စစ်ကောင်စီက ရက် ၂၀ အပစ်ရပ်တယ်ဆိုတာ နိုင်ငံတကာအသိအမှတ်ပြုခံချင်လို့ ခုတုံးလုပ်တာ ဖြစ်တယ်လို့ KNU ပြော
စစ်ကောင်စီက ရက် ၂၀ ကြာ ယာယီအပစ်ရပ်တယ်ဆိုတာဟာ ဒီကနေ့ဧပြီလ ၄ ရက် ထိုင်းနိုင်ငံမှာ ကျင်းပတဲ့ ၆ ကြိမ်မြောက် ဘင်္ဂလားပင်လယ်အော်ဘက်စုံပူးပေါင်းဆောင်ရွက်ရေး BIMSTEC ထိပ်သီးအစည်းအဝေးကို တက်ရောက်ပြီး နိုင်ငံတကာအသိအမှတ်ပြုခံရအောင် ခုတုံးလုပ်တာသာဖြစ်ပြီး အပြောနဲ့အလုပ် မညီဘူးလို့ ကရင်အမျိုးသားအစည်းအရုံး KNU က ဒီကနေ့ မနက်မှာ ပြောဆိုထားပါတယ်။
စစ်ကောင်စီဟာ ပြည်သူတွေ အင်အားပြင်း သဘာဝဘေး မြေငလျင်ဒဏ် ခံစားနေရတဲ့အချိန်မှာ လေယာဉ်တွေ၊ ဒရုန်းတွေနဲ့ အစဉ် ရပ်တန့်ခြင်းမရှိ ဗုံးကြဲနေခဲ့ပြီး ယခုအခါ ယာယီပစ်ခတ်တိုက်ခိုက်မှု ရပ်စဲကြောင်း ဟန်ပြ ထုတ်ပြန်ခဲ့ပြီး အရပ်သားပြည်သူတွေရှိရာကို ရည်ရွယ်ချက်ရှိရှိ တိုက်ခိုက်နေလို့ ငလျင်ဘေးသာမကာ လက်နက်ကြီးနဲ့ လေကြောင်းတိုက်ခိုက်မှု တွေကြား စိုးထိတ်စွာ နေထိုင်နေရမြဲဖြစ်တယ်လို့ ဆိုပါတယ်။
“ BIMSTEC ထိပ်သီးအစည်းအဝေးသို့ တက်ရောက်ပြီး နိုင်ငံတကာ အသိအမှတ်ပြုမှုခြင်းအား လက်ခံရန်အတွက် ကြိုးစားချဉ်းကပ်နေခြင်းနဲ့ ၎င်းတို့အာဏာတည်မြဲရေးအတွက် ရှေးရှုနေခြင်းသာဖြစ်ပြီး နိုင်ငံတကာကို ခုတုံးသဖွယ်သတ်မှတ်ကာ လူသားဆန်ခြင်းမရှိ၊ နိုင်ငံရေးစိတ်ဆန္ဒမရှိပဲ အပြောနဲ့အလုပ် လက်တွေ့မကိုက်ညီတာကိုထင်ရှားစွာသိနိုင်တယ် “လို့ KNU က ထုတ်ပြန်ပြောဆိုထားပါတယ်။
လက်ရှိမှာ စစ်ခေါင်းဆောင် မင်းအောင်လှိုင်က ဘန်ကောက်မှာ ကျင်းပနေတဲ့ ၆ ကြိမ်မြောက် ဘင်္ဂလားပင်လယ်အော်ဘက်စုံပူးပေါင်းဆောင်ရွက်ရေး BIMSTEC ထိပ်သီးအစည်းအဝေးကို ရောက်ရှိနေပါတယ်။
မနေ့က ဧပြီလ (၃) ရက်နေ့ မနက် ၁၁ နာရီခန့်မှာ KNU ထိန်းချုပ်နယ်မြေ ခလယ်လွီထူခရိုင်၊ မူး(မုန်း) မြို့နယ်၊ ဟောခို့ဂေါ် (ငထွေစုပ်) ကျေးရွာအတွင်းကို လက်နက်ကြီးနဲ့ ပစ်ခတ်ခဲ့သောကြောင့် အသက် ၂၄ နှစ်အရွယ် နော်ခူခူ ထိခိုက်ဒဏ်ရာရရှိခဲ့ပြီး နော်နီးနာဖော နဲ့ စောဘေးလေး တို့ရဲ့ နေအိမ်တွေ ထိခိုက်ပျက်စီးခဲ့တယ်လို့ KNU ဗဟိုက ထုတ်ပြန်ထားပါတယ်။
ဒါ့အပြင် အပစ်ရပ်ကြေညာချက်ထုတ်ခဲ့တဲ့ ဧပြီလ (၂) ရက်နေ့ ညနေ ၅း၀၀ နာရီတွင် အာဏာသိမ်းစစ်ကောင်စီက ခလယ်လွီထူခရိုင်၊ ဆောထိ(ရွှေကျင်) မြို့နယ်၊ ညောင်ခြေထောက်ကျေးရွာအတွင်းကို ၈၁မမ လက်နက်ကြီးနဲ့ ပစ်ခတ်ခဲ့လို့ နေအိမ်တွေ ထိခိုက်ပျက်စီးခဲ့တယ်လို့လည်း ဆိုပါတယ်။
စစ်ကောင်စီဟာ အပစ်ရပ်တယ်လို့ ထုတ်ပြန်ထားပေမဲ့ နိုင်ငံတဝန်း စစ်ကြောင်းထိုးတာ လေကြောင်းတိုက်ခိုက်တာ ဒရုန်းအသုံးပြုတိုက်ခိုက်တာ ပါရာမော်တာနဲ့အရပ်သားတွေကို ပစ်ခတ်တိုက်ခိုက်တာ လက်နက်ကြီးနဲ့ ပစ်ခတ်တိုက်တာတွေ လုပ်ဆောင်နေဆဲဖြစ်ပါတယ်။
ဓာတ်ပုံ- စစ်ကောင်စီသည်ယာယီပစ်ခတ်တိုက်ခိုက်မှုရပ်စဲရေး ထုတ်ပြန်အပြီး လက်နက်ကြီးဖြင့် ပစ်ခတ်သဖြင့် ထိခိုက်ပျက်စီးခဲ့ရသည့် ပုံရိပ်များ။
ဓာတ်ပုံ – KNU