ယင်းမာပင်ခရိုင်အမှတ်(၂၇)တပ်ရင်း တပ်ရေးဗိုလ် မင်းကိုနှင့် ဆက်သွယ်မေးမြန်းချက်

---

နွေဦးတော်လှန်ရေးနဲ့အတူ မွေးဖွားလာတဲ့ စစ်ကိုင်းတိုင်း၊ ယင်းမာပင်ခရိုင်အခြေစိုက် အမှတ် ၂၇ တပ်ရင်းဟာ တော်လှန်ရေးအတွက် ဘာတွေလုပ်ဆောင်နေလဲ။ သူတို့ရဲ့ အခက်အခဲ၊ လိုအပ်ချက်က ဘာတွေလဲ။ NUG အပေါ်အမြင် စတာတွေနဲ့ပတ်သက်ပြီး တပ်ရေးဗိုလ် မင်းကိုထံ CJ Platform သတင်းဌာနမှ ဆက်သွယ်မေးမြန်းထားမှုများကို ကောက်နုတ်ဖော်ပြအပ်ပါတယ်။

မေးမြန်းသူ- မင်းထက်

CJ – ဆရာတို့ တပ်ရင်းအနေနဲ့ အဓိက ဘယ်ဒေသတွေမှာ စစ်ရေးလှုပ်ရှားမှုလုပ်နေတာပါလဲ။ ပြီးတော့ ဒီတပ်ရင်းကို ဘယ်လိုဖွဲ့စည်းဖြစ်ခဲ့တယ် ဆိုတာလေးလည်း ပြောပြပေးပါဦး။

ဗိုလ် မင်းကို- ယင်းမာပင်ခရိုင်မှာပဲ စစ်ရေးအဓိကထား လှုပ်ရှားတယ်။ နောက်မေးခွန်းတွက် အဲဒါမဖြေလို့ရလား။

CJ – ဟုတ်ကဲ့ ။ ဆရာတို့အဖွဲ့အနေနဲ့က NUG ၊ MOD ရဲ့ လက်အောက်မှာ ရှိနေတာလား။ Local အနေနဲ့ပဲ သွားနေတာလား။

ဗိုလ်မင်းကို- MOD ရဲ့အောက်မှာပါ။ အမှတ်(၁) စစ်ဒေသရဲ့ အောက်က ယင်းမာပင်ခရိုင်အမှတ်(၂၇) တပ်ရင်းပါဗျ။

CJ – NUG ရဲ့ စီမံခန့်ခွဲမှုအပေါ် အားရမှုရှိလား။ ဘာတွေအကြံပြုလိုတာမျိုး ရှိပါသလဲ။

ဗိုလ်မင်းကို- အဲဒီလိုတော့ မရှိသေးပါဘူး။

CJ – တိုက်ပွဲဖော်ဆောင်ရာမှာရော ဘယ်လိုလုပ်ဆောင်ပါသလဲ။ မဟာမိတ်အဖွဲ့တွေနဲ့ ပေါင်းတိုက်တာမျိုးရှိတော့လေ။ လက်နက်မျှဝေသုံးစွဲမှုကို ဘယ်လိုမျိုး လုပ်ဆောင်ကြပါသလဲ။

ဗိုလ်မင်းကို – တိုက်ပွဲကတော့ ကွပ်ကဲမှုအောက်ကနေ စစ်အာဏာရှင်စနစ်တော်လှန်နေတဲ့ ကာကွယ်ရေးတပ်ဖွဲ့တွေနဲ့ ပူးပေါင်းဆောင်ရွက်ပါတယ်။

CJ – ဆရာတို့အဖွဲ့အနေနဲ့ ယင်းမာပင်အတွင်းမှာ တိုက်ပွဲတွေ ဆက်တိုင် ဆင်နွှဲနေကြရတယ် သိရတယ်ဗျ။ ဆိုတော့ တိုက်ပွဲတွေဆက်တိုက် ဆင်နွှဲနေကြရတော့ အဖွဲ့အနေနဲ့ ဘာတွေ လိုအပ်ချက် ရှိနေပါသလဲ။

ဗိုလ်မင်းကို- လက်နက်ခဲယမ်းလည်း ပြန်ဖြည့်ဖို့လိုတယ်။ ဆောင်းရာသီဖြစ်တော့ ရှေ့တန်းရဲဘော်တွေအတွက် အနွေးထည်ကအစ လိုအပ်ချက်ရှိပါတယ်။

CJ – ဒီလို လက်နက်ခဲယမ်း လတ်တလောလိုအပ်နေတာက ရန်ပုံငွေလိုအပ်ချက်ရှိနေလို့လား။ ဒါမှမဟုတ် ၀ယ်ယူမှုအပိုင်းမှာ အဆင်ပြေမှု မရှိသေးလို့ပါလား။

ဗိုလ်မင်းကို- ရန်ပုံငွေ အဓိက လိုအပ်တာပါ။ ရန်ပုံငွေ ရှိရင် ဖြည့်ဆည်းနိုင်ဖို့ မခက်ခဲပါဘူး။

CJ – လိုအပ်ချက်တွေဖြည့်ဆည်းဖို့ရော ကမ်ပိန်းလိုမျိုးတွေ လုပ်ဖို့ရှိလား။ လက်ရှိရော လုပ်နေလား။ အရင်က‌ရော လုပ်ဖူးပါသလား။

ဗိုလ်မင်းကို- အရင်ကတော့ လက်နက်ခဲယမ်းအတွက် ကမ်ပိန်းလုပ်ဖူးတယ်။ လက်ရှိတော့ ကမ်ပိန်းမရှိပါဘူး။ ရတဲ့ထောက်ပို့အနည်းငယ်နဲ့ပဲ အဆင်ပြေသလို ရပ်တည်နေပါတယ်။ ကမ်ပိန်းလုပ်ဖို့တော့ ရှိပါတယ်။

CJ – တပ်ရင်းထံ NUG ဘက်ကရော ထောက်ပံ့မှုတွေ ရခဲ့သလား။ အဖွဲ့ရဲ့ လိုအပ်ချက်တွေဖြည့်ဖို့တွက် လုံလောက်မှု ရှိခဲ့ပါသလား။

ဗိုလ်မင်းကို – MOD ဘက်က တပ်ရင်းတိုင်းထောက်ပံ့တဲ့ ထောက်ပံ့မှုကတော့ ရရှိတယ်။ လိုအပ်ချက်ကတော့ ကောင်းသ‌ထက်ကောင်းအောင် လုပ်ကြရတော့ အမြဲရှိနေတာပါပဲ။

CJ – ပြည်သူတွေရဲ့ထောက်ပံ့မှုအခြေနေရော ဘယ်လိုရှိနေပါသလဲ။ ယခင်ကထက် လျော့နည်းလာသလား။ ပုံမှန်လေးပဲရှိနေပါသလား။

ဗိုလ်မင်းကို- ပြည်သူတွေလည်း ခက်ခဲနေကြတော့ အနည်းငယ်တော့ လျော့နည်းလာတယ်လို့ ပြောလို့ရတယ်။

CJ – အဖွဲ့အနေနဲ့ရော ရှေ့ဆက်ပြီး ဘာတွေလုပ်ဆောင်ဖို့ ရှိပါသလဲ။

ဗိုလ်မင်းကို- စစ်အာဏာရှင်စနစ် အမြန်ဆုံး အဆုံးသတ်နိုင်ဖို့ လက်နက်ကိုင်ပြီး တိုက်ပွဲတွေ ဖော်ဆောင်ပါမယ်။ ကျန်တာတော့ ကွပ်ကဲညွှန်ကြားမှုအတိုင်း လုပ်ဆောင်မှာပါ။

CJ – နောက်ထပ် ဆရာတို့အနေနဲ့ ပြည်သူတွေအပေါ် ပြောချင်၊ ပေးချင်တဲ့သတင်းစကား ပြောပေးစေချင်ပါတယ်။

ဗိုလ်မင်းကို – ပြည်သူတွေကိုပြောချင်တာကတော့ တော်လှန်ရေးအပေါ် စိတ်ဓာတ်မကျ ကြဖို့နဲ့၊ တော်လှန်ရေး နိုင်ကို နိုင်ရမယ်ဆိုတာ ပြောချင်ပါတယ်။