မန္တလေးအိုးဘိုထောင်ထဲ ငလျင်ဒဏ်ကြောင့် ပိတ်မိသေဆုံးသူတွေထဲ နိုင်ငံရေးအကျဉ်းသူ ၆ ဦးပါဝင်
အင်အားပြင်းငလျင်က အကျဉ်းထောင်တန်းပိတ်ချိန်မှာ လှုပ်ခတ်မှုကြောင့် မန္တလေးအိုးဘိုထောင်ထဲ ပိတ်မိကာ သေဆုံးသူ အကျဉ်းသားအကျဉ်းသူတွေထဲ နိုင်ငံရေးအကျဉ်းသူ ၆ ဦးပါဝင်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် PPNM ဦးဆောင်ကော်မတီဝင်တစ်ဦးရဲ့ ပြောပြချက်အရ သိရပါတယ်။
အိုးဘိုထောင်အတွင်း ငလျင်ဒဏ်ကြောင့်သေဆုံးသူ ၁၂ ဦး ခန့်ရှိတယ်လို့ ကနဦးသိရပြီး အဲ့ဒီအထဲ နိုင်ငံရေးအကျဉ်းသူ ၆ ဦးပါဝင်နေတာကို အတည်ပြုထားနိုင်ပြီဖြစ်တယ်လို့ သိရပါတယ်။
“ အမျိုးသားဆောင်မှာကတော့ အနည်းဆုံး အမျိုးသားတစ်ဦးသေဆုံးခဲ့ပြီး အမျိုးသမီးဆောင်မှာတော့ နိုင်ငံရေးအကျဉ်းသူ ၆ ဦးကိုအတည်ပြုနိုင်ပါပြီ “ လို့ PPNM ဦးဆောင်ကော်မတီဝင် ကိုသိုက်ထွန်းဦးက CJ Platform ကိုပြောပါတယ်။
ကျန်တဲ့ သေဆုံးသူတွေကို အမျိုးသမီး၊ အမျိုးသားနဲ့ ပုဒ်မတွေ ဆက်လက်လက်စိစစ်နေဆဲ ဖြစ်ပါတယ်လို့ သူကဆက်ပြောပါတယ်။
သေဆုံးခဲ့တဲ့ နိုင်ငံရေးအကျဉ်းသူတွေထဲ အတည်ပြုရရှိထားသူ ၆ ဦးမှာ မမိုးသူဇာခိုင်၊ ဒေါ်လဲ့လဲ့စိုး၊ ဒေါ်ခင်အုန်းရွှေ၊ မကေကေဝင်း၊ မပပဝင်း၊ မဖူးဝေဝေ တို့ဖြစ်တယ်လို့ သိရှိရပါတယ်။
အင်အားပြင်းငလျင်ဒဏ်ကြောင့် မန္တလေးအိုးဘိုထောင်အတွင်း အမျိုးသမီးအိပ်ဆောင် (၁)နဲ့ (၂)၊ အမျိုးသမီးဆေးရုံဆောင်၊ အမျိုးသားအဆောင်အလုပ်ရုံ တို့ပြိုကျ ပျက်စီးခဲ့ရပြီး သေဆုံးသူ ၁၂ ဦး ရှိခဲ့ပြီး ဒဏ်ရာရရှိသူ အများအပြားရှိခဲ့တယ်လို့ သိရပါတယ်။
ဒဏ်ရာရရှိသူတွေထဲ အကျဉ်းထောင်မှာ ကုသဖို့မလွယ်ကူပဲ ပြင်ပဆေးရုံတက်ဖို့ လိုအပ်နေသူ အယောက် ၄၀ ကျော်ရှိနေပြီး စိုးရိမ်ရသူ ၉ ဦးခန့်ရှိနေတယ်လို့လည်း PPNM ရဲ့ထုတ်ပြန်ထားချက်တွေ အရ သိရပါတယ်။
ထိခိုက်ဒဏ်ရာရရှိသူတွေလည်း မိသားစုနဲ့ ဆက်သွယ်ခွင့်မရတဲ့ အခြေအနေများနဲ့ ကြုံတွေ့နေရပြီး သေဆုံးသူ တွေကိုလည်း အကျဉ်းထောင်လုပ်ထုံးလုပ်နည်းတွေနဲ့သာ ထောင်အာဏာပိုင်တွေက သင်္ဂြိုဟ်ခဲ့တယ်လို့ သိရှိရပါတယ်။
လက်ရှိအချိန်မှာ သတင်းလွတ်လပ်ခွင့်ကို ပိတ်ပင်ထားပြီး သတင်းစီးဆင်းမှုတွေ ဖြတ်တောက်ခံထားရလို့ နောက်ဆက်တွဲ သတင်းတွေရရှိနိုင်ဖို့ ခက်ခဲတာကြောင့် သေဆုံးသွားတဲ့ နိုင်ငံရေးအကျဉ်းသူတွေနဲ့ ပတ်သတ်ပြီး အသေးစိတ်အချက်အလက်ကို နောက်ပိုင်းမှာ PPNM က ထုတ်ပြန်သွားဖို့ရှိတယ်လို့ သိရပါတယ်။
“သေဆုံးမှုတွေကို မိသားစုဝင်တွေသိဖို့ လိုအပ်တယ်။ အထဲက မိမိတို့ရဲ့ သားသမီးသေဆုံးတာကို မသိလိုက်ရမှာစိုးတဲ့အတွက် အတည်ပြုထားနိုင်သူတွေကို ထုတ်ပြန်ရခြင်းဖြစ်ပါခင်ဗျ” လို့ ကိုသိုက်ထွန်းက CJ Platform ကိုပြောပါတယ်။
မိသာစုတွေ သိရှိဖို့ဖုန်းလိုင်း ကောင်းစွာ မရရှိသေးတဲ့အတွက် အခက်အခဲတချို့ရှိတယ်လို့လည်း သူကဆက်ပြောပါတယ်။
အင်အားပြင်းမြေငလျင်ကြောင့် အိုးဘိုထောင်ထဲ အကျဉ်းသားအိပ်ဆောင်တချို့နဲ့ ဝန်ထမ်းအိမ်ယာတချို့ ပြိုကျပျက်စီးခဲ့သလို အကျဉ်းသားအိပ်ဆောင်နံရံတွေ ကွဲအက်တာ မျက်နှာကျက်တွေ ပြိုကျပျက်စီးခဲ့တာမျိုးတွေရှိတယ်လို့ အကျဉ်းထောင်နဲ့ နီးစပ်သူတွေထံကနေ သိရပါတယ်။
အိုးဘိုထောင်အတွင်း ပြိုကျပျက်စီးခဲ့တာတွေကို စစ်ကောင်စီဘက်က တာဝန်ရှိသူတွေ လာရောက်စစ်ဆေးခဲ့ပြီး အကျဉ်းထောင်အတွင်းက အခြေအနေတွေကို သတင်းပေါက်ကြားမှု မရှိအောင် ဖုံးထားတယ်လို့ သိရပါတယ်။
“ အိပ်ဆောင်တွေပြိုတာတော့ ဟုတ်တယ်။ အင်္ဂလိပ်လက်ထက်ထဲက ဆောက်ခဲ့တဲ့ အဆောက်အဦတွေ ဆိုတော့ နှစ်ရာနဲ့ရှိနေပြီလေ ဒါတောင်အဲဒီခေတ်က ပစ္စည်းကောင်းတွေသုံးထားလို့။ သေဆုံးသူတွေရှိပါ တယ်။ ဒီလောက်ပဲ “ လို့ အိုးဘိုထောင်နဲ့ နည်းစပ်သူတစ်ဦးက CJ Platform ကိုပြောပါတယ်။
လက်ရှိမှာ အိုးဘိုထောင်အတွင်းဆေးဝါးကုသဖို့ လိုအပ်နေသူတွေ အများအပြားရှိနေပြီး အရက်ပြန်၊ဂွမ်း၊အနာကျက်ဆေးရည်၊ပတ်တီး စသည့် ဆေးဝါးပစ္စည်းများပင်လိုအပ်နေပြီး ဆေးဝါးလိုအပ်ချက်များစွာ ရှိနေတယ်လို့ သိရပါတယ်။
ဓာတ်ပုံ – လူမှုကွန်ရက်