ငလျင်ကြောင့် အပစ်ရပ်တယ်ပြောထားတဲ့ စစ်ကောင်စီက ယင်းမာပင်မှာ စစ်ကြောင်းထိုးနေလို့ ဒေသခံတွေပြေးနေရ
အင်အားပြင်း စစ်ကိုင်းငလျင်ကြောင့် အပစ်ရပ်တယ်လို့ မနေ့ကထုတ်ပြန်ထားတဲ့ စစ်ကောင်စီက ထုတ်ပြန်တဲ့နေ့မှာပဲ ကနီမြို့နယ်အတွင်းကို စစ်ကြောင်းထိုးဝင်ရောက်လာလို့ ကျေးရွာနေပြည်သူတွေ ထွက်ပြေးတိမ်းရှောင်နေရတယ်လို့ CJ Platform သတင်းရင်းမြစ်က ပြောပါတယ်။
ယင်းမာပင်မြို့နယ် အရှေ့ခြမ်း ပုသိမ်_မုံရွာလမ်းပေါ်မှာ စစ်ကောင်စီတပ်က အင်အား ၄၀ ခန့်နဲ့ စစ်ကြောင်းထိုးနေတာ ဖြစ်ပြီး ယင်းမာပင်မြို့နယ်နဲ့ ဆားလင်းကြီးမြို့နယ်ရှိ ဒုန်းတောနဲ့ ဂုဏ်တော ကျေးရွာတွေက ဒေသခံတွေ ညတွင်းချင်းစစ်ဘေးရှောင် ထွက်ပြေးနေရတယ်လို့ ပြောပါတယ်။
“ ယင်းမာပင် ဘက်က ဝမ်ပေါင်ယမ်စီ ကြေးနီ စီမံကိန်းနားတဝိုက် စစ်ကြောင်းထိုးတာ။ အဲဒီလိုထိုးတော့ မနေ့ညက ယင်းမာပင်၊ ဆားလင်းကြီး ဂုဏ်တောရွာဘက်က ပြည်သူတွေ ညကြီးစစ်ရှောင်ရတာ “ လို့ CJ Platform သတင်းရင်းမြစ်က ပြောပါတယ်။
ဒါ့အပြင် စစ်ကိုင်းခရိုင်အတွင်း အလ္လကပ္ပ ရွာမှာလည်း စစ်ကြောင်းထိုး အထိုင်ချဖို့ လုပ်နေတယ်လို့ သူက ဆက်ပြောပါတယ်။
စစ်ကောင်စီက ဧပြီလ ၂ ရက်နေ့ကနေ ၂၂ ရက်နေ့အထိ ရက် ၂၀ ကြာအပစ်ရပ်တယ်လို့ ထုတ်ပြန်ထားပေမဲ့ တော်လှန်ရေးအင်အားစုတွေရဲ့ ထိန်းချုပ်နယ်မြေတွေကို စစ်ကြောင်းထိုး ဝင်ရောက်နေတာ လေကြောင်းတိုက်ခိုက်တာတွေ လုပ်ဆောင်နေဆဲ ဖြစ်တယ်လို့ ဒေသခံတွေရဲ့ ပြောပြချက်အရ သိရပါတယ်။
စစ်ကောင်စီရဲ့ ထုတ်ပြန်ချက်နဲ့ ကတိကဝတ်တွေဟာ ယုံကြည်စရာလုံးဝမရှိဘူးလို့ ယင်းမာပင် ခရိုင်ပြည်သူ့ကာကွယ်ရေးတပ်ဖွဲ့ကလည်း ဝေဖန်ထောက်ပြထားပါတယ်။
စစ်ကောင်စီဟာ အပစ်ရပ်ထားတဲ့ ကာလအတွင်း အများပြည်သူ သွားလာအသုံးပြုနေတဲ့ ဆက်သွယ်ရေးလမ်းကြောင်းတွေနဲ့ ပြည်သူလူထုရဲ့ အသက်အိုးအိမ်စည်းစိမ်ကို ထိခိုက်ပျက်စီးစေတာ၊ တပ်စခန်းတွေကို တိုက်ခိုက်တာ၊ တပ်ဌာနချုပ်တွေကို တိုက်ခိုက်တာ၊ အင်အားစုတာ၊ ပြင်ဆင်စုဖွဲ့တာ၊ နယ်မြေချဲ့ထွင်တာတွေကိုမပြုလုပ်ဖို့ အပစ်ရပ်ကြေညာချက်ထဲ ထည့်သွင်းရေးသားထားပါတယ်။
ဓာတ်ပုံ – ပေးပို့