ပေါက်မြို့နယ်မှာ ပျူစခန်းသိမ်းပြီး ဖမ်းဆီးရမိတဲ့ ပျူစောထီးနဲ့ မိသားစုဝင် ၇၀ ကျော်ကို ဘေးကင်းစွာ စောင့်ရှောက်ထိန်းသိမ်းထား
မကွေးတိုင်း၊ ပေါက်မြို့နယ်၊ ကုက္ကိုစုကျေးရွာမှ လက်နက်တွေနဲ့အတူ ထွက်ပြေးချိန် ဖမ်းဆီးရမိခဲ့တဲ့ စစ်အုပ်စုလက်အောက်ခံ ပျူစောထီးတွေနဲ့ ပျူစောထီး မိသားစုဝင် ၇၀ ကျော်ကို လက်ရှိတွင် ဘေးကင်းလုံခြုံစွာ စောင့်ရှောက်ထိန်းသိမ်းထားတယ်လို့ အညာမြေတပ်ပေါင်းစုက ဒီကနေ့ ဇွန်လ ၆ ရက်နေ့မှာ သတင်းထုတ်ပြန်ပါတယ်။
အဲဒီ ဖမ်းဆီးရမိသူတွေဟာ လက်နက်ချအညံ့ခံခြင်းမရှိဘဲ ပြန်လည်ခုခံမှုတွေ ပြုလုပ်ခဲ့တာကြောင့် ဂျီနီဗာကွန်ဗင်းရှင်း (Geneva Conventions) ဥပဒေအရ စစ်သုံ့ပန်းအဖြစ် သတ်မှတ်ကာ နိုင်ငံတကာဥပဒေတွေနဲ့အညီ စနစ်တကျ ထိန်းသိမ်းစောင့်ရှောက်ထားခြင်းဖြစ်ကြောင်း သိရပါတယ်။
ပေါက်မြို့နယ်အတွင်း စစ်အုပ်စုဘက်က အားအထားရဆုံးဖြစ်တဲ့ ကုက္ကိုစုပျူစောထီးကျေးရွာကို တော်လှန်ရေးပူးပေါင်းတပ်ဖွဲ့တွေက ဇွန် ၄ ရက်နေ့မှာ တိုက်ခိုက်သိမ်းပိုက်ခဲ့ပြီးနောက်၊ အဲဒီရွာက ပျူစောထီးတွေနဲ့ မိသားစုဝင်တွေဟာ လက်နက်အပြည့်အစုံနဲ့ မြိုင်မြို့နယ်ရှိ စက်မှု-၂ တပ်စခန်းဘက်သို့ တိတ်တဆိတ် ထွက်ပြေးခဲ့ကြတာဖြစ်ပါတယ်။ ပျူစောထီးတွေ လက်နက်တွေနဲ့အတူ ထွက်ပြေးမှုကြောင့် လမ်းကြောင်းတစ်လျှောက်ရှိ ကျေးရွာအနည်းဆုံး ငါးရွာခန့်မှ ဒေသခံပြည်သူတွေဟာ ဘေးလွတ်ရာကို တိမ်းရှောင်ခဲ့ရတယ်လို့ သိရပါတယ်။
ထွက်ပြေးသွားတဲ့အဖွဲ့ကို အညာမြေတပ်ပေါင်းစုနဲ့ ဒေသတွင်း တော်လှန်ရေးတပ်ဖွဲ့အသီးသီးက ကင်းထောက်ခြင်း၊ တောနင်းရှာဖွေခြင်းတွေ ဆက်တိုက်ဆောင်ရွက်ခဲ့ရာ ဇွန်လ ၅ ရက် ည ၇ နာရီခန့်မှာ ပေါက်မြို့နယ် တောတွင်းတစ်နေရာ၌ အစုလိုက် ပိတ်မိဖမ်းဆီးရမိခဲ့တာ ဖြစ်ပါတယ်။
ပျူစောထီးအမြောက်အမြားကို ဖမ်းဆီးရရှိခဲ့ပေမဲ့ အဖွဲ့ကို ဦးဆောင်တဲ့ ကုက္ကိုစုပျူစောထီးခေါင်းဆောင်နဲ့ စစ်အုပ်စုတပ်သား ငါးဦး၊ စုစုပေါင်း ခြောက်ဦးမှာမူ ပျူစောထီးတွေနဲ့ မိသားစုဝင်တွေကို စွန့်ပစ်ကာ နယ်မြေကျွမ်းကျင်မှုကို အသုံးပြုပြီး ထွက်ပြေးလွတ်မြောက်နေဆဲ ဖြစ်ကြောင်း ဖော်ပြထားပါတယ်။
လွတ်မြောက်နေတဲ့ ပျူစောထီးခေါင်းဆောင်နဲ့ စစ်အုပ်စုတပ်သား ၅ ဦးကို ဖမ်းဆီးနိုင်ရေးအတွက် တော်လှန်ရေးတပ်ဖွဲ့တွေက ဆက်လက်လုပ်ဆောင်နေဆဲဖြစ်ပြီး၊ ကုက္ကိုစုကျေးရွာတိုက်ပွဲနဲ့ ပတ်သက်တဲ့ အသေးစိတ်ထုတ်ပြန်ချက်ကို အညာမြေတပ်ပေါင်းစုက ဆက်လက်ထုတ်ပြန်သွားမယ်လို့ ဆိုပါတယ်။
အညာမြေတပ်ပေါင်းစုနဲ့ ဒေသတွင်းမဟာမိတ်ပူးပေါင်းတပ်တွေဟာ ပြီးခဲ့တဲ့ မေလ ၂၂ ရက်နေ့ကလည်း စစ်ဆင်ရေးတစ်ခုဖော်ဆောင်ခဲ့ပြီး၊ မြိုင်မြို့နယ်အတွင်း ပျူရွာအဖြစ် အစောဆုံးဖွဲ့စည်းခဲ့ကာ အင်အားကြီးမားတဲ့ သရက်ကန်ပျူစောထီးစခန်းကို မေလ ၂၃ ရက်နေ့မှာ အပြီးသတ် သိမ်းပိုက်နိုင်ခဲ့ပါသေးတယ်။
ဓာတ်ပုံ – အညာမြေတပ်ပေါင်းစု