လားရှိုးမြို့ကြီး ဘာဖြစ်နေလဲ?

---

ရှမ်းမြောက် တစ်ကျော့ပြန် ၁၀၂၇ စစ်ဆင်ရေးဟာ အခုဆိုရင် လားရှိုးမြို့ကို ကူးစက်လာခဲ့ပြီဖြစ်ပါတယ်။ ပြီးခဲ့ဇွန်လနှောင်းပိုင်းကစလို့ စစ်ကောင်စီနဲ့ ကိုးကန့်တပ် MNDAA တို့ တစ်ဖက်နဲ့ တစ်ဖက် ထိတွေ့တိုက်ပွဲတွေ စတင်ဖြစ်ပွားနေကြပါပြီ။ ဒါကြောင့် လားရှိုးမြို့ပေါ်မှာ ဘာတွေဖြစ်နေလဲ။ စစ်ရေးအခြေအနေဘယ်လိုရှိလဲ။ ဒေသခံတွေရော ဘယ်လိုပြင်ဆင်ထားသလဲ။ တရုတ်-မြန်မာ နယ်စပ်ကုန်သွယ်ရေးလမ်းကြောင်းပေါ်မှာရှိတာကြောင့် လမ်းပိုင်းအခြေအနေတွေ ဘယ်လိုရှိလဲ စတာတွေနဲ့ပတ်သက်ပြီး မြို့ခံပရဟိတအသင်းများရဲ့ ဦးဆောင်သူတစ်ဦးကို CJ Platform က ဆက်သွယ်မေးမြန်းထားချက်များကို ဖော်ပြအပ်ပါတယ်။

 

မေး     ။ လက်ရှိ လားရှိုးမြို့အခြေအနေလေး သိပါရစေ။

ဖြေ      ။ မြို့အခြေအနေကတော့ လောလောဆယ် တိတ်ဆိတ်ခြောက်ကပ်ပြီး တော်တော့်ကို လူသွားလူလာနည်းသွားတယ်။ ဒီဘက်က ပစ်သံခတ်သံတွေ ကြားနေရတယ်။ ဒီလောက်ပါပဲဗျ။

 

မေး     ။ ဒီနေ့(ဇူလိုင် ၃ ရက်)မနက်ပိုင်း လားရှိုးမှာ လက်နက်ကြီးကျလို့ အရပ်သားထိခိုက်သေဆုံးမှုတွေရှိတယ်လို့ ကြားသိရလို့ပါ။ ဘယ်လိုများ သိရှိထားရပါသလဲ။

ဖြေ     ။ အဲဒါက မြို့ပြင်မဟုတ်ဘူးဗျ။ မြို့လယ်ခေါင်လောက်ကျတယ်ခင်ဗျ။ မြို့တွင်းထဲ ကျတာဗျ။ လောလောဆယ် သိရသလောက် ရှော့တိုက်ဒုံးလို့လည်း သိရတယ်ဗျ။ နေအိမ်ပေါ်ကို ကျတဲ့အခါမှာ ထမင်းစားဖို့လုပ်နေတဲ့မိသားစုတစ်စု အားလုံးပေါင်း ခြောက်ဦး၊ ကျားသုံး၊ မသုံး ထိမှန်သေဆုံးတာတော့ ရှိပါတယ်။ ခြောက်ဦးစလုံး သေဆုံးပါတယ်။ ကချင်မိသားစုအိမ်ဖြစ်ပါတယ်။

 

မေး     ။ သေဆုံးထားသူတွေကို ဘယ်လိုအစီအစဉ်ချပေးထားပါသလဲ။

ဖြေ     ။ အခုမှ သင်္ဂြိုလ်ဖို့ ကျွန်တော်တို့ဆီ လှမ်းပြောနေတာဗျ။ အခု သင်္ဂြိုလ်ဖို့ စီစဉ်နေပါတယ်ဗျ။

 

မေး     ။ ဘယ်အဖွဲ့ကနေပစ်တဲ့ လက်နက်ကြီးလို့ သိရပါသလဲ။

ဖြေ     ။ အဲဒီလိုတော့ မသိဘူးခင်ဗျ။ လောလောဆယ်မှာတော့ ကျွန်တော်တို့သိရသလောက် မြို့ထဲကို နှစ်လုံးကျတာမှာ တစ်လုံးကတော့ နေအိမ်ပေါ်ကျတယ်။ တစ်လုံးကတော့ လူမရှိတဲ့ ကွင်းထဲကို ကျတာရှိတယ်။ လောလောဆယ် အဲဒီလောက်ပဲ သိထားပါတယ်ခင်ဗျ။

 

မေး     ။ လားရှိုးမြို့ပေါ်မှာ စစ်လေယာဉ်တွေ ပျံဝဲနေပါပြီလား။

ဖြေ     ။ အဲဒီလိုကတော့ ရှိပါတယ်။ မနေ့က ညကတည်းက စပြီးတော့ တဂျိန်းဂျိန်းပစ်နေတာဆိုတော့ အဲဒါလေးတွေတော့ ရှိပါတယ်။

 

မေး     ။ ဗုံးကြဲချတာမျိုးရော ရှိပါပြီလား။

ဖြေ     ။ မြို့ကိုတော့ မရှိသေးပါဘူးဗျ။ မြို့ထဲကနေတော့ တစ်ညလုံး (လက်နက်ကြီးတွေ)ပစ်နေတာပဲ။ မြို့ထဲကနေပြီးတော့ ဒီပြင့်နေရာတွေကို ပစ်ကူပေးတဲ့အသံတွေတော့ ကြားနေရတာ။

 

မေး     ။ နောက်ပြီး လားရှိုးလေဆိပ်ကို စစ်ကောင်စီဘက်က ပိတ်လိုက်ပြီဆိုတာ ဟုတ်ပါသလား။

ဖြေ     ။ ဟုတ်။ ပိတ်လိုက်ပါပြီ။ အဲဒါက မှန်ပါတယ်ခင်ဗျ။

 

မေး     ။ ဘယ်အချိန်ကတည်းက စပိတ်လိုက်တာပါလဲ။

ဖြေ     ။ မနက်ကတည်းကဆိုတော့ ဒီနေ့လေကြောင်း ဆင်းမယ့် လေကြောင်းလိုင်းတွေအားလုံး ရပ်သွားတာဗျ။

 

မေး     ။ လားရှိုးလေယာဉ်ကွင်း တစ်နေ့ လေယာဉ်အတက်အဆင်း ဘယ်လောက်ရှိပါသလဲ။

ဖြေ     ။ ကျွန်တော်တို့ သိသလောက် ပုံမှန်အားဖြင့် နှစ်စီးကတော့ အဝင်၊ အထွက်ရှိတယ်။ လားရှိုးမှာ အိပ်တာတော့ မရှိဘူး။ ဥပမာ ရန်ကုန်က ပြန်လာရင် လားရှိုးဆင်းတယ်။ ခရီးသည်တင်ပြီးတော့ ပြန်ထွက်သွားတယ်။ အဲဒီလိုမျိုးပဲ အတက်အဆင်းလုပ်တာမျိုးပဲရှိတယ်။ ညအိပ်ရပ်နားတာတော့ မရှိဘူးဗျ။

 

မေး     ။ နောက်ပြီး လားရှိုး-မူဆယ်လမ်းနဲ့ လားရှိုး-သီပေါ-ကျောက်မဲလမ်းတွေရဲ့ အခြေအနေရော ဘယ်လိုရှိပါသလဲ။

ဖြေ     ။ လောလောဆယ်တော့ လမ်းကြောင်း လုံးဝပိတ်တယ်တော့ မကြားဘူးဗျ။ ဒါပေမဲ့ ပိတ်ထားတာကတော့ ကြာနေပြီဗျ။ သင့်ရာလမ်းတွေကနေပဲ၊ တောလမ်းတွေကနေပဲ ပတ်သွားနေကြရတာပါ။ ဒီနေ့ကတော့ မြို့ပြင်ထွက်ဖို့အတွက် ယာယီပိတ်လိုက်တယ်။ အဲဒါလေးတော့ သိရပါတယ်။ ယာယီဆိုတာ ဘယ်အချိန်ထိပိတ်မယ်။ ဘယ်လောက်ကြာမယ်ဆိုတာ မသိရဘူးခင်ဗျ။

 

မေး     ။ အဲဒီတော့ အခုဆိုရင် လားရှိုးမြို့သူ/မြို့သားတွေ အားလုံး မြို့က ထွက်လို့မရတော့သလို ဝင်လို့လည်းမရတော့ဘူးဆိုတဲ့သဘောပါလား။

ဖြေ     ။ ဟုတ်တယ်။ ခုနကတော့ အပြင်ထွက်လို့မရဘူးလို့ ကျွန်တော်တို့ကို ပြောပါတယ်ဗျ။

 

မေး     ။ အခုလက်ရှိ ကူညီကယ်ဆယ်ရေးတွေ လုပ်ဆောင်ရာမှာ အနှောင့်အယှက်တွေ့ရတာမျိုးတွေ ကြုံရပါသလား။

ဖြေ     ။ ကျွန်တော်တို့တော့ လောလောဆယ် မရှိဘူးဗျ။ မရှိဘူးဆိုတာက မနက်က ဖြစ်စဉ်လေးတစ်ခုပဲ ဖြစ်ထားတာရှိသေးတဲ့အတွက် လောလောဆယ်မှာ ကျန်တဲ့နေရာ အထိအခိုက်ဘာညာမကြားမိသေးတဲ့အတွက် ကျွန်တော်တို့ ထွေထွေထူးထူးတော့ မရှိသေးပါဘူး။

 

မေး     ။ လားရှိုးမြို့အတွင်းက ပြည်သူတွေအနေနဲ့ ဘယ်လိုစိုးရိမ်မှုတွေ ရှိနေပါသလဲ။

ဖြေ     ။ စိုးရိမ်တာကတော့ တစ်ဦးနဲ့ တစ်ဦးကတော့ ပြောလို့မရဘူး။ အကုန်လုံးကတော့ မနေ့ညကတည်းက ပစ်သံခတ်သံတွေကြားနေရတော့ အားလုံးကတော့လန့်နေတာပေါ့။ ဒီနေ့ကတော့ လမ်းပေါ်မှာ လူမရှိသလောက်ပဲ။ အားလုံး ဈေးဆိုင်တွေဘာတွေ အားလုံးလည်း ပိတ်သွားတာပေါ့။ မြို့က ခြောက်ကပ်သွားတာပေါ့။

 

မေး     ။ လားရှိုးနဲ့ အနီးနားမြို့တွေဖြစ်တဲ့ သီပေါ၊ ကျောက်မဲ၊ နောင်ချို မြို့ထဲတွေမှာလည်း တိုက်ပွဲတွေ ပြီးခဲ့တဲ့ရက်ပိုင်းကတည်းက ဖြစ်နေတာဆိုတော့ လားရှိုးမြို့ထဲကိုရော စစ်ပွဲကူးစက်လာနိုင်တဲ့အခြေအနေကို ဘယ်လောက်အထိ တွက်ဆလို့ရနိုင်ပါမလဲ။

ဖြေ     ။ လောလောဆယ်မှာတော့ ကျွန်တော်တို့သိသလောက် ကျောက်မဲက မြို့တွင်းမှာ တိုက်ပွဲတွေဖြစ်နေတယ်။ နောင်ချိုလည်း ဖြစ်နေတယ်။ သီပေါလည်း အနည်းအကျဉ်းကျတာ ရှိတယ်။ သီပေါနဲ့ လားရှိုးနဲ့က အတူတူပဲ။ ဘေးကနေ တစ်ဖက်အဖွဲ့အစည်းက ရောက်ရှိလာတာဖြစ်တဲ့အတွက် မှန်းဆလို့တော့ လုံးဝမရဘူးဗျ။ ဘယ်လိုဖြစ်လာနိုင်လဲဆိုတဲ့အခြေအနေကိုတော့ လုံးဝမှန်းဆလို့မရနိုင်ပါဘူး။

 

မေး     ။ ဆိုတော့ တိုက်ပွဲရှောင်ဖို့ ပြည်သူတွေအနေနဲ့ ဘယ်လိုထားမှုတွေများရှိပါသလဲ။ ကတုတ်ကျင်းလိုမျိုး အရေးပေါ် တိမ်းရှောင်လို့ အရာမျိုးတွေ ပြင်ဆင်ထားကြတာကို တွေ့မြင်ရပါသလား။

ဖြေ     ။ အဲဒါမျိုးတွေကတော့ ကိုယ်စီကိုယ်စီကတော့ တချို့အိမ်တွေတော့ ပြင်ဆင်ထားတယ်လို့ သိရတယ်ဗျ။ အဆောက်အဦးအောက်မှာတွေ ပြင်ဆင်ထားတာတွေလည်း ရှိကြတယ်။ တချို့လည်း မရှိဘူး။ ဖြစ်နိုင်ခြေကို ဘာမှကြိုတွက်လို့မရတော့ တချို့ကလည်း မလုပ်ထားဘူးပေါ့။ ကျွန်တော်တို့ ကိုယ်တိုင်ကိုက လက်ရှိမှာလည်း တိတိကျကျမပြောနိုင်တော့လေ။ ဘယ်လိုဆက်ဖြစ်လာမလဲဆိုတာကို ပြောလို့မရဘူး။ လောလောဆယ်မှာတော့ တခြား ကျောက်မဲတို့၊ နောင်ချိုတို့လို ပုံစံမျိုးအထိတော့ ဒီအချိန်ထိတော့ မရောက်သေးဘူးလို့ ယူဆပါတယ်။

 

မေး     ။ အနီးနားမြို့တွေမှာ ပြီးခဲ့တဲ့ရက်တွေထဲက တိုက်ပွဲတွေကြောင့် အရပ်သားထိခိုက်သေဆုံးမှုတွေ နေ့တိုင်းလိုလိုဖြစ်ခဲ့တာသိထားမယ်လို့ယုံကြည်ပါတယ်။ ဒီလိုဆိုတော့ လားရှိုးမြို့က ပရဟိတအသင်းတွေအနေနဲ့ ဒီလိုမျိုး အရေးပေါ်ကယ်ဆယ်ရေးတွေ လုပ်နိုင်ဖို့ ဘယ်လိုမျိုးကြိုတင်ပြင်ဆင်မှုတွေ လုပ်ထားတာများရှိပါသလဲ။

ဖြေ     ။ အဲဒီလိုကတော့ ရှိပါတယ်။ ကျွန်တော်တို့ အဖွဲ့တွေအနေနဲ့ကတော့ သာမန်ထက် ပိုတဲ့ပြင်ဆင်မှုဆိုတာကတော့ ထွေထွေထူးထူးတော့ မဟုတ်ပါဘူး။ ကျွန်တော်တို့ ဖြစ်လာလို့ရှိရင် အများဆုံး ဖြစ်နိုင်ခြေကို တွက်ဆပြီးတော့မှ ပြင်ဆင်ထားတာတွေတော့ ရှိပါတယ်။ ဥပမာ – ကားတွေ၊ လူတွေ နောက် လိုအပ်တဲ့ ကိုယ့်မှာတတ်နိုင်တဲ့ ဆေးဝါးနဲ့ ကူညီကယ်ဆယ်ဖို့ အဖွဲ့တွေ ဖွဲ့ထားတာတွေ ရှိပါတယ်။

 

မေး     ။ ဘယ်နှစ်ဖွဲ့လောက်များရှိပါသလဲ။

ဖြေ     ။ ကျွန်တော်တို့ ဒီမှာ နဂို မာရှယ်လော လားရှိုးမြို့မှာ စထုတ်ကတည်းက ကျွန်တော့်ဆီမှာကတော့ ဆယ်ဖွဲ့ရှိတယ်။ ဆယ်ဖွဲ့မှာ နှစ်ဖွဲ့ကတော့ သွေးအသင်းပဲဖြစ်တဲ့အတွက် ရှစ်ဖွဲ့ပေါ့။ အဲဒီရှစ်ဖွဲ့နဲ့ အင်အားစုထားတာတော့ရှိတယ်ခင်ဗျ။ တခြားအသင်းတွေလည်း တစ်သင်းနှစ်သင်းလောက်တော့ ရှိမှာပါ။ နှစ်သင်းလောက်တော့ ပြင်ဆင်ထားတာ ရှိပါတယ်။ ကျွန်တော်တို့ အဖွဲ့ကျတော့ လားရှိုးမြို့ပေါ်မှာ နည်းနည်းများတာပေါ့။ ကျွန်တော်တို့ကတော့ အစုနဲ့အဖွဲ့နဲ့ ပြင်ထားတာရှိပါတယ်။

 

မေး     ။ ဘာများဖြည့်စွက်ပြောချင်တာများရှိပါဦးမလဲ။

ဖြေ     ။ မရှိတော့ပါဘူး။ ပြည့်စုံပါတယ်ခင်ဗျာ။

 

ဓာတ်ပုံ – လူမှုကွန်ရက်