လောင်းလုံးမှာ ခြောက်ရက်ဆက် တိုက်ပွဲပြင်းထန်နေလို့ ဒေသခံ ၈၀၀၀ ခန့် ထွက်ပြေးတိမ်းရှောင်နေရ
တနင်္သာရီတိုင်း၊ လောင်းလုံးမြို့နယ်၊ ကျောက်နီမော်ဒေသမှာ ဒီဇင်ဘာလ ၂၃ ရက်နေ့ကနေ ဒီကနေ့ ဒီဇင်ဘာ ၂၈ ရက်အထိ ခြောက်ရက်ဆက် တိုက်ပွဲပြင်းထန်နေတာကြောင့် ဒေသခံ ၈၀၀၀ ခန့်ဟာ ဘေးလွတ်ရာ ထွက်ပြေးနေရတယ်လို့ အဲဒီမြို့နယ် ပြည်သူ့အုပ်ချုပ်ရေးအဖွဲ့(ပအဖ)ဆီကနေ သိရပါတယ်။
ကျောက်နီမော်ရှိ စစ်ကောင်စီတပ်စခန်းတွေကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာ ဖြစ်တယ်လို့ သိရပါတယ်။
တိုက်ပွဲတွေအတွင်း စစ်ကောင်စီတပ်ရဲ့ ဒေသခံနေအိမ်တွေ မီးရှို့ဖျက်ဆီးတာနဲ့ လေကြောင်းတိုက်ခိုက်မူတွေကြောင့် ပြည်သူတွေ ထိခိုက်တာတွေရှိနေပေမဲ့ လက်ရှိအချိန်မှာ အတည်မပြုနိုင်သေးဘူးလို့ ပအဖတာ၀န်ရှိသူတစ်ဦးက CJ Platform ကို ပြောပါတယ်။
လက်ရှိဖြစ်ပေါ်နေတဲ့ တိုက်ပွဲတွေကြောင့် ကျောက်နီမော်၊ အောက်ကျောက်ဝပ်၊ ကျောက်မတ္တပ်၊ ညောပြင်၊ ဇလွတ်ရွာတို့အပါအဝင် ရှစ်ရွာခန့်က ဒေသခံ ၈၀၀၀ ခန့်ဟာ နေရပ်စွန့်ခွာ ထွက်ပြေးနေကြရတာလို့ သူက ဆက်ပြောပါတယ်။
စစ်ကောင်စီတပ်ဘက်ကလည်း သူတို့စခန်းတွေမကျရေး မြေပြင်သာမက ရေကြောင်း၊ လေကြောင်းတွေကနေ အပြင်းထန်ခုခံနေတယ်လို့ စစ်ရေးသတင်းရင်းမြစ်တွေက ဆိုပါတယ်။
လောင်းလုံးမြို့နယ်အတွင်း စစ်ကောင်စီတပ်က လေကြောင်းတိုက်ခိုက်မှုတွေ အချိန်မရွေး လုပ်ဆောင်လာနိုင်တာကြောင့် ပြည်သူတွေအနေနဲ့ လုံခြုံဘေးကင်းနိုင်တဲ့ နေရာ၊ ဗုံးခိုကျင်းတွေအတွင်း နေထိုင်ကြဖို့ အဲဒီမြို့နယ်ပအဖနဲ့ ကာကွယ်ရေးတပ်ဖွဲ့တွေက အသိပေးထုတ်ပြန်ထားပါတယ်။
အဲဒီက စစ်ဘေးရှောင်တွေကို မြို့နယ်နဲ့ ရပ်/ကျေး ပအဖတွေအပြင် စစ်ရှောင်အရေးကူညီပေးနေတဲ့ အရပ်ဖက်အဖွဲ့စည်းတွေ၊ တော်လှန်ရေးအဖွဲ့တွေက အကူအညီပေးနေတယ်လို့ အထက်ပါတာ၀န်ရှိသူက ပြောပါတယ်။
ဒါ့အပြင် ထွက်ပြေးတိမ်းရှောင်နေကြရတဲ့ ဒေသခံတွေဟာ ရက်ရှည်တိမ်းရှောင်လာရတာနဲ့အမျှ စားနပ်ရိက္ခာ လိုအပ်ချက်တွေရှိနေတယ်လို့ သိရပါတယ်။
ဓာတ်ပုံ – လူမှုကွန်ရက်