စစ်ကောင်စီက တစ်လတွင်း ပြည်သူပိုင်နေအိမ် ၁၄၀၀ နီးပါးမီးရှို့ဖျက်စီးသကဲ့သို့ လူ ၂ ဦးကို မီးရှို့သတ်ဖြတ်ဟု NUG မီးသတ်တပ်ဖွဲ့ဆို
စစ်ရာဇဝတ်မှုများကျူးလွန်နေသော စစ်ကောင်စီ၏ စက်တင်ဘာတစ်လအတွင်း မီးရှို့ဖျက်စီးမှု ၅၇ ကြိမ်တွင် ပြည်သူပိုင် နေအိမ် ၁၄၀၀ နီးပါးပျက်စီးဆုံးရှုံးခဲ့ရပြီး စာသင်ကျောင်းနှင့် ဘာသာရေးအဆောက်အအုံများလည်းပျက်စီးခဲ့ကြောင်း အမျိုးသားညီညွတ်ရေးအစိုးရ(NUG)၏ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန၊ မီးသတ်ဦးစီးဌာနက ထုတ်ပြန်ကြေညာသည်။
ထို့ပြင် မီးရှို့သတ်ဖြတ်ခံရသူ ၂ ဦး၊ ဘာသာရေးအဆောက်အဦး ၁ လုံး၊ ဆေးရုံ/ဆေးပေးခန်း ၁ ခု၊ စာသင်ကျောင်း ၃ ခုတို့ မီးရှို့ဖျက်ဆီးခဲ့ကြောင်း ယင်းထုတ်ပြန်ချက်အရ သိရသည်။
မီးရှိုဖျက်စီးခံရသည့် တိုင်းနှင့် ပြည်နယ်များမှာ ကချင်၊ ကရင်ပြည်နယ်တို့အပါအဝင် စစ်ကိုင်း၊ ပဲခူး၊ မကွေး၊ မန္တလေးနှင် တနင်္သာရီတိုင်းတို့မှ နေအိမ်၊ ဘာသာရေးအဆောက်အအုံ၊ ဆေးရုံ/ဆေးပေးခန်းများနှင့် စာသင်ကျောင်းများပါဝင်ခဲ့ပြီး ကချင်ပြည်နယ်နှင့် မကွေးတိုင်းတို့မှ ၁ ဦးစီ မီးရှို့သတ်ဖြတ်ခံခဲ့ရကြောင်း သိရသည်။
ယခုဖော်ပြအပ်သောအချက်အလက်များသည် လွတ်လပ်သောသတင်းမီဒီယာများ၊ အရပ်ဘက်အဖွဲ့စည်းများ၏ ထုတ်ပြန်ချက်များနှင့် မြေပြင်ရှိပြည်သူလူထုမှ ပေးပို့သော သတင်းအချက်အလက်များကို စိစစ်ဖော်ပြခြင်းဖြစ်ပြီး ယခုဖော်ပြသောအချက်အလက်များထက် မြေပြင်တွင် စစ်ကောင်စီ၏ အကြမ်းဖက်မှုမှာပို၍ များပြားနိုင်ကြောင်း NUG မီးသတ်ဌာန၏ ထုတ်ပြန်ချက်တွင် ဖော်ပြထားသည်။