ရန်ကုန်မှာ သင်္ကြန်ကာလအတွင်း လူငယ် ၃၀ဦးထက်မနည်း ဖမ်းဆီးခံရ
သင်္ကြန်အကြိုနေ့ကနေ အတက်နေ့အထိ ရန်ကုန်တိုင်း မှော်ဘီ၊ တိုက်ကြီး၊ အင်းစိန်၊ ရွှေပြည်သာနဲ့ လှိုင်သာယာမြို့နယ်တို့မှာ ဖမ်းဆီးခံရတဲ့ လူငယ် ၃၁ ဦးရှိတယ်လို့ မြို့ခံတွေဆီက သိရပါတယ်။
ဧပြီလ ၁၆ ရက်က မှော်ဘီမြို့နယ် ဗဟိုမဏ္ဍပ်မှာ ခိုက်ရန်ဖြစ်ပွားတဲ့ လူငယ် ၄ ဦးကို စစ်အုပ်စုတပ်နဲ့ ရဲတွေက ဖမ်းဆီးခဲ့ပြီး မှော်ဘီမြို့မရဲစခန်းမှာ ပုဒ်မ ၃၂၃ နဲ့ အမှုဖွင့်ထားတယ်လို့ မြို့ခံတစ်ဦးက CJ Platform ကို ပြောပါတယ်။
“ကောင်လေးတစ်ယောက်ကို အုပ်စုဖွဲ့ပြီး ဝိုင်းရိုက်တာ၊ စစ်တပ်ရော ရဲရော လိုက်ဖမ်းတာ ၄ ယောက်မိတယ်။ မိတဲ့ကောင်လေးတွေက ဥက္ကံက။ အခုသူတို့ကို ရဲစခန်းက ပုဒ်မ ၃၂၃ နဲ့ အမှုဖွင့်ထားတယ်” လို့ ပြောပါတယ်။
လှိုင်သာယာအနောက်ပိုင်းမြို့နယ် အလယ်ကျေးရွာမှာ ဧပြီလ ၁၅ ရက်က ရေလောင်းရာမှ ရန်ဖြစ်ပြီး ဓားထိုးမှုဖြစ်ခဲ့ရာ တစ်ဦးသေဆုံးပြီး တစ်ဦး ဒဏ်ရာရခဲ့ကာ ပြစ်မှုကျူးလွန်သူကို ရဲကမဖမ်းဘဲ လမ်းသွားလမ်းလာ လူငယ် ၅ ဦးကို ဖမ်းဆီးခဲ့တယ်လို့ မြို့ခံတစ်ဦးက CJ Platform ကို ပြောပါတယ်။
“ရွာလယ်လမ်းမှာ ပခုံးချင်းတိုက်မိပြီး ရန်ဖြစ်တာ၊ ရွာထဲက လူငယ်နှစ်ယောက်ကို ဘယ်ကလာတဲ့သူတွေမှန်းမသိဘူး ဓားနဲ့ထိုးပြီး ထွက်ပြေးသွားတာ၊ တစ်ယောက်သေတယ် တစ်ယောက်ဒဏ်ရာရတယ်။ ဓားနဲ့ထိုးတဲ့သူကို ရဲကမမိတော့ ရေပက်ခံထွက်လာတဲ့ ကောင်လေး ၅ ယောက်ကို ဖမ်းသွားတယ်” လို့ ပြောပါတယ်။
ဧပြီလ ၁၄ ရက်ကလည်း ရွှေပြည်သာမြို့နယ် မဏ္ဍပ်တွင် လူငယ်နှစ်ဦး စကားများရာမှ အဖွဲ့များပါလာပြီး နှစ်ဖက်ခိုက်ရန်ဖြစ်ပွားကြရာ ၂ ဦး ဒဏ်ရာရပြီး ၇ ဦး ဖမ်းဆီးခံရတယ်လို့ မြို့ခံတစ်ဦးက CJ Platform ကို ပြောပါတယ်။
“သင်္ကြန်အကျနေ့က ရွှေပြည်သာမဏ္ဍပ်မှာ ရန်ဖြစ်ကြတာ ၂ ဦး ဒဏ်ရာရတယ်။ တော်သေးတယ် ဓားတွေသာပါရင် လူတွေသေမှာ။ နှစ်ဖက်စလုံးကို ရဲတွေက ဖမ်းထားတယ်” လို့ ပြောပါတယ်။
စစ်အုပ်စုတပ်နဲ့ ရဲတွေက သင်္ကြန်အတက်နေ့က အင်းစိန်မြို့နယ် မင်းစေတီဘုရားနားတွင် ခိုက်ရန်ဖြစ်ပွားခဲ့တဲ့ လူငယ် ၃ ဦးကို ဖမ်းဆီးပြီး အင်းစိန်မြို့မရဲစခန်းတွင် အမှုဖွင့်ထားတယ်လို့ မြို့ခံတွေဆီက သိရပါတယ်။
အလားတူ သင်္ကြန်အကြိုနေ့ကလည်း ပြည်သူ့ရင်ပြင်မှာ မူးယစ်ရမ်းကားပြီး ခိုက်ရန်ဖြစ်ပွားတဲ့ လူငယ် ၆ ဦးကို စစ်ကောင်စီတပ်က ဖမ်းခဲ့သလို မြို့တော်ခန်းမရှေ့မှာ စကားများရန်ဖြစ်ခဲ့တဲ့ လူငယ် ၅ ဦးကို ရဲတွေက ဖမ်းဆီးခဲ့တယ်လို့ သင်္ကြန်ရေပက်ခံထွက်သူတွေဆီက သိရပါတယ်။
ဓာတ်ပုံ – လူမှုကွန်ရက်