နာမည်ကြီး လိင်ပညာပေး ဗလော့ဂါ အမျိုးသမီး ပြည်သူ့ပါတီအတွက် မဲဆွယ်ပေး
လိင်မှုဆိုင်ရာ ပညာပေးဗီဒီယိုတွေ ရိုက်ကူးတင်ဆက်ပေးနေတဲ့ နာမည်ကြီး ဗလော့ဂါ V V Chan ဟာ ပြည်သူ့ပါတီရဲ့ ပဲခူးတိုင်းရုံးဖွင့်ပွဲကို ဩဂုတ် ၉ ရက်နေ့မှာ တက်ရောက်ခဲ့ပြီးနောက် ဖွင့်ပွဲမှာ သူပါဝင်တဲ့ ဓာတ်ပုံတွေနဲ့အတူ “ ရွှေမော်ဓောမှာ နားထွင်းမယ်။ ခေါင်းဆောင်ဆိုတာ ကိုယ်တွေကရွေးချယ်ရတာဖြစ်တယ် ခေါင်းဆောင်က ကိုယ်တွေကိုရွေးချယ်ရမှာမဟုတ်။” လို့ ဒီကနေ့မှာ ရေးတင်ခဲ့ပါတယ်။
ဒါ့အပြင် သူ့ရဲ့ နောက်ထပ် Facebook စာမျက်နှာကနေလည်း ဘယ်ဘက်ကမှ မဟုတ်ပေမယ့်
“ဘက်မဲ့နေတဲ့ပါတီမဟုတ်ပါ ပြည်သူ့ဘက်ကိုရပ်တည်ပြီး ပြည်သူ့အတွက်သာ အကျိုးမျှော်မှန်းတဲ့ ပြည်သူ့ပါတီဖြစ်ပါတယ်။” လို့လည်း ထပ်မံရေးသားခဲ့ပါတယ်။
စစ်ကော်မရှင်က ၂၀၂၅ ဒီဇင်ဘာနဲ့ ၂၀၂၆ ဇန်နဝါရီလတွေမှာ ရွေးကောက်ပွဲကျင်းပေးမယ်လို့ ကြေညာပြီးတဲ့ နောက် ပါတီတချို့ဟာ စည်းရုံးလှုပ်ရှားမှုတွေ အပြိုင်အဆိုင်လုပ်လာကြပါတယ်။ ဦးကိုကိုကြီး ဦးဆောင်တဲ့ ပြည်သူ့ပါတီကတော့ ပါတီရုံးဖွင့်ပွဲတွေကို အဓိကလုပ်ဆောင်နေတာ တွေ့ရပါတယ်။
စစ်တပ်ကျောထောက်နောက်ခံ ကြံခိုင်ရေးပါတီကလည်း မကြာခင်က စစ်တပ်ထောက်ခံတဲ့ အနုပညာရှင်ဆိုသူတွေ အပါအဝင်၊ စစ်တပ်ကိုထောက်ခံတဲ့ အမျိုးသားရေးလှုပ်ရှားသူတွေနဲ့ တွေ့ဆုံပြီး စည်းရုံးမှုတွေ လုပ်ဆောင်လာတာကို တွေ့ရပါတယ်။
စစ်ကော်မရှင်လက်အောက်ခံ ရွေးကောက်ပွဲကော်မရှင် က နိုင်ငံရေးပါတီ ၅၈ ပါတီကို ခွင်ပြုထားပေမယ့် လက်ရှိမှာတော့ ကြံခိုင်ရေးပါတီ (USDP)၊ ဒေါ်သက်သက်ခိုင်ရဲ့ ပြည်သူ့ရှေ့ဆောင်ပါတီ (PPP)၊ ဦးကိုကိုကြီးရဲ့ ပြည်သူ့ပါတီ (PP) နဲ့ တစည ပါတီတို့သာ ပါတီလှုပ်ရှားမှုတွေ အဓိက လုပ်ဆောင်နေတာကိုတွေ့ရပါတယ်။
စစ်ကော်မရှင်က ထွက်ပေါက်အဖြစ် ယူဆထားတဲ့ ရွေးကောက်ပွဲနဲ့ပတ်သတ်ပြီး အနောက်နိုင်ငံတွေနဲ့ အာဆီယံက ကန့်ကွက်မှုတွေ ရှိနေပြီး တော်လှန်ရေးအင်အားစုတွေနဲ့ EROs အများစုကလည်း ရွေးကောက်ပွဲကို လက်မခံကြောင်း ထုတ်ပြန်ထားကြပါတယ်။
ဓာတ်ပုံ – ပြည်သူ့ပါတီ Facebook