အောင်မင်္ဂလာအဝေးပြေးကားဝင်းအတွင်းက လူခေါ်ပွဲစား လူမိုက်တွေ အဖမ်းခံရ
ရန်ကုန်တိုင်း၊ မင်္ဂလာဒုံမြို့နယ်၊ အောင်မင်္ဂလာအဝေးပြေးကားဝင်းအတွင်း အငှားယာဉ်တွေနဲ့ ခရီးသည်တွေဆီက ခြိမ်းခြောက်ငွေတောင်းနေတဲ့ လူခေါ်ပွဲစားတွေကို မေလ ၉ ရက်မှာ စစ်အုပ်စုလက်အောက်ခံရဲတွေက ဖမ်းဆီးခဲ့တယ်လို့ ယာဉ်မောင်းတွေဆီက သိရပါတယ်။
မေလ ၉ ရက် နေ့လယ်က လူခေါ်ပွဲစား တာတီး (ခ) ဇော်လင်းထွန်းကို အမှတ် (၃) လမ်းမကြီး၊ ရခိုင်ကျောင်းမှတ်တိုင်အနီးမှာ ဖမ်းမိခဲ့ပြီး ချစ်သား (ခ) စိုးသီဟကို ခရေပင်လမ်းနဲ့ အမှတ် (၃) လမ်းဆုံမှာ ထပ်မံဖမ်းမိကာ ခေါင်းဆောင်ဖြစ်သူ ဂျပန်ကြီးကို ရဲတွေက ရှာဖွေနေတယ်လို့ ယာဉ်မောင်းတစ်ဦးက CJ Platform ကို ပြောပါတယ်။
“ဝင်းထဲက Taxi နဲ့ ကယ်ရီသမားတွေဆီက လစဉ်ကြေးတောင်းတယ်။ ခရီးသည်တွေကို သူတို့လိုင်းကြေးယူထားတဲ့ Taxi ကားတွေစီးဖို့ ဖိအားပေးတယ်။ ကားခကို သတ်မှတ်ချက်ကြေးထက် ပိုတောင်းတယ်။ အောင်မင်္ဂလာအဝေးပြေးဝင်းထဲမှာ ဂျပန်ကြီး၊ တာတီး၊ ချစ်သားဆို မသိတဲ့သူမရှိဘူး။ သူတို့နောက်မှာ တပည့်တပန်း လူခေါ်ပွဲစားတွေ အများကြီး။ အခု တာတီးနဲ့ ချစ်သား မိသွားပြီဆိုတော့ ဂျပန်ကြီးပဲ ကျန်တော့တယ်” လို့ ပြောပါတယ်။
အောင်မင်္ဂလာအဝေးပြေးကားဝင်းထဲမှာ ဂျပန်ကြီး၊ တာတီး၊ ချစ်သားတို့အပြင် ခိုင်မင်း၊ မျိုးအောင်၊ စိုးသူ၊ ကြက်ရိုး၊ ဂန်ဂျား၊ မည်းကြီးစတဲ့ တစ်ကိုယ်တော် လူခေါ်ပွဲစား လူမိုက်ပေါက်စများရှိပြီး ဆိုက်ရောက်ဂိတ်၊ ပစောက်ဝန်း၊ အီလိုက်ဝန်း၊ ပုဂံလမ်း၊ မြင်းခြံလမ်း၊ မကွေးလမ်း၊ မုံရွာလမ်း၊ တောင်ကြီးလမ်းတွေမှာ အခြေချတယ်လို့ ဝင်းအတွင်းနေသူတစ်ဦးက CJ Platform ကို ပြောပါတယ်။
“သူတို့ ၃ ယောက်မိလို့လည်း ပြဿနာက မပြီးသွားဘူး၊ အများကြီး ကျန်သေးတယ်။ အကုန်လုံးက စိုက်ပျိုးရေးဓမ္မာရုံမှတ်တိုင်ဘက်က။ အုပ်ချုပ်ရေးရော ရဲတွေရော စည်ပင်ရော ပေးကျွေးထားတော့ အကုန်နှုတ်ပိတ်နေတာ။ ဘယ်သူတွေ ဒုက္ခရောက်လဲဆိုတော့ ခရီးသည်တွေနဲ့ ယာဉ်မောင်းတွေပဲ” လို့ ပြောပါတယ်။
လူခေါ်ပွဲစားအများစုဟာ အောင်မင်္ဂလာအဝေးပြေးအတွင်း ခရီးသွားပြည်သူတွေကို ငွေကြေးတောင်းခံခြင်း၊ အုပ်စုဖွဲ့လုယက်ခြင်း၊ အငှားယာဉ် မငှားပါက ရိုက်နှက်ခြင်းများရှိတယ်လို့ ခရီးသွားလာသူတစ်ဦးက CJ Platform ကို ပြောပါတယ်။
“မန္တလေးကပြန်လာတုန်းက အထုပ်ကို အတင်းဆွဲပြီး ကားငှားခိုင်းတာ။ မငှားဘူးဆို အထုပ်ခတောင်းတယ်။ မပေးတော့ ဆဲဆိုသွားတယ်။ ကောင်လေးတစ်ယောက်ဆို အထုပ်တွေ ဝိုင်းသယ်ရင်း ဖုန်းလုသွားလို့ပြောတာကို ဝိုင်းရိုက်တယ်။ ဘယ်သူမှ ဝိုင်းဆွဲမယ့်သူ မရှိဘူး။ မကြာခဏ လုယက်မှုဖြစ်တာလည်း အောင်မင်္ဂလာအဝေးပြေးကားဝင်းပဲ။ အမှန်ဆို အဝေးပြေးကားဝင်းတွေမှာ လူခေါ်ပွဲစားဆိုတာ မထားသင့်တော့ဘူး” လို့ သုံးသပ်ပြောဆိုပါတယ်။
စစ်တပ်အာဏာသိမ်းပြီး ၂၀၂၁ ခုနှစ်မှစ၍ အောင်မင်္ဂလာအဝေးပြေးကားဝင်းနဲ့ ဒဂုံဧရာအဝေးပြေးကားဝင်းထဲက လူခေါ်ပွဲစားလုပ်ငန်းကို လူမိုက်တွေက စစ်တပ်နဲ့ ပူးပေါင်းပြီး လုပ်ဆောင်လာတာ ဖြစ်ပါတယ်။