အင်္ဂါနေ့အတွက် CJ Platform ရဲ့ အားကစားသတင်းတိုများစုစည်းမှု
“ဆော်ဒီပရိုလိဂ်ကလပ် အယ်လ်ဟီလယ်နဲ့ စာချုပ်ရပ်စဲလိုက်တဲ့ နေမာ”
ဘရာဇီးလ်တိုက်စစ်မှူးနေမာဟာ ဆော်ဒီပရိုလိဂ်ကလပ် အယ်လ်ဟီလယ်အသင်းနဲ့ နှစ်ဦးနှစ်ဘက်သဘောတူ စာချုပ်ဖျက်သိမ်းလိုက်ပြီလို့ သိရပါတယ်။ လက်ရှိအချိန်မှာ အသက် ၃၂ နှစ်အရွယ်ရှိပြီဖြစ်တဲ့ နေမာဟာ ၂၀၂၃ ခုနှစ်၊ ဩဂုတ်လမှာ ပီအက်စ်ဂျီအသင်းထံကနေ ယူရိုသန်း ၉၀ နဲ့ ပြောင်းလာခဲ့တာဖြစ်ပေမဲ့ တစ်နှစ်ခွဲကာလအတွင်း ဒဏ်ရာပြဿနာတွေကြောင့် အယ်လ်ဟီလယ်အတွက် ၇ ပွဲသာ ကစားခွင့်ရခဲ့ပြီး သွင်းဂိုး ၁ ဂိုးသာ ရရှိခဲ့တာပါ။ နေမာဟာ အယ်လ်ဟီလယ်နဲ့ လမ်းခွဲပြီးနောက်မှာတော့ ငယ်ဘ၀ကလပ်အသင်းဖြစ်တဲ့ ဘရာဇီးလ်ကလပ် ဆန်းတိုစ့်အသင်းအတွက် ကစားပေးဖို့ သဘောတူညီမှုရရှိသွားခဲ့ပြီဖြစ်ပါတယ်။
****************************************
“ရက်ချ်ဖိုဒ့်အတွက် မန်ယူမှာ နေရာမရှိတော့ဘူးလို့ ဖာဒီနန် သုံးသပ်ပြောဆို”
မန်ယူအသင်းရဲ့ ဂန္ထဝင်နောက်ခံလူ ရီယို ဖာဒီနန်က အသင်းရဲ့ တိုက်စစ်မှူး မားကပ်စ် ရက်ချ်ဖိုဒ့်ရဲ့ အခြေအနေနဲ့ ပတ်သက်ပြီး သူ့ရဲ့ Rio Presents YouTube Channel ကနေ အခုလို ပြောခဲ့ပါတယ်။ ဖာဒီနန်က “ကျွန်တော်သာ သူ့နေရာမှာ ဖြစ်ခဲ့မယ်ဆိုရင် ကျွန်တော့်ရဲ့ နှလုံးသား၊ ဂုဏ်သိက္ခာနဲ့ မာနအတွက်တော့ အတော်လေး ထိခိုက်သွားမှာပါ။ အခုလိုပြောခံရတာဟာ အတော်လေးရှက်စရာကောင်းပါတယ်။ ကိုယ့်ရဲ့ စွမ်းဆောင်ရည်အတွက် မေးခွန်းထုတ်ခံရသလို၊ ပေးဆပ်မှုမရှိဘူး။ ကြိုးစားလိုစိတ်မရှိဘူးဆိုတဲ့စကားတွေဟာ အတော်လေး အထိနာပါတယ်။ ရက်ချ်ဖိုဒ့်အတွက် အသင်းမှာ ပြန်ကစားရဖို့ မဖြစ်နိုင်တော့ပါဘူး။ သူသာ ပြန်ကစားခွင့်ရတယ်ဆိုရင် တခြားကစားသမားတွေလည်း ရေသာခိုတဲ့လမ်းတွေကို လိုက်လာကြပါလိမ့်မယ်” လို့ ပြောဆိုသွားခဲ့ပါတယ်။ ပြီးခဲ့တဲ့တနင်္ဂနွေနေ့တုန်းက ဖူလ်ဟမ်ကို အနိုင်ရခဲ့တဲ့ပွဲအပြီး အင်တာဗျူးမှာ မန်ယူနည်းပြ အမော်ရင်က ရာနှုန်းပြည့်ကြိုးစားအားထုတ်မှုမရှိတဲ့ကစားသမားကို အရန်ခုံမှာထားမယ့်အစား အသက် ၆၃ နှစ်အရွယ် ဂိုးနည်းပြ ဂျော့ချ်ဗီတယ်ကိုပဲ အရန်ခုံထိုင်ခိုင်းမယ်လို့ ပြောဆိုခဲ့ပါတယ်။
****************************************
“ဘ၀တစ်လျှောက်လုံး လိင်စိတ်ကို ဖုံးကွယ်ထားခဲ့ကြောင်း ဖွင့်ဟလာတဲ့ ပရီးမီးယားလိဂ်ဒိုင်လူကြီးဟောင်း”
ပရီးမီးယားလိဂ် ဒိုင်လူကြီးဟောင်းတစ်ဦးဖြစ်တဲ့ ဒေးဗစ်ကိုးတီက သူဟာ မိန်းမလျာတစ်ဦးဖြစ်ပေမဲ့ ဒါကို ဖွင့်ပြောလိုက်ရင် လှောင်ပြောင်တိုက်ခိုက်မှုတွေခံရမှာစိုးတာကြောင့် ဒိုင်လူကြီးဘ၀တစ်လျှောက်လုံးမှာ ဒီအကြောင်းအရာကို လျှို့ဝှက်ထားခဲ့ရတယ်လို့ ဖွင့်ဟလာခဲ့ပါတယ်။ အသက် ၄၂ နှစ်အရွယ်ရှိပြီဖြစ်တဲ့ ကိုးတီဟာ ယူရို ၂၀၂၄ ပြိုင်ပွဲကာလအတွင်း ဟိုတယ်အခန်းထဲမှာ ကိုကင်းသုံးစွဲခဲ့မှုကြောင့် ဒီဇင်ဘာလထဲမှာတော့ ဒိုင်လူကြီးများအဖွဲ့ချုပ် (PGMOL)ရဲ့ ထုတ်ပယ်ခြင်းခံခဲ့ရသူပါ။ The Sun နဲ့ အင်တာဗျူးမှာတော့ ကိုးတီက ကျွန်တော်က ဂေးတစ်ယောက်ပါ။ ကိုယ့်ရဲ့ ဖြစ်တည်မှုကို ထုတ်မပြောဘဲ ကာလရှည် ဖုံးကွယ်ထားခဲ့ရတာပါ။ ဒိုင်တစ်ဦးအဖြစ် ဆောင်ရွက်နေတာကြောင့် မိန်းမလျာဖြစ်တယ်ဆိုတာသာ သိသွားကြရင် ပိုပြီး ထိုးနှက်တိုက်ခိုက်မှုတွေ ကြုံရမှာကြောင့် ဖုံးကွယ်ထားခဲ့ရတာပါ လို့ ဖွင့်ဟခဲ့တာဖြစ်ပါတယ်။
****************************************
“ချဲလ်ဆီးနောက်ခံလူ ဗိုင်ဂါကို အငှားနဲ့ခေါ်ယူခဲ့တဲ့ ဂျူဗင်တပ်စ်”
ဂျူဗင်တပ်စ်အသင်းဟာ ချဲလ်ဆီးအသင်းရဲ့ အသက် ၂၁ နှစ်အရွယ် နောက်ခံလူ ဗိုင်ဂါကို ရာသီကုန်ထိ အငှားစာချုပ်နဲ့ ခေါ်ယူလိုက်ပြီဖြစ်ပါတယ်။ ဗိုင်ဂါဟာ ပြီးခဲ့တဲ့နွေစျေးကွက်မှာ ဆွစ်ဇာလန်ကလပ် ဘေဆယ်ကနေ ချဲလ်ဆီးထံ ပေါင် ၁၂ သန်းနဲ့ ရောက်ရှိလာခဲ့သူဖြစ်ပြီး ရာသီဝက်ကာလအတွင်း ပရီးမီးယားလိဂ် ၁ ပွဲသာ ပွဲထွက်ခွင့်ရခဲ့တာပါ။ ဗိုင်ဂါဟာ ဗဟိုနောက်ခံလူဖြစ်ပေမဲ့ ချဲလ်ဆီးနည်းပြ မာရက်စ်ကာက ဘယ်ခြမ်းခံစစ်အတွက်သာ ကစားစေခဲ့တာကြောင့် စိတ်ပျက်နေခဲ့ပြီး ပွဲကစားခွင့်ပိုမိုရရှိရေးအတွက် ဂျူဗင်တပ်စ်အသင်းထံ ပြောင်းကစားခဲ့တာဖြစ်ပါတယ်။
****************************************
“ပရီးမီးယားလိဂ်ကစားသမားတွေကို ခေါ်ယူမယ့် လေဗာကူဆင်”
ဂျာမန် ဘွန်ဒက်စ်လီဂါကလပ် လေဗာကူဆင်အသင်းဟာ ဇန်နဝါရီစျေးကွက်မှာ ကစားသမားအင်အားဖြည့်တင်းမှုအဖြစ် အက်စတွန်ဗီလာအသင်းရဲ့ အာဂျင်တီးနားကွင်းလယ်လူ ဘွန်ဒီယာကို ရာသီကုန်ထိ အငှားနဲ့ခေါ်ယူဖို့ သဘောတူညီမှု ရရှိသွားခဲ့ပြီဖြစ်ပါတယ်။ အသက် ၂၈ နှစ်အရွယ် ဘွန်ဒီယာဟာ ဗီလာအသင်းအတွက် ဒီရာသီ ပရီးမီးယားလိဂ် ၁၂ ပွဲကစားခွင့်ရထားခဲ့ပြီး အပြီးသတ်ခေါ်ခွင့်မပါဝင်တဲ့ အငှားသီးသန့်စာချုပ်ဖြစ်လို့ ရာသီကုန်ချိန်မှာ အသင်းဆီ ပြန်ရောက်လာမှာဖြစ်ပါတယ်။ လေဗာကူဆင်ဟာ အပြောင်းအရွှေ့စျေးကွက်မပိတ်ခင်မှာ ဘူအန်ဒီယာအပြင် မန်စီးတီးအသင်းရဲ့ လူငယ်ကြယ်ပွင့် မက် အတီးကိုလည်း ခေါ်ယူနိုင်ဖို့ ကြိုးစားနေတယ်လို့ သိရှိရပါတယ်။
ဓာတ်ပုံ – The Sun, Twitter