ်အတွင်းမှာရှိတဲ့ TNLA တပ်စခန်းရှိရာကို လက်နက်ကြီးနဲ့ သုံးကြိမ်ပစ်ခတ်ခဲ့တဲ့အပြင် လေကြောင်းကနေပါ ပေါင် ၅၀၀ ဗုံးကြဲချတိုက်ခိုက်ခဲ့တယ်လို့ PSLF/TNLA က ဆိုပါတယ်။
စစ်ကောင်စီဟာ မိုးမိတ်မြို့နယ်ထဲက ပန်တင်ရွာနဲ့ မန်ပိန်းရွာကြားရှိ TNLA တပ်စခန်းကို ညနေ ၄ နာရီခွဲခန့်မှာ လေကြောင်းကနေ လာရောက်ပစ်ခတ်ခဲ့တဲ့အပြင် ညနေ ၅ နာရီကျော်မှာ ဂျက်ဖိုက်တာနဲ့ ပေါင် ၅၀ဝ ဗုံး တစ်လုံး လာရောက်ကြဲချခဲ့တယ်လို့ သိရပါတယ်။ ဒါကြောင့် TNLA ရဲဘော် သုံးဦး ထိခိုက်ဒဏ်ရာရရှိခဲ့တယ်လို့ သိရပါတယ်။
စစ်ကောင်စီတပ်တွေဟာ တအောင်းတပ်စခန်းများရှိရာ နေရာတွေကို ဇွန် ၁ မှ ၉ ရက်အထိ လက်နက်ကြီးနဲ့ ဆယ်ကြိမ်ထက်မနည်းပစ်ခတ်ခဲ့တယ်လို့လည်း PSLF/TNLA က ဆိုပါတယ်။
စစ်ကောင်စီက အခု လပိုင်းအတွင်း ရှမ်းမြောက်မှာ လက်နက်နဲ့ လူအင်အားဖြည့်တင်းပြီး စစ်ပြင်နေတယ်လို့ အခု ဇွန်လ ၆ ရက်နေ့က ပြောဆိုထားပြီး ထိုအချိန်ထဲက TNLA ထိန်းချုပ်ရာကျေးရွာတွေကို လက်နက်ကြီးနဲ့ ပစ်ခတ်တိုက်ခိုက်နေလို့ ကျေးရွာရှိပြည်သူတွေ စစ်ဘေးရှောင် ထွက်ပြေးနေရတယ်လို့လည်း သိရပါတယ်။
လက်ရှိ တအောင်းတပ် TNLA ဟာ ရှမ်းမြောက်မှာ နမ့်ဆန်၊ နမ္မတူ၊ မန်တုံ၊ ကွတ်ခိုင်၊ နမ့်ခမ်း၊ မိုင်းငေါ့၊ မိုင်းလုံ စတဲ့ မြို့ ခုနစ်ခုကို သိမ်းပိုက်ထိန်းချုပ်ထားပါတယ်။
အာရက္ခတပ်တော် AA ၊ တအောင်းတပ် TNLA နဲ့ ကိုးကန့်တပ် MNDAA တို့ရဲ့ ညီနောင်သုံးဖွဲ့ဟာ တရုတ်ရဲ့ ကြားဝင်ညှိနှိုင်းမှုနဲ့ တရုတ်ပြည်ထဲ စစ်ကောင်စီနဲ့ သုံးကြိမ်အထိ တွေ့ဆုံခဲ့ရာ နောက်ဆုံးအကြိမ်မှာ ဟိုင်ဂင်သဘောတူညီချက် ရရှိပြီးနောက် ဒီနှစ် ဇန်နဝါရီ ၁၁ ရက်နေ့ကစတင်ပြီး ရှမ်းမြောက်မှာ အပစ်ရပ်ခဲ့ကြပါတယ်။
ဓာတ်ပုံ – PSLF/TNLA