Breaking News လားရှိုးမြို့ကနေ MNDAA ပြန်လည်ဆုတ်ခွာဖို့ ပြင်ဆင်နေ
လားရှိုးမြို့ကနေ ကိုးကန့်တပ် MNDAA ပြန်လည်ဆုတ်ခွာဖို့ ပြင်ဆင်နေပြီလို့ လားရှိုးမြို့ကို ရောက်ရှိနေတဲ့ CJ Platform ရဲ့ သတင်းအရင်းအမြစ်က ဧပြီ ၄ ရက်နေ့ နေ့လယ် ၁၂နာရီမှာ သတင်းပေးပို့လာပါတယ်။
“တပ်တွေပြန်ဆုတ်ဖို့ ပြင်နေပြီ သိန္နီမြို့နဲ့ ကွတ်ခိုင်ဘက်ကို လိုက်ချင်သူတွေ လိုက်လို့ရတယ်လို့ သူတို့ပြောတယ်၊ မြို့ပေါ်မှာ အကုန်ရှုပ်ထွေးကုန်ပြီး ပစ္စည်းတွေသိမ်းသူနဲ့ အခြားကို ပြေးဖို့ ပြင်သူတွေ ပြင်ကုန်ကြပြီး စစ်ကောင်စီ ပြန်ဝင်လာမှာကို တစ်မြို့လုံးက မလိုလားကြဘူး”လို့ CJ Platform ရဲ့ သတင်းရင်းမြစ်က ပြောပါတယ်။
တရုတ်ရဲ့ ကြားဝင်ညှိနှိုင်းမှုအရ ကိုးကန့်တပ်ဟာ လားရှိုးမြို့ကို စစ်ကောင်စီထံ ပြန်လည်လွှဲပြောင်းမယ်လို့ သတင်းတွေ ထွက်ပေါ်နေပေမဲ့ မြို့ပေါ်မှာ အုပ်ချုပ်ရေးလုပ်ငန်းတွေ အကောင်အထည်ဖော်ဆောင်နေခဲ့ပါတယ်။
CJ Platform က ရရှိထားတဲ့ သတင်းအပေါ် တာဝန်ရှိသူတွေရဲ့ အတည်ပြုချက်ရရှိနိုင်ဖို့ ဆက်သွယ်ထားဆဲဖြစ်ပြီး တာဝန်ရှိသူတွေရဲ့ အတည်ပြုချက်ကို ယခု သတင်းဖော်ပြချိန်ထိ ပြန်လည်လက်ခံ မရရှိသေးပါဘူး။