စစ်အုပ်စုက တစ်လအတွင်း ရခိုင်ပြည်ကို လေကြောင်းတိုက်ခိုက်မှု အကြိမ် ၄၀နီးပါး လုပ်ဆောင်ခဲ့ပြီး ပြည်သူ ၄၀နီးပါး သေဆုံးကာ ၈၀ကျော် ဒဏ်ရာရ
ရခိုင်ပြည်ထဲက အာရက္ခတပ်တော် (AA) ထိန်းချုပ်ထားတဲ့ မြို့တွေကို စစ်အုပ်စုက လေကြောင်းဗုံးကြဲတိုက်ခိုက်မှုနဲ့ လက်နက်ကြီးပစ်ခတ်မှုတွေ အခု နိုဝင်ဘာလအတွင်း ပိုမိုလုပ်ဆောင်လာတာကြောင့် အပြစ်မဲ့ ပြည်သူ ၄၀ နီးပါး သေဆုံးခဲ့ပြီး ၈၀ နီးပါး ထိခိုက်ဒဏ်ရာရရှိခဲ့တယ်လို့ AA တပ်ဖွဲ့ရဲ့ သတင်းထုတ်ပြန်ချက်တွေ အရ သိရပါတယ်။
ဒါဟာ ရှမ်းပြည်မြောက်ပိုင်း ကိုးကန့်တပ်မတော် (MNDAA)၊ တအာင်းတပ်မတော် (TNLA) တို့နဲ့ စစ်အုပ်စုတို့ကြား နှစ်ဖက်အပစ်အခတ် ရပ်ခဲ့ပြီးနောက်ပိုင်း AA တပ်ဖွဲ့ ထိန်းချုပ်ထားတဲ့ မြို့တွေကို ပစ်မှတ်ထား ဗုံးကြဲတိုက်ခိုက်မှုတွေ ပိုမိုလုပ်ဆောင်လာတာလည်း ဖြစ်ပါတယ်။
ပြီးခဲ့တဲ့ အောက်တိုဘာ ၂၉ ရက်ကနေ မနေ့ နိုဝင်ဘာ ၂၈ ရက်နေ့အထိ စစ်အုပ်စုက လေကြောင်းဗုံးကြဲတိုက်ခိုက်မှု၊ ဒရုန်းတိုက်ခိုက်မှုနဲ့ လက်နက်ကြီးပစ်ခတ်မှု အကြိမ် ၄၀ နီးပါး လုပ်ဆောင်ခဲ့ပြီး ရသေ့တောင်၊ ကျောက်ဖြူ၊ ပုဏ္ဏားကျွန်း၊ ပေါက်တော၊ မင်းပြား၊ မြောက်ဦး၊ ကျောက်တော်၊ ဂွနဲ့ စစ်တွေမြို့တို့ကို ပစ်မှတ်ထား တိုက်ခိုက်ခဲ့တာပါ။
အခုလို AA ထိန်းချုပ်ဒေသတွေကို စစ်အုပ်စုက ပစ်မှတ်ထား ဗုံးကြဲတိုက်ခိုက်မှု တိုးမြှင့်လုပ်ဆောင်လာတာဟာ အမ်း၊ သံတွဲ၊ တောင်ကုတ်နဲ့ ဂွမြို့တို့ကို စစ်အုပ်စုက ပြန်လိုချင်နေတာကြောင့်လို့ သတင်းတွေ ထွက်ပေါ်နေတာတွေလည်း ရှိနေပါတယ်။
ဒါပေမဲ့ AA တပ်တော်အနေနဲ့ အလွယ်တကူ လက်လွှတ်ပေးတာမျိုး မရှိနိုင်ဘူးလို့ မြန်မာ့စစ်ဘက်ရေးရာနှင့် လုံခြုံရေးဆိုင်ရာ လေ့လာရေးအဖွဲ့ (MDSI) က အဖွဲ့ဝင်တစ်ဦးကလည်း CJ Platform ကို ပြောပါတယ်။
“စစ်အုပ်စုဘက်က ဗုံးကြဲပြီး ဖိအားပေးတာတော့ လုပ်မှာပဲ၊ အေအေက လွယ်လွယ်နဲ့တော့ နယ်မြေတွေ လက်လွတ်မှာတော့ မဟုတ်ပါဘူး။ ဖြစ်ခြင်းဖြစ် နယ်မြေတွေ ပေးစရာမလိုဘဲနဲ့တောင် ခဏ အပစ်ရပ်တာမျိုးလောက်ပါပဲ၊ စစ်တပ်အတွက်က အဲလောက်ဆိုရင်တောင် အသက်ရှူ တော်တော်ချောင်သွားတာမှာ” လို့ MDSI အဖွဲ့ဝင်တစ်ဦးက ပြောပါတယ်။
ရှမ်းမြောက်ဒေသထဲမှာရှိတဲ့ တိုင်းရင်းသား တော်လှန်ရေးအဖွဲ့ (EROs) တွေဟာ တရုတ်နဲ့ နယ်မြေချင်းထိစပ်နေတာကြောင့် တရုတ်အစိုးရရဲ့ ဖိအားပေးမှုတွေနဲ့ အပစ်အခတ် ရပ်စဲခဲ့ပေမဲ့ AA တပ်တော်ကတော့ လက်ရှိအချိန်ထိ ဆက်လက် တိုက်ခိုက်နေဆဲဖြစ်တယ်လို့ သူက ဆက်ပြောပါတယ်။
AA ထိန်းချုပ်ဒေသတွေကို စစ်အုပ်စုရဲ့ ဗုံးကြဲတိုက်ခိုက်မှု လုပ်ဆောင်တာဟာ ရှမ်းမြောက်ဒေသ MNDAA နဲ့ TNLA တပ်ဖွဲ့တွေကို စစ်ရေး ဖိအားပေးလုပ်ဆောင်ခဲ့တဲ့ ပုံစံမျိုးနဲ့ အလားသဏ္ဍာန် တူနေတယ်လို့ CDM ဗိုလ်ကြီး ဇင်ယော်ကလည်း CJ Platform ကို ပြောပါတယ်။ MNDAA နဲ့ TNLA တပ်ဖွဲ့တွေကို စစ်အုပ်စုက တရုတ်အကူအညီနဲ့ တွေ့ဆုံ စကားပြောဆိုခဲ့ပြီးနောက် သူတို့ ပြန်ရယူလိုတဲ့ မြို့တွေကို တောင်းဆိုခဲ့တာပါ။
“ရခိုင်ကိုလုပ်တာကလည်း ရှေ့က ကိုးကန့်တို့၊ TNLA တို့ကိုလုပ်တဲ့ ပုံစံနဲ့ အလားတူ ဆင်တူနေတယ်။ စကားပြော ခါနီး၊ စစ်ရေးအရ ဖိအားပေး ခါနီးမှာ စစ်တပ်ရဲ့ လုပ်လေ့လုပ်ထ ရှိတဲ့ ပုံစံမျိုး ဖြစ်နေတယ်။ သူတို့ အရေးတကြီး လိုအပ်နေတာ တောင်ကုတ်၊ သံတွဲ၊ ဂွ၊ အမ်းမြို့တို့ပေါ့။ အဲ့ဘက်ကို စစ်မျက်နှာ ဖွင့်ဖို့ လုပ်လာတယ်” လို့ CDM ဗိုလ်ကြီး ဇင်ယော်ကလည်း CJ Platform ကို ပြောပါတယ်။
အမ်းမြို့မှာ စစ်အုပ်စု လက်လွှတ်ဆုံးရှုံးခဲ့ရတဲ့ အနောက်ပိုင်း တိုင်းစစ်ဌာနချုပ်ရှိနေပြီး သံတွဲမှာတော့ ရေတပ်ပင်မ ရေငုပ်နဲ့ ဆယ်ယူရေး တပ်စခန်း (CNDSD) ဌာနချုပ်စခန်းရှိနေတာပါ။ ဒါ့အပြင် စစ်အုပ်စုက ဧရာဝတီတိုင်း၊ ပဲခူးတိုင်းတို့နဲ့ ထိစပ်နေတဲ့ ဂွမြို့နဲ့ တောင်ကုတ်မြို့တို့ကို ပြန်လည် ရယူလိုနေတဲ့ သတင်းတွေ ထွက်ပေါ်နေပြီး ရခိုင်တောင်ပိုင်း တစ်ခုလုံးကို ပြန်လည် ထိန်းချုပ်လိုနေတာ ဖြစ်တယ်လို့ သိရပါတယ်။
စစ်အုပ်စုက လာမယ့် ဒီဇင်ဘာလကုန်ပိုင်းမှာ ကျင်းပမယ့် ရွေးကောက်ပွဲမှာ ရခိုင်ပြည်ထဲက စစ်တွေ၊ ကျောက်ဖြူ၊ မာန်အောင်မြို့တို့ ပါဝင်နေပြီး အခု နိုဝင်ဘာလအတွင်း ကျောက်ဖြူနဲ့ စစ်တွေမြို့တို့ကို လေကြောင်းဗုံးကြဲတိုက်ခိုက်မှု၊ လက်နက်ကြီးပစ်ခတ်မှုတွေ လုပ်ဆောင်ကာ စစ်ရေးအရ ဖိအားပေးမှုတွေလည်း ရှိနေပါတယ်။
လက်ရှိ ကျောက်ဖြူမြို့မှာ စစ်အုပ်စုနဲ့ AA တပ်ဖွဲ့တို့ တိုက်ပွဲ ပြင်းထန်နေပြီး စစ်တွေမြို့ ပတ်ပတ်လည်ကိုလည်း စစ်အုပ်စုက ပိတ်ဆို့ထားပါတယ်။ ဒါ့အပြင် AA ထိန်းချုပ်ထားတဲ့ မြို့တွေအပြင် စစ်အုပ်စုက သူတို့ ထိန်းချုပ်ထားတဲ့ စစ်တွေ၊ ကျောက်ဖြူမြို့တို့ကိုပါ လေကြောင်းတိုက်ခိုက်မှု၊ လက်နက်ကြီးပစ်ခတ်မှုတွေလည်း လုပ်ဆောင်နေတာကြောင့် ဘာသာရေး အဆောက်အအုံနဲ့ ဒေသခံ ပြည်သူ့နေအိမ်တွေ ထိခိုက်ပျက်စီးမှုတွေ ရှိနေပြီး အရပ်သားပြည်သူတွေ ထိခိုက်သေဆုံးနေတာတွေလည်း ရှိနေပါတယ်။
ဓာတ်ပုံ – AA