မတ္တရာက စစ်ကောင်စီစခန်းငယ်ကို ဝင်သိမ်း၊ ဗိုလ်ကြီးတစ်ဦးအပါအဝင် ၁၂ ဦးသေဆုံးသလို ရဲဘော်တစ်ဦးကျ ဗိုလ်ကြီးဆီက ကော်ပစ္စတိုတစ်လက်သိမ်းမိ
မန္တလေးတိုင်း၊ မတ္တရာမြို့အနီးက တောင်တံငါရွာ ဘုန်းကြီးကျောင်းထဲ တပ်စွဲထားတဲ့ စစ်ကောင်စီအထိုင်စခန်းငယ်ကို ယနေ့ နံနက်အစောပိုင်းက ဝင်ရောက်တိုက်ခိုက်သိမ်းပိုက်ခဲ့တယ်လို့ ပြည်သူ့ကာကွယ်ရေးတပ်မတော်(မန္တလေး)က ထုတ်ပြန်လိုက်ပါတယ်။
မတ္တရာမြို့မြောက်ဘက် (၂)မိုင်အကွာရှိ တောင်တံငါရွာက စစ်ကောင်စီစခန်းငယ်ကို မနက် ၅ နာရီက ဝင်တိုက်ရာမှာ ၄၅ မိနစ်အကြာ ၅ နာရီ ၄၅ မိနစ်မှာပဲ အပြီးသတ်သိမ်းပိုက်နိုင်ခဲ့တဲ့အကြောင်း Mdy PDF က ဆိုပါတယ်။
အဲဒီတိုက်ပွဲထဲ Drone Jammer တစ်လက်၊ လက်နက်ခဲယမ်းအများအပြားနဲ့အတူ ဗိုလ်ကြီးတစ်ဦးအပါအဝင် အလောင်း (၁၂)လောင်းခန့်ကို သိမ်းဆည်းရမိခဲ့တဲ့အပြင် တိုက်ပွဲအတွင်း စစ်ကောင်စီတပ်သားတွေ ကစဉ့်ကလျားထွက်ပြေးခဲ့ကြတယ်လို့ Mdy PDF က ဆိုပါတယ်။ သိမ်းဆည်းရမိတဲ့ စစ်ကောင်စီ ဗိုလ်ကြီး ကိုင်ဆောင်တဲ့ ပစ္စတိုမှာ ကလေးကစားစရာ ပလက်စတစ်ကော်စေ့သေနတ်ဖြစ်တာကို တွေ့ရှိခဲ့ရတယ်လို့ သိရပါတယ်။
အလားတူ အဲဒီတိုက်ပွဲထဲ ပြည်သူ့ကာကွယ်ရေးတပ်မတော်(မန္တလေး)ဘက်က ရဲဘော်တစ်ဦးကျဆုံးခဲ့တယ်လို့ သိရပါတယ်။
အဲဒီအထိုင်စခန်းငယ်ဟာ မတ္တရာမြို့ကနေ စဉ့်ကူးဘက် အထွက်မှာတည်ရှိပြီး မတ္တရာမြို့နဲ့ ရေနံ့သာကျေးရွာကြားမှာ ပြည်သူတွေဆီက အဓမ္မငွေကြေး ကောက်ခံနေတဲ့စခန်းတစ်ခုဖြစ်တယ်လို့ သိရပါတယ်။
ဓာတ်ပုံ – ပြည်သူ့ကာကွယ်ရေးတပ်ဖွဲ့(မန္တလေး)