ကြာသပတေးနေ့အတွက် CJ Platform ရဲ့ အားကစားသတင်းတိုများစုစည်းမှု
လူးဝစ် စကယ်လီအတွက်အယူခံအောင်မြင်သွားတဲ့ အာဆင်နယ်
အာဆင်နယ်အသင်းဟာ ပြီးခဲ့တဲ့ စနေညတုန်းက ၀ုလ်ဗ်ကို အနိုင်ရခဲ့တဲ့ပွဲက လူးဝစ် စကယ်လီရဲ့ အနီကတ်ပြစ်ဒဏ်နဲ့ပတ်သက်ပြီး အယူခံဝင်ခဲ့ရာမှာတော့ အောင်မြင်ခဲ့တယ်လို့ သိရပါတယ်။ အဆိုပါပွဲစဉ်မှာ အာဆင်နယ်ရဲ့လူငယ်နောက်ခံလူ စကယ်လီဟာ ၀ုလ်ဗ်ကစာသမား ဒိုဟာတီကို တန်ပြန်တိုက်စစ်စတင်ချိန် ၀ုလ်ဗ်အသင်းရဲ့ ဂိုးဧရိယာထိပ်မှာ ပြစ်ဒဏ်ကျူးလွန်ခဲ့တာဖြစ်ပြီး ကွင်းလယ်ဒိုင် မိုက်ကယ်အိုလီဗာက တိုက်ရိုက်အနီကတ်နဲ့ ထုတ်ပယ်ခဲ့တာပါ။ အဲဒီဖြစ်ရပ်နဲ့ပတ်သက်ပြီး အာဆင်နယ်က သူတို့ကစားသမားဟာ အနီကတ်ပြစ်ဒဏ်နဲ့ မထိုက်တန်ဘူးလို့ အယူခံဝင်ခဲ့ရာမှာတော့ အက်ဖ်အေရဲ့ စည်းကမ်းထိန်းသိမ်းရေးကော်မတီက အဆိုပါအဖြစ်အပျက်ကို ပြန်လည်စစ်ဆေးကာ လက်ခံပေးလိုက်တဖြစ်ပါတယ်။ ဒါကြောင့် အာဆင်နယ်လူငယ်ကြယ်ပွင့် စကယ်လီအနေနဲ့ ၃ ပွဲပယ် ပြစ်ဒဏ်ခံရတော့မှာမဟုတ်ဘဲ မန်စီးတီး၊ နယူးကာဆယ်တို့နဲ့ အရေးကြီးပွဲစဉ်တွေမှာ ပါဝင်ကစားနိုင်တော့မှာဖြစ်ပါတယ်။
****************************************
အပြောင်းအရွှေ့ပိတ်ခါနီးမှာ တိုက်စစ်မှူးခေါ်ဖို့ကြိုးစားနေတဲ့ အာဆင်နယ်
အာဆင်နယ်အသင်းကတော့ အပြောင်းအရွှေ့ စျေးကွက်ပိတ်ခါနီးမှာ အက်စတွန်ဗီလာအသင်းရဲ့ တိုက်စစ်မှူး အိုလီ ဝက်စ်ကင်းကို ပေါင်သန်း ၆၀ နဲ့ တရားဝင်ကမ်းလှမ်းလိုက်ပါတယ်။ ဒါပေမဲ့ ဗီလာဘက်ကတော့ ချက်ချင်းပဲ ပယ်ချသွားခဲ့ပါတယ်။ အာဆင်နယ်အသင်းဟာ ဝက်စ်ကင်းနဲ့ ဆက်ဆံရေးကောင်းရှိထားတာကြောင့် အပြောင်းအရွှေ့စျေးကွက်မပိတ်ခင် မြင့်မားတဲ့ပြောင်းရွှေ့ကြေးတစ်ရပ်နဲ့ နောက်ထပ်တစ်ကြိမ် ကမ်းလှမ်းသွားဖို့ ပြင်ဆင်နေတယ်လို့ သိရပါတယ်။ အသက် ၂၉ နှစ်အရွယ် အင်္ဂလန်လက်ရွေးစင်တိုက်စစ်မှူး ဝက်စ်ကင်းဟာ အာဆင်နယ်ပရိသတ်တစ်ယောက်လို့ ဝန်ခံထားဖူးပြီး အာတီတာရဲ့ စိတ်ကြိုက်ကစားသမားလည်း ဖြစ်ပါတယ်။
****************************************
ရက်ချ်ဖိုဒ့်ကို ဘာစီလိုနာထံ အငှားချဖို့ ပြင်ဆင်နေတဲ့ မန်ယူ
မန်ယူအသင်းကတော့ တိုက်စစ်မှူး မားကပ်စ် ရက်ချ်ဖိုဒ့်ကို အပြောင်းအရွှေ့စျေးကွက်မပိတ်ခင် ဘာစီလိုနာအသင်းထံ အငှားချနိုင်ရေးအတွက် ကြိုးပမ်းနေတယ်လို့ သိရပါတယ်။ အသက် ၂၇ နှစ်အရွယ် ရက်ချ်ဖိုဒ့်ဟာ နည်းပြ အမော်ရင်နဲ့ ဆက်ဆံရေး လုံး၀ပျက်ရွင်းသွားခဲ့ပြီး အခုဆိုရင် သူတို့နှစ်ဦးအကြားမှာ စကားပြောဆိုမှု မရှိဘူးလို့ သိရပါတယ်။ ဘာစီလိုနာအသင်းဟာ ရက်ချ်ဖိုဒ့်ကိုခေါ်ယူလိုပေမဲ့ ဘဏ္ဍာရေးပြဿနာကြောင့် ကြန့်ကြာနေတာဖြစ်ပြီး နှစ်ဘက်အသင်းတာဝန်ရှိသူတွေကတော့ စျေးကွက်မပိတ်ခင် အဖြေရှာနိုင်ဖို့ မျှော်လင့်နေကြပါတယ်။ မန်ယူအသင်းမှာ တစ်ပတ်လုပ်ခ ပေါင် ၃ သိန်းခွဲရရှိနေတဲ့ ရက်ချ်ဖိုဒ့်ဟာ ဘာစီလိုနာကိုပြောင်းကစားမယ်ဆိုရင်တော့ လုပ်ခလစာ လျှော့ယူရမှာလည်း ဖြစ်ပါတယ်။
****************************************
ဗီလာတိုက်စစ်မှူး ဒူရန်ကိုခေါ်ယူဖို့ သဘောတူညီမှု ရရှိသွားတဲ့ အယ်လ်နာဆာ
ဆော်ဒီအာရေဗျကလပ် အယ်လ်နာဆာအသင်းကတော့ အက်စတွန်ဗီလာတိုက်စစ်မှူး ဂျွန် ဒူရန်ကို ခေါ်ယူဖို့အတွက် အလုံးစုံသဘောတူညီမှု ရရှိသွားခဲ့ပြီလို့ သိရပါတယ်။ အယ်လ်နာဆာအနေနဲ့ ဒူရန်အတွက် ယူရို ၇၇ သန်း+ အပိုဆုကြေး ပေးချေရမှာဖြစ်ပြီး ဒီနေ့မှာပဲ လန်ဒန်မှာ ဆေးစစ်မှုခံယူသွားမယ်လို့ သိရပါတယ်။ အယ်လ်နာဆာဟာ သူတို့ရဲ့ အားထားရတဲ့တိုက်စစ်မှူး တယ်လီစကာကို ဖီနာဘာချီထံ ရောင်းထုတ်ခဲ့ရတာကြောင့် ဒူရန်ကို အစားထိုးခေါ်ယူခဲ့တာပါ။ ဒူရန်ဟာ ဒီရာသီမှာ ဗီလာအတွက် ပရီးမီးယားလိဂ်သွင်းဂိုး ၇ ဂိုးအပါအဝင် ပြိုင်ပွဲစုံမှာ ၁၂ ဂိုးအထိ သွင်းထားပေးနိုင်ခဲ့သူလည်း ဖြစ်ပါတယ်။
****************************************
ဘိုင်ယန်မြူးနစ်ကြယ်ပွင့်ကို အပြိုင်အဆိုင် ကြိုးပမ်းနေကြတဲ့ အင်္ဂလန်ထိပ်သီးကလပ်များ
ပရီးမီးယားလိဂ်ထိပ်သီးကလပ် အသင်းတွေဖြစ်တဲ့ အာဆင်နယ်၊ ချဲလ်ဆီး၊ စပါးနဲ့ မန်ယူတို့ဟာ ဘိုင်ယန်မြူးနစ်အသင်းရဲ့ လူငယ်ကြယ်ပွင့် မားသီးယပ်စ် တဲလ်ကို ဇန်နဝါရီအပြောင်းအရွှေ့မပိတ်ခင်မှာ ခေါ်ယူနိုင်ရေးအတွက် အပြိုင်အဆိုင်ကြိုးပမ်းနေကြတယ်လို့ သိရပါတယ်။ အသက် ၁၉ နှစ်အရွယ် တဲလ်ဟာ အနယ်လ်ကာလက်သစ်လို့ တင်စားခံထားရသူဖြစ်ပြီး ဘိုင်ယန်မြူးနစ်မှာ ပွဲကစားချိန်နည်းပါးလွန်းတာကြောင့် အသင်းပြောင်းချင်နေတာပါ။ စပါးအသင်းဟာ ပြီးခဲ့တဲ့လကတည်းက အငှားခေါ်ယူဖို့ ကြိုးစားနေတာပါ။ အာဆင်နယ်နဲ့ ချဲလ်ဆီးကတော့ အပြီးသတ်ခေါ်ယူနိုင်ရေးအတွက် ဘိုင်ယန်မြူးနစ်ထံ စုံစမ်းခဲ့ပြီး မန်ယူအသင်းကတော့ အဲဒီအခြေအနေကို စောင့်ကြည့်နေတယ်လို့ ဗြိတိန်ရဲ့နာမည်ကျော်သတင်းစာ ဒေးလီးမေးလ်က ဖော်ပြထားခဲ့ပါတယ်။ တဲလ်ဟာ ဘယ်ခြမ်းအားသန်တိုက်စစ်သမားဖြစ်ပြီး အထောင်တိုက်စစ်နဲ့ ညာခြမ်းတိုက်စစ်မှာလည်း ကစားနိုင်သူပါ။ ဒီရာသီမှာတော့ ဘိုင်ယန်မြူးနစ်အတွက် ဘွန်ဒက်စ်လီဂါမှာ ပွဲထွက်ကစားခွင့် ၂ ကြိမ်သာ ရထားသေးတာလည်းဖြစ်ပါတယ်။
ဓာတ်ပုံ – Goal, skysports